ນາຍົກໄທ ຕ້ອນຮັບເອກອັກຄະລັດຖະທູດຈີນປະຈຳໄທ
-----------------------------------------------------------------------------------------------------------------
ຕາມຂ່າວCRI: ວັນທີ 18 ທັນວານີ້ ,ຢູ່ທີ່ນະຄອນຫຼວງບາກກອກຂອງໄທ, ທ່ານອະພິສິດ ເວດຊາຊີວະ ນາຍົກລັດຖະມົນຕີໄທໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຈັ່ງຈິວຮວນ ເອກອັກຄະລັດຖະທູດຈີນປະຈຳໄທ, ທ່ານເອກອັກຄະລັດຖະທູດຈັ່ງຈິວຮວນ ມອບໂທລະເລກອວຍພອນຂອງທ່ານເວີ່ນເຈ່ຍປາວ ນາຍົກລັດຖະມົນຈີນໃຫ້ທ່ານອະພິສິດ ເວດຊາຊີວ.
ໃນໂທລະເລກອວຍພອນ, ທ່ານເວີ່ນເຈ່ຍປາວກ່າວວ່າ, ຍິນດີຮ່ວມກັນກັບທ່ານອະພິສິດທຳຄວາມພະຍາຍາມຮ່ວມກັນ, ຊຸກຍູ້ໃຫ້ການຮ່ວມມືທາງຍຸດທະສາດລະຫວ່າງສອງປະເທດໄດ້ຮັບຄວາມຄືບຫນ້າໃຫມ່ຢ່າງບໍ່ຢຸດຢັ້ງ, ປະກອບສ່ວນອັນຕັ້ງຫນ້າເຂົ້າໃນສັນຕິພາບ ຄວາມຫມັ້ນຄົງແລະຈະເລີນຮຸ່ງເຮືອງໃນພາກພື້ນນີ້.
ທ່ານອະພິສິດ ສະແດງຄວາມຂອບອົກຂອບໃຈຕໍ່ຄຳອວຍພອນຂອງທ່ານເວີ່ນເຈ່ຍປາວ. ທ່ານໄດ້ຍ້ອງຍໍຊົມເຊີຍຜົນສຳເລັດຂອງຈີນທີ່ໄດ້ຮັບນັບແຕ່ປະຕິຮູບແລະເປີດປະຕູສູ່ພາຍນອກໃນ 30 ປີມານີ້. ທ່ານອະພິສິດ ກ່າວວ່າ, ລັດຖະບານໄທຍິນດີຮ່ວມກັນກັບລັດຖະບານຈີນ, ສືບຕໍ່ຊຸກຍູ້ ການພົວພັນລະຫວ່າງຈີນກັບໄທໃຫ້ຂະຫຍາຍຕົວຢ່າງບໍ່ຢຸດຢັ້ງ, ເພີ່ມທະວີການຮ່ວມມືກັນທາງຍຸດທະສາດລະຫວ່າງສອງຝ່າຍໃນຂົງເຂດຕ່າງໆ, ສ້າງຄວາມຜາສຸກໃຫ້ແກ່ປະຊາຊົນທັງສອງປະເທດ,ແລະ ປະກອບສ່ວນອັນຕັ້ງຫນ້າເຂົ້າໃນສັນຕິພາບແລະການພັດທະນາຂອງພາກພື້ນແລະໂລກ.
