|
ນາຍົກຈີນກັບຍີ່ປຸ່ນພ້ອມກັນເຂົ້າຮ່ວມງານລ້ຽງຮັບຮອງລະລຶກສາຍພົວພັນການທູດຈີນຍີ່ປຸ່ນເຂົ້າສູ່ສະພາບປົກກະຕິຄົບຮອບ 35 ປີທີ່ອົງການຈັດຕັ້ງມິດຕະພາບຍີ່ປຸ່ນຈີນຈັດຂຶ້ນ
cri
Author: cai
ຕາມຂ່າວCRI:ວັນທີ 12 ເມສານີ້,ທ່ານເວີ່ນເຈ່ຍປາວ ນາຍົກລັດຖະມົນຕີຈີນກັບທ່ານຊີນໂຈ ອາເບ ນາຍົກລັດຖະມົນຕີຍີ່ປຸ່ນໄດ້ພ້ອມກັນເຂົ້າຮ່ວມງານລ້ຽງຮັບຮອງລະລຶກສາຍພົວພັນການທູດຈີນຍີ່ປຸ່ນເຂົ້າສູ່ສະພາບປົກກະຕິຄົບຮອບ 35 ປີທີ່ອົງການຈັດຕັ້ງມິດຕະພາບຍີ່ປຸ່ນຈີນຂອງຍີ່ປຸ່ນຈັດຂຶ້ນ.
ໃນງານລ້ຽງ,ທ່ານເວີ່ນເຈ່ຍປາວກ່າວວ່າ,ການປັບປຸງແລະຂະຫຍາຍການພົວພັນລະຫວ່າງຈີນກັບຍີ່ປຸ່ນຕ້ອງອາໄສຄວາມພະຍາຍາມຂອງລັດຖະບານສອງປະເທດ,ອາໄສການຕັດສິນຊີ້ຂາດຂອງນັກການເມືອງ,ແຕ່ວ່າ,ມີແຕ່ມິດຕະພາບລະຫວ່າງຈີນກັບຍີ່ປຸ່ນມີພື້ນຖານອັນໝັ້ນແກ່ນໃນໝູ່ປະຊາຊົນທໍ່ນັ້ນ,ມິດຕະພາບໃນດວງໃຈຂອງປະຊາຊົນຈຶ່ງໝັ້ນຄົງຖາວອນ.ທ່ານຊີນໂຈ ອາເບກ່າວຄຳປາໄສວ່າ,ໃນການພົບປະເຈລະຈາກັບທ່ານນາຍົກເວີ່ນເຈ່ຍປາວ,ທ່ານທັງສອງໄດ້ມີຄວາມຮັບຮູ້ອັນສຳຄັນຫຼາຍຂໍ້ທີ່ເປັນເອກະສັນກັນ,ນີ້ໝາຍຄວາມວ່າ,ການພົວພັນລະຫວ່າງສອງປະເທດໄດ້ຢ່ວງບາດກ້າວໃໝ່ໄປສູ່ທິດສ້າງການພົວພັນຄູ່ຮ່ວມມືຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງຍີ່ປຸ່ນກັບຈີນ.ທ່ານກ່າວວ່າ,ຈະພ້ອມກັນກັບຝ່າຍຈີນ,ອອກແຮງສຸດຂີດເພື່ອຂະຫຍາຍການພົວພັນລະຫວ່າງຍີ່ປຸ່ນກັບຈີນ.
ເພື່ອລະລຶກສາຍພົວພັນການທູດຍີ່ປຸ່ນຈີນເຂົ້າສູ່ສະພາບປົກກະຕິຄົບຮອບ 35 ປີ,ລັດຖະບານຍີ່ປຸ່ນແລະຈີນຕົກລົງຈັດປີແລກປ່ຽນວັດທະນະທຳແລະກິລາຍີ່ປຸ່ນຈີນ.ມື້ດຽວກັນ,ທ່ານເວີ່ນເຈ່ຍປາວກັບທ່ານຊີນໂຈ ອາເບຍັງໄດ້ພ້ອມກັນເຂົ້າຮ່ວມພິທີໄຂກິດຈະກຳປີແລກປ່ຽນວັດທະນທຳແລະກິລາຈີນຍີ່ປຸ່ນຂອງຝ່າຍຈີນ.
|
|
