|
ສປປເກົາຫລີຮຽກຮ້ອງໃຫ້ອາເມລິກາປ່ຽນແປງທ່າທີໃນການເຈລະຈາ 6 ຝ່າຍ
cri
Author: mo
ຕາມຂ່າວສານຊີນຮວາ: ວັນທີ 13 ມີນາ, ໜັງສືພິມໂລດົງຊິນມູນ ສຽງຂອງສູນກາງພັກແຮງງານເກົາຫຼີພິມບົດວິຈານວ່າ, ອາເມລິກາໄດ້ໃຊ້ທ່າທີແບບສອງໜ້າຕໍ່ການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫລີ. ຖ້າອາເມລິກາບບໍ່ປ່ຽນແປງທ່າທີດັ່ງກ່າວ, ບໍ່ປະລະນະໂຍບາຍເປັນປໍລະປັກຕໍ່ສປປເກົາຫລີ, ການເຈລະຈາ 6 ຝ່າຍກໍບໍ່ອາດຈັດຂຶ້ນຄືນໃໝ່ໄດ້, ບັນຫານິວເຄຼຍກໍບໍ່ສາມາດໄດ້ຮັບການແກ້ໄຂ.
ບົດວິຈານຊີ້ອອກວ່າ, ເມື່ອສັງເກດຈາກສະພາບການເຈລະຈາ 6 ຝ່າຍຫຼາຍເທື່ອໃນເມື່ອກ່ອນແລ້ວເຫັນວ່າ, ການເຈລະຈາໄດ້ຮັບຄວາມຄືບໜ້າເທື່ອໃດ, ຫຼືສປປເກົາຫລີວາງຂໍ້ສະເໜີໃໝ່ເທື່ອໃດ, ອາເມລິກາກໍຈະສະເໜີບັນຫາຕ່າງໆແບບບໍ່ມີຫາໃສ່ເຊັ່ນ"ສິດທິມະນຸດ", "ເຮັດເງິນປອມ" ແລະ"ການຄ້າຢາເສບຕິດ"ເປັນຕົ້ນ, ມາກະຕຸກສປປເກົາຫລີ, ສາດນ້ຳເຢັນໃສ່ການເຈລະຈາ, ຂັດຂວາງບໍ່ໃຫ້ການເຈລະຈາມີຄວາມຄືບໜ້າຕື່ມອີກ. ການກະທຳຂອງອາເມລິກາເຫຼົ່ານີ້ສະແດງໃຫ້ເຫັນວ່າ, ເຖິງວ່າໃນທາງນອກ, ມັນເປີດປ່າວໃຫ້ຈັດການເຈລະຈາ 6 ຝ່າຍຄືນໃໝ່, ແຕ່ທີ່ຈິງແລ້ວ, ພັດບໍ່ຢາກແກ້ໄຂບັນຫານິວເຄຼຍແຫຼມເກົາຫລີດ້ວຍວິທີການປຶກສາຫາລືກັນ.
ບົດວິຈານກ່າວລື້ມວ່າ, ການບັນລຸໃຫ້ແຫຼມເກົາຫລີປອດນິວເຄຼຍແມ່ນຈຸດໝາຍສຸດທ້າຍຂອງສປປເກົາຫລີ, ສປປເກົາຫລີໄດ້ທຳຄວາມພະຍາຍາມຕະຫຼອດມາເພື່ອເຮັດໃຫ້ແຫຼມເກົາຫລີປອດນິວເຄຼຍໂດຍຜ່ານການສົນທະນາແລະຫາລືກັນ.
|
|
