ໃນຫຼາຍປີມານີ້,ຈ່າງເຈ່ຍເຈ້ໄດ້ຕັ້ງຫໍພິພິທະພັນຈຳນວນໜຶ່ງທີ່ວາງສະແດງວັດທະນະທຳຮີດຄອງປະເພນີປະຊາຊົນ,ນີ້ທັງໄດ້ເພີ່ມເນື້ອໃນການທ່ອງທ່ຽວຂອງທ່ອງຖິ່ນ,ແລະກໍໄດ້ຊ່ອຍເພີ່ມໂອກາດຫາວຽກເຮັດງານທຳແລະສ້າງລາຍໄດ້ໃຫ້ແກ່ຊາວນາທັງຫຼາຍ.
ຫໍຊິວຮວາຊານ
ຫໍຊິວຮວາຊານແມ່ນຫໍພິພິທະພັນເຜົ່າທູເຈ່ຍເອກະຊົນແຫ່ງໜຶ່ງຂອງຈ່າງເຈ່ຍເຈ້,ຫໍພິພິທະພັນແຫ່ງນີ້ນອກຈາກວາງສະແດງເຄື່ອງໃຊ້ປະຈຳວັນແລະເຄື່ອງມືອອກແຮງງານທີ່ມີລັກສະນະຕົວແທນຂອງເຜົ່າທູເຈ່ຍແລ້ວ,ຍັງໄດ້ສະແດງລາຍການພື້ນເມືອງ,ຜະລິດແລະຈຳໜ່າຍຮູບແຕ້ມກ້ອນຫີນຊາແລະເຄື່ອງຫັດຖະກຳຂອງເຜົ່າທູເຈ່ຍ.ມື້ໃດກໍມີຫຼາຍໆຄົນມາທັດສະນາຈອນຢູ່ແຫ່ງນີ້.
ເຄື່ອງຫັດຖະກຳໃນຫໍຊິວຮວາຊານ
ທ່ານເຮີສູຮວາ ຫົວໜ້າຫໍຊິວຮວາຊ່ານບອກນັກຂ່າວວ່າ,ພະນັກງານ40ກວ່າຄົນໃນຫໍພິພິທະພັນແຫ່ງນີ້ສ່ວນຫຼາຍແມ່ນຊາວນາຂອງທ້ອງຖິ່ນ,ວັດຖຸດິບທີ່ແຕ້ມຮູບກ້ອນຫີນຊາແລະເຄື່ອງຫັດຖະກຳເຊິ່ງວາງສະແດງໃນຫໍພິພິທະພັນນັ້ນລ້ວນແຕ່ແມ່ນຊາວນາເຫຼົ່ານີ້ເປັນຜູ້ຜະລິດ.ທ່ານເວົ້າວ່າ:
"ຂ້າພະເຈົ້າໄດ້ໃຫ້ຊາວນາໃນຊົນນະບົດຜະລິດວັດຖຸດິບ,ໃຊ້ຮູບແບບບໍລິສັດບວກກັບຄອບຄົວຊາວນາ,ໃຫ້ຄອບຄົວຊາວນາຫຼວງຫຼາຍຜະລິດຜະລິດຕະພັນນີ້,ໃຫ້ພວກເຂົາເຈົ້າເຂົ້າສູ່ຂະບວນການຜະລິດ.ແຕ່ກ່ອນພວກເຂົາເຈົ້າຢູ່ລ້າໆຍ້ອນບໍ່ມີວຽກເຮັດ.ດຽວນີ້ທັງມີວຽກເຮັດທັງໄດ້ເງິນ,ວິສາຫະກິດຂອງຂ້າພະເຈົ້າກໍມີລາຍໄດ້ນັບມື້ນັບຫຼາຍ."
ຮູບແຕ້ມກ້ອນຫີນຊາ
ທ່ານໂກວເທຈຸ່ນ ພະນັກງານຂອງພະແນກທ່ອງທ່ຽວເມືອງຈ່າງເຈ່ຍເຈ້ກ່າວວ່າ,ການພັດທະນາການທ່ອງທ່ຽວໄດ້ເຮັດໃຫ້ຊີວິດການເປັນຢູ່ຂອງຊາວນາເມືອງຈ່າງເຈ່ຍເຈ້ ມີການປ່ຽນແປງຫຼາຍແນວ.ທ່ານກ່າວວ່າ:"ເບົ້າແບບຈິນຕະນາການຂອງພວກຊາວນາໄດ້ປ່ຽນຈາກແບບປິດປະຕູມາເປັນ ແບບເປີດປະຕູ.ຂໍຍົກເອົາຕົວຢ່າງອັນໜຶ່ງ,ໃນເຂດທິວທັດຈ່າງເຈ່ຍເຈ້,ແມ່ເຖົ້າແລະເດັກນ້ອຍຫຼາຍໆຄົນລ້ວນແຕ່ປາກພາສາເກົາຫຼີເປັນ.ນີ້ແມ່ນການປ່ຽນແປງສຳຄັນແນວໜຶ່ງ."
ແຂກທ່ອງທ່ຽວສ.ເກົາຫຼີທີ່ມາທ່ຽວຈ່າງເຈ່ຍເຈ້ມີຢ່າງຫຼວງຫຼາຍ,ສະນັ້ນ,ຊາວນາຫຼາຍໆຄົນຢູ່ເຂດທິວທັດລ້ວນແຕ່ຮຽນຮູ້ການທັກທາຍ,ແນະນຳສິນຄ້າແລະຕໍ່ລາຄາດ້ວຍພາສາເກົາຫຼີ.ຢູ່ຕີນພູແຫ່ງໜຶ່ງຂອງຈ່າງເຈ່ຍເຈ້,ນັກຂ່າວໄດ້ເຫັນວ່າ,ຢູ່ອ້ອມຂ້າງສະໜາມຫຼວງແຫ່ງໜຶ່ງມີຮ້ານຂາຍເຄື່ອງຫັດຖະກຳ,ຮ້ານອາຫານຈຳນວນຫຼວງຫຼາຍ,ເຈົ້າຂອງຮ້ານລ້ວນແຕ່ແມ່ນຊາວນາທ້ອງຖິ່ນ.ເມື່ອແຂກທ່ອງທ່ຽວຄົນສ.ເກົາຫຼີພໍຍ່າງຜ່ານປະຕູຮ້ານ,ເຈົ້າຂອງຮ້ານກໍໃຊ້ພາສາເກົາຫຼີຖາມສະບາຍດີນຳພວກເຂົາເຈົ້າໃນທັນທີ.ນັກຂ່າວໄດ້ໂອ້ລົມກັບທ່ານວາງມາວເຊິ້ງ ເຈົ້າຂອງຮ້ານຄ້າແຫ່ງໜຶ່ງ.ທ່ານເວົ້າວ່າ:
"ເຮົາເອງກໍແມ່ນທັງເຮັດທຸລະກິດທັງຮຽນພາສາເກົາຫຼີ,ຮຽນໄດ້ປະມານສອງປີແລ້ວ.ແຕ່ລະມື້,ແຂກທ່ອງທ່ຽວສ.ເກົາຫຼີມາຊື້ສິນຄ້າທີ່ມີມູນຄ່າ1ໝື່ນຫາ2ໝື່ນວ້ອນເກົາຫຼີ,ເຊິ່ງເທົ່າກັບ100ກວ່າຢວນ."
ເບິ່ງແມ, ການພັດທະນາການທ່ອງທ່ຽວບໍ່ພຽງແຕ່ເຮັດໃຫ້ຊາວນາເມືອງຈ່າງເຈ່ຍເຈ້ໄດ້ປ່ຽນແປງຊີວິດການເປັນຢູ່ອັນທຸກຍາກລຳບາກແລະທັດສະນະຄະຕິຮັກສາຄອງເກົ່າເທົ່ານັ້ນ,ຫາກຍັງໄດ້ເຮັດໃຫ້ພວກເຂົາເຈົ້າຮຽນຮູ້ພາສາຕ່າງປະເທດອີກດ້ວຍ.
1 2
|
