|
ຄຽງຄູ່ກັບງານກິລາໂອລິມປິກອາແຕນໄດ້ສິ້ນສຸດລົງ,ງານກິລາໂອລິມປິກປັກກິ່ງປີ2008 ກໍ່ມໍ່ເຂົ້າຊັກໃຊ້. ທ່ານຊາມາຣານສ໌ ອະດີດປະທານຄະນະກຳມະການໂອລິມປິກສາກົນເຄີຍເວົ້ານຳປັກກິ່ງທີ່ເຕັມໄປດ້ວຍຄວາມຈິງໃຈແລະມີຄວາມໝາຍອັນເລິກເຊິ່ງວ່າ, ຄັນຢາກ ຈັດງານກິລາໂອລິມປິກໃຫ້ສຳເລັດຜົນ, ນອກຈາກຕ້ອງເຮັດວຽກງານຈັດຕັ້ງໃຫ້ດີແລ້ວ, ນັກກິລາປະເທດເຈົ້າພາບຊິງໄດ້ຜົນເດັ່ນກໍ່ແມ່ນປັດໄຈໜຶ່ງທີ່ຂາດບໍ່ໄດ້. ບໍ່ຕ້ອງສົງໄສເລີຍວ່າ ຄຳເວົ້າຂອງທ່ານຊາມາຣານສ໌ເປັນຄຳເຕືອນວົງການກິລາຈີນ, ກໍ່ເປັນຄຳຊຸກຍູ້ຈີນ. ຫວ່າງມໍ່ໆນີ້ຢູ່ທີ່ປັກກິ່ງ ທ່ານລິວເຜິງ ຫົວໜ້າກົມໃຫຍ່ກິລາແຫ່ງຊາດຈີນກ່າວວ່າ, ການຊິງໄດ້ຜົນ ເດັ່ນໃນງານກິລາໂອລິມປິກປັກກິ່ງປີ 2008, ແມ່ນຄາດໝາຍທີ່ວົງການກິລາຈີນຕ້ອງສຳເລັດ.
ແຕ່ວັນທີ 3 ຮອດວັນທີ 4 ກຸມພາປີ 2005, ກອງປະຊຸມຫົວໜ້າພະແນກກິລາທົ່ວປະເທດຈີນໄດ້ໄຂຂຶ້ນຢູ່ທີ່ປັກກິ່ງ, ໃນກອງປະຊຸມ, ທ່ານລິວເຜິງ ຫົວໜ້າກົມໃຫຍ່ກິລາແຫ່ງຊາດຈີນກ່າວວ່າ, ວຽກງານກະກຽມງານກິລາໂອລິມປິກປີ 2008 ຂອງວົງການກິລາຈີນໄດ້ເລີ່ມດຳເນີນຢ່າງຮອບດ້ານໃນຕົ້ນປີນີ້. ການຊິງເອົາຜົນເດັ່ນໃນງານກິລາໂອລິມປິກປັກກິ່ງປີ 2008, ແມ່ນຄາດໝາຍທີ່ວົງການກິລາຈີນຕ້ອງສຳເລັດ. ທ່ານເວົ້າວ່າ:
"ງານກິລາໂອລິມປິກປັກກິ່ງປີ 2008 ໃກ້ຈະມາເຖິງແລ້ວ,ການຊິງເອົາຜົນເດັ່ນໃນງານກິລາໂອລິມປິກປັກກິ່ງ, ແມ່ນຄວາມຫວັງຢ່າງແຮງກ້າຂອງປະຊາຊົນຈີນທົ່ວປະເທດ,ແມ່ນໜ້າທີ່ຮັບຜິດຊອບທາງປະຫວັດສາດຂອງລະບົບກິລາຈີນທີ່ເຂົ້າແທນບໍ່ໄດ້,ກໍ່ແມ່ນໜຶ່ງໃນປັດໄຈຂໍກະແຈທີ່ງານກິລາໂອລິມປິກປັກກິ່ງຈະສຳເລັດຜົນຫຼືບໍ່."
ໃນງານກິລາໂອລິມປິກອາແຕນ, ຄະນະນັກກິລາຈີນຊິງໄດ້ຫຼຽນຄຳ 32 ຫຼຽນ, ເປັນທີ 2 ໃນຕາລາງຫຼຽນຄຳ. ໃນງານກິລາໂອລິມປິກປັກກິ່ງ, ປະຊາຊົນຍ່ອມຈະມີຄວາມຫວັງສູງກວ່າເກົ່າຢ່າງແນ່ນອນ, ການເຮັດແນວໃດຈຶ່ງຈະຊິງໄດ້ຜົນງານທີ່ໜ້າເພິ່ງພໍໃຈໃນງານກິລາໂອລິມປິກປັກກິ່ງ? ທ່ານລິວເຜິງໄດ້ເປີດເຜີຍໂຄງຄວາມຄິດສັງລວມໃນວຽກງານກະກຽມຂອງວົງການກິລາຈີນໃນ 4 ປີຂ້າງໜ້າ. ທ່ານເວົ້າວ່າ:
"ພວກຂ້າພະເຈົ້າຈະພະຍາຍາມເຮັດວຽກໃຫ້ດີ ແລະຍາດແຍ່ງ ຜົນດີໃນວຽກງານ, ເຮັດໃຫ້ລາຍການທ່າແຮງຂອງພວກຂ້າພະເຈົ້າສືບຕໍ່ມີທ່າແຮງໃນ 4 ປີຂ້າງໜ້າ, ລາຍການທີ່ມີຄວາມສາມາດບົ່ມຊ້ອນຈະພະຍາຍາມຊິງໄດ້ຫຼຽນຄຳຫຼາຍກວ່າເກົ່າ, ເຕັກນິກການແຂ່ງຂັນຂອງບານປະເພດຮວມໝູ່ຕ້ອງຍົກລະດັບໃຫ້ສູງຂຶ້ນຢ່າງເດັ່ນຊັດ, ລາຍການທີ່ມີຄວາມສາມາດທຳມະດາແລະລາຍການຫຼ້າຫຼັງຕ້ອງມີຄວາມກ້າວໜ້າໃໝ່."
ຕາມແຜນກະກຽມທີ່ທ່ານລິວເຜິງບັນຍາຍ,ການຂຸດຄົ້ນລາຍການທ່າແຮງໃໝ່ບົນພື້ນຖານລາຍການທ່າແຮງດັ້ງເດີມແນວໃດນັ້ນ,ແມ່ນຂໍກະແຈທີ່ຄະນະນັກກິລາຈີນຈະຊິງໄດ້ຫຼຽນຄຳຫຼາຍກວ່າເກົ່າໃນງານກິລາໂອລິມປິກປັກກິ່ງຫຼືບໍ່ນັ້ນ,ນີ້ກໍ່ແມ່ນບັນຫາຈຸດຮ້ອນທີ່ເຈົ້າໜ້າທີ່ຊັ້ນສູງຂອງວົງການກິລາຈີນຫາລືກັນໃນປະຈຸບັນ.
1 2
|
