|
|
 |
| (GMT+08:00)
2007-11-17 17:21:04
|
 |
|
ບັນຫາສິ່ງແວດລ້ອມແລະສະພາບສິ່ງແວດລ້ອມຂອງຈີນຍ່ອມຈະໄດ້ຮັບການປັບປຸງໃຫ້ດີຂຶ້ນຕື່ມອີກຢ່າງແນ່ນອນ
cri
Author: MO
ຕາມຂ່າວຈາກໜັງສືພິມເຢີນມິນຢື້ປ້າວສະບັບຕ່າງປະເທດ: ຫວ່າງມໍ່ໆນີ້, ຢູ່ທີ່ປັກກິ່ງ, ທ່ານໂຈວເສິ່ງສຽນ ຫົວໜ້າກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນກ່າວວ່າ, ໂດຍມີວົງການຕ່າງໆໃນສັງຄົມຮ່ວມກັນພະຍາຍາມ, ບັນຫາສິ່ງແວດລ້ອມແລະສະພາບສິ່ງແວດລ້ອມຂອງຈີນຍ່ອມຈະໄດ້ຮັບການປັບປຸງໃຫ້ດີຂຶ້ນຕື່ມຢ່າງແນ່ນອນ.
ໃນເວລາພົບປະທ່ານຮາລູຮິໂຄ ຄູໂລດາ ຜູ້ວ່າການທະນາຄານພັດທະນາອາຊີ, ທ່ານໂຈວເສິ່ງສຽນແນະນຳວ່າ, ແຕ່ປີກາຍນີ້ມາ, ລັດຖະບານຈີນໄດ້ວາງ"ແຜນການແຫ່ງລັດກ່ຽວກັບການຮັບມືກັບການປ່ຽນແປງຂອງດິນຟ້າອາກາດ", ແລະ"ແຜນການວຽກງານສັງລວມກ່ຽວກັບການປະຢັດພະລັງງານແລະຫຼຸດການລະບາຍອາຍເຮືອນແກ້ວ". ປັດຈຸບັນ, ນະໂຍບາຍແລະມາດຕະການຕ່າງໆພວມໄດ້ຮັບການຈັດຕັ້ງປະຕິບັດ, ວຽກງານອະນຸລັກສິ່ງແວດລ້ອມຕ່າງໆໄດ້ຮັບຄວາມຄືບໜ້າຢ່າງຕັ້ງໜ້າ. ພ້ອມກັນນັ້ນ, ໂດຍປະເຊີນກັບສະຖານະການເຊື່ອມພິດນ້ຳທີ່ຂ້ຽວຂາດ, ລັດຖະບານຈີນໄດ້ສະເໜີ"ໃຫ້ແມ່ນ້ຳລຳເຊແລະທະເລພັກຜ່ອນ", ແລະຈະເຮັດວຽກປັບປຸງສະພາບແວດລ້ອມໃນໜອງຈຸດໜັກແລະປ້ອງກັນການເຊື່ອມພິດລ້ອງແມ່ນ້ຳຈຸດໜັກໃຫ້ດີ.
ທ່ານໂຈວເສີ່ງສຽນກ່າວວ່າ, ຄວາມກ້າວໜ້າຂອງວຽກງານອະນຸລັກສິ່ງແວດລ້ອມຂອງຈີນຕ້ອງຜ່ານການເພີ່ມທະວີການຮ່ວມມືລະຫວ່າງຊາດ, ແລະຖອດຖອນທັດສະນະຄະຕິແລະເຕັກນິກໃນການອະນຸລັກສິ່ງແວດລ້ອມທີ່ກ້າວໜ້າ. ຈີນຍິນດີພົວພັນກັບທະນາຄານພັດທະນາອາຊີຢ່າງໃກ້ຊິດຕື່ມອີກ, ດຳເນີນການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດໃນຂົງເຂດສິ່ງແວດລ້ອມ, ຮ່ວມກັນຊຸກຍູ້ວຽກງານສິ່ງແວດລ້ອມໃຫ້ກ້າວໄປໜ້າ.
ທ່ານຮາລູຮິໂຄ ຄູໂລດາຍ້ອງຍໍກົມໃຫຍ່ອະນຸລັກສິ່ງແວດລ້ອມຂອງຈີນທີ່ເອົາໃຈໃສ່ນຳການຮ່ວມມືກັບທະນາຄານພັດທະນາອາຊີ, ຫວັງໃຫ້ສອງຝ່າຍປະສານສົມທົບກັນຢ່າງໃກ້ຊິດໃນຕໍ່ໜ້າ, ເພີ່ມທະວີການຮ່ວມມືໃນຂົງເຂດຕ່າງໆເຊັ່ນຄົ້ນຄວ້າຍຸດທະສາດມະຫາພາກດ້ານສິ່ງແວດລ້ອມ, ພະລັງງານທີ່ສະອາດ, ປະຢັດພະລັງງານແລະຫຼຸດການລະບາຍອາຍເຮືອນແກ້ວເປັນຕົ້ນ.
|
|
|
