|
ຈ່າງເຈ່ຍເຈ້ແມ່ນເຂດທິວທັດທີ່ມີຊື່ສຽງແຫ່ງໜຶ່ງຢູ່ພາກໃຕ້ຈີນ,ພາບວິວທິວທັດທີ່ສວຍງາມໄດ້ດຶງດູດນັກທ່ອງທ່ຽວຈີນແລະຕ່າງປະເທດຈຳນວນຫຼວງຫຼາຍ.ການພັດທະນາ ການທ່ອງທ່ຽວໄດ້ຊ່ອຍໃຫ້ຊາວນາທ້ອງຖິ່ນດັ່ງກ່າວມີລາຍໄດ້ເພີ່ມຂຶ້ນ,ເຮັດໃຫ້ຊີວິດການເປັນຢູ່ຂອງພວກເຂົາເຈົ້ານັບມື້ນັບດີຂຶ້ນ.
ຈ່າງເຈ່ຍເຈ້ຕັ້ງຢູ່ພາກຕາເວັນຕົກສຽງເໜືອຂອງແຂວງຫູນານຈີນ,ມີທັດສະນີຍະພາບຫີ ນກວາດທີ່ຕ່າງໝູ່,ມີລະບົບຊີວະພາບອັນຄົບຖ້ວນແລະພາບວິວທິວທັດອາກາດທີ່ຫຼາຍຮູບຫຼາຍສີ.ເຂດທິວທັດອູລິນຢວນທີ່ປະກອບດ້ວຍຈ່າງເຈ່ຍເຈ້ແລະພາບທິວທັດທຳມະຊາດອີກສອງແຫ່ງຖືກອົງການຢູເນັສໂກຈັດເປັນມໍລະດົກທຳມະຊາດໂລກ.ແຕ່ຊຸມປີ90ສະຕະວັດທີ່ແລ້ວມານີ້,ຜູ້ທີ່ມາທ່ຽວຢູ່ຈ່າງເຈ່ຍເຈ້ໄດ້ເພີ່ມຂຶ້ນເລື້ອຍໆ,ການທ່ອງທ່ຽວໄດ້ມີການພັດທະນາຢ່າງໄວວາ.ຊູ່ມື້ນີ້,ລົດບັສທ່ອງທ່ຽວແລ່ນໄປໆມາໆຢູ່ຕາມທາງຫຼວງຊັ້ນສູງທີ່ໄປຫາຈ່າງເຈ່ຍເຈ້,ຢູ່ສະຖານີລົດໄຟທ້ອງຖິ່ນດັ່ງກ່າວມີຂະບວນລົດໄຟຄົນໂດຍສານ20ຂະບວນເຂົ້າອອກຕໍ່ມື້,ປະລິມານແຂກທ່ອງທ່ຽວທີ່ເຂົ້າອອກເດີນຍົນສາກົນໄດ້ລື່ນກາຍ1ລ້ານເທື່ອຄົນຕໍ່ປີ.
ໃນເມື່ອກ່ອນ,ເສດຖະກິດຂອງຈ່າງເຈ່ຍເຈ້ທີ່ຢູ່ເຂດພູດອຍຫ່າງໄກສອກຫຼີກແມ່ນຫຼ້າຫຼັງທີ່ສຸດ.ຊີວິດການເປັນຢູ່ຂອງພໍ່ແມ່ປະຊາຊົນພັດບໍ່ໄດ້ດີງາມຄືທິວທັດທຳມະຊາດແຫ່ງນັ້ນ.ພາຍຫຼັງການທ່ອງທ່ຽວໄດ້ພັດທະນາແລ້ວ,ຊີວີດການເປັນຢູ່ຂອງຊາວນາ ຈ່າງເຈ່ຍເຈ້ກໍໄດ້ມີການປ່ຽນແປງໄປນຳ.
ແຕ່ລະມື້ພໍ ຟ້າແຈ້ງ,ທ່ານລູຖາງໂຢວ ຊາວນາທີ່ອາຍຸ53ປີກໍໄປຮອດເຂດທິວທັດຫວງສືຈ້າຍຂອງຈ່າງເຈ່ຍເຈ້,ເລີ່ມເຮັດວຽກທັບກ້ອນຫີນປູທາງ.ເຮືອນຂອງພໍ່ເຖົ້າລູຖາງໂຢວຕັ້ງຢູ່ ບ້ານຢູຊີທີ່ຫ່າງຈາກຫວງສືຈ້າຍບໍ່ໄກ.ພໍ່ເຖົ້າເວົ້າວ່າ:ຢູ່ອ້ອມແອ້ມບ້ານຂອງເພິ່ນລ້ວນແຕ່ແມ່ນພູຫີນ,ມີດິນປູກຝັງໜ້ອຍທີ່ສຸດ.ຊາວບ້ານພັນກວ່າຄົນ,ແຕ່ກ່ອນຫາລ້ຽງຊີບໂດຍອາໄສການປູກເຂົ້າສາລີ,ຊີວິດການເປັນຢູ່ທຸກຍາກທີ່ສຸດ.ພໍ່ເຖົ້າເວົ້າວ່າ:"ແຕ່ກ່ອນ,ຄອບຄົວຂ້ອຍຍັງຕ້ອງອາໄສເງິນເກື້ອກູນຂອງອົງການປົກຄອງໄປຊື້ເຂົ້າ,ຄອບຄົວຈຳນວນໜຶ່ງທີ່ມີລູກເຕົ້າຫຼາຍຈົນວ່າບໍ່ສາມາດລ້ຽງກຸ້ມຄອບຄົວໄດ້.ໃນບ້ານມີຄອບຄົວທີ່ທຸກຍາກຢ່າງຫຼວງຫຼາຍ,ລາຍໄດ້ຕໍ່ປີມີແຕ່ຫຼາຍຮ້ອຍຢວນທໍ່ນັ້ນ."
ຕັ້ງແຕ່ຈ່າງເຈ່ຍເຈ້ພັດທະນາການທ່ອງທ່ຽວຢ່າງຄຶກຄັກແລ້ວ,ແຫ່ງນີ້ໄດ້ກໍ່ສ້າງພື້ນຖານໂຄງລ່າງການທ່ອງທ່ຽວຈຳນວນຫຼວງຫຼາຍ,ຕົວຢ່າງຄືສ້າງທາງ,ໂຮງແຮມແລະປູກຕົ້ນໄມ້ຕົ້ນຫຍ້າ,ສ້າງສິ່ງແວດລ້ອມໃຫ້ສວຍງາມແລະອື່ນໆ.ພໍ່ເຖົ້າລູຖາງໂຢວທີ່ມີສີມືດ້ານກໍ່ສ້າງເລີຍໄປເຮັດວຽກປູທາງ,ສ້າງຂົວຢູ່ເທດສະບານເມືອງແລະເຂດທິວທັດ.ຊາວບ້ານອື່ນໆກໍໄດ້ເຮັດວຽກທີ່ກ່ຽວຂ້ອງກັບການທ່ອງທ່ຽວ.ພໍ່ເຖົ້າລູຖາງໂຢວບອກນັກຂ່າວວ່າ:"ຊາວບ້ານທັງຫຼາຍ,ບາງຄົນປູກຕົ້ນໄມ້,ບາງຄົນປູກດອກໄມ້,ບາງຄົນເຮັດວຽກປຸກເຮືອນມຸງດິນຂໍ,ບາງຄົນຍັງເຮັດວຽກເລັກໆນ້ອຍໆໃຫ້ຜູ້ອື່ນ."
ຕັ້ງແຕ່ເຮັດວຽກກ່ຽວກັບການທ່ອງທ່ຽວແລ້ວ,ພວກຊາວນາມີລາຍໄດ້ເພີ່ມຂຶ້ນບໍ່ໜ້ອຍ.ດຽວນີ້,ລາຍໄດ້ສະເລ່ຍຕາມຫົວຄົນຕໍ່ປີຂອງບ້ານຢູຊີໄດ້ເພີ່ມຂຶ້ນຫຼາຍກວ່າເມື່ອກ່ອນ10ເທົ່າຂຶ້ນໄປ,ຄອບຄົວສ່ວນຫຼາຍໄດ້ປຸກເຮືອນໃໝ່.
ໃນເມື່ອກ່ອນ,ຍ້ອນເສດຖະກິດຫຼ້າຫຼັງ,ຊາວນາຈຳນວນບໍ່ໜ້ອຍຂອງຈ່າງເຈ່ຍເຈ້ລ້ວນແຕ່ໄດ້ອອກຈາກບ້ານໄປເຮັດວຽກຢູ່ນອກເພື່ອຫາເງິນ,ຊູ່ມື້ນີ້,ການພັດທະນາ ການທ່ອງທ່ຽວໄດ້ຊັກຈູງການພັດທະນາຂອງຜະລິດຕະກຳທີສາມຂອງທ້ອງຖິ່ນດັ່ງກ່າວ.ໂອກາດຫາເງິນນັບມື້ນັບຫຼາຍ,ຊາວນາຫຼວງຫຼາຍທີ່ອອກໄປເຮັດວຽກຢູ່ຕ່າງຖິ່ນນັ້ນໄດ້ກັບຄືນສູ່ບ້ານ.ລູກກົກຂອງພໍ່ເຖົ້າລູຖາງໂຢວແຕ່ກ່ອນເຄີຍໄປເຮັດວຽກຢູ່ເຂດແຄມທະເລ,ດຽວນີ້ລາວໄດ້ກັບຄືນມາເຮັດວຽກຢູ່ໂຮງແຮມຫຼັງໜຶ່ງ.
1 2
|
