|
|
 |
| (GMT+08:00)
2006-02-07 18:18:09
|
 |
|
ຂະແໜງການອະນຸລັກສິ່ງແວດລ້ອມຂອງຈີນເລີ່ມກວດກາຄວາມສ່ຽງດ້ານສິ່ງແວດລ້ອມຕໍ່ວິສາຫະກິດອຸດສາຫະກຳເຄມີ
cri
Author: mo
ຕາມຂ່າວCRI: ເພື່ອຫຼີກເວັ້ນບໍ່ໃຫ້ເຫດການເຊື່ອມພິດສີ່ງແວດລ້ອມອັນໜັກໜ່ວງທີ່ຄ້າຍຄືກັນກັບເຫດການເຊື່ອມພິດແມ່ນ້ຳຊົງຮວາຈຽງເກີດຂຶ້ນອີກ, ວັນທີ 7 ກຸມພາ, ກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນໄດ້ເລີ່ມດຳເນີນການກວດກາຄວາມສ່ຽງດ້ານສິ່ງແວດລ້ອມຕໍ່ວິສາຫະກິດອຸດສາຫະກຳເຄມີຈຸດໜັກ 100 ກວ່າແຫ່ງໃນທົ່ວປະເທດ.
ວິສາຫະກິດອຸດສາຫະກຳເຄມີເຫຼົ່ານີ້ແຈກຢາຍຢູ່ມໍ່ເຂດສະດຸ້ງໄວຂອງສິ່ງແວດລ້ອມເຊັ່ນແຄມຝັ່ງແມ່ນ້ຳ ບຶງໜອງແລະທະເລ, ເຂດທີ່ມີປະຊາກອນໜາແໜ້ນ, ແລະເຂດສະຫງວນທຳມະຊາດເປັນຕົ້ນ, ໄດ້ກ່ຽວພັນເຖິງ 25 ແຂວງ ເຂດປົກຄອງຕົນເອງແລະກຳແພງນະຄອນ, ຍອດມູນຄ່າການລົງທຶນເກືອບ 450 ຕື້ຢວນ. ກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນກ່າວວ່າ, ຕໍ່ວິສາຫະກິດທີ່ມີຄວາມສ່ຽງດ້ານສິ່ງແວດລ້ອມອັນໜັກໜ່ວງແຝນຊ້ອນຢູ່ທີ່ພົບເຫັນໃນການກວດການັ້ນ, ຈະຮຽກຮ້ອງໃຫ້ປັບປຸງຕາມເວລາກຳນົດ. ພອມກັນນັ້ນ, ເພື່ອຮັບປະກັນສິດຮູ້ສະພາບການດ້ານສິ່ງແວດລ້ອມຂອງສາທາລະນະຊົນ, ແລະສ້າງຄວາມສະດວກໃຫ້ແກ່ມວນຊົນຕິດຕາມກວດກາ, ກົມໃຫຍ່ອະນຸລັກສິ່ງແວດລ້ອມຈະເປີດເຜີຍຂໍ້ມູນຂ່າວສານຂອງການກວດກາໃຫ້ສັງຄົມຊາບ.
ເດືອນພະຈິກປີກາຍນີ້, ໂຮງງານເຄມີຫຼັງໜຶ່ງຂອງແຂວງຈີລີນ ພາກຕາເວັນອອກສຽງເໜືອຂອງຈີນໄດ້ເກີດການລະເບີດ, ວັດຖຸເຊື່ອມພິດເຊັ່ນປະເພດເບັນແຊນຈຳນວນຫຼວງຫຼາຍໄດ້ຮົ່ວໄຫຼເຂົ້າແມ່ນ້ຳຊົງຮວາຈຽງ, ພາໃຫ້ເກີດເຫດການເຊື່ອມພິດນ້ຳຢ່າງໜັກໜ່ວງ.
|
|
|
