ທ່ານຫູຈີນທາວເລີ່ມຢ້ຽມຢາມອາເມລິກາແລະເອີລົບ
-----------------------------------------------------------------------------------------------------------------
ວັນທີ 14 ພະຈິກນີ້, ທ່ານຫູຈີນທາວ ປະທານປະເທດຈີນໄດ້ເດີນທາງອອກຈາກປັກກິ່ງ, ເລີ່ມຢ້ຽມຢາມຕ່າງປະເທດເປັນເວລາສອງອາທິດ. ໃນໄລຍະຢ້ຽມຢາມ, ທ່ານຫູຈີນທາວຈະເຂົ້າຮ່ວມກອງປະຊຸມສຸດຍອດຂອງກຸ່ມ 20 ປະເທດຫຼືຈີ20, ກອງປະຊຸມສຸດຍອດຜູ້ນຳອົງການເອເບັກ,ແລະຈະໄປຢ້ຽມຢາມກົສຕາລີກາ, ກູບາ, ເປຣູແລະເກຼັກ. ການໄປຢ້ຽມຢາມຂອງຜູ້ນຳສູງສຸດຂອງຈີນເທື່ອນີ້ບໍ່ພຽງແຕ່ຈະສະແດງຫຼັກໝັ້ນແລະຈຸດຢືນຂອງຈີນຕໍ່ບັນຫາສຳຄັນຂອງສາກົນ, ເຊັ່ນ ວິກິດການການເງິນແລະອື່ນໆ, ພ້ອມທັງຈະເປັນການຂະຫຍາຍການພົວພັນສອງຝ່າຍລະຫວ່າງຈີນກັບປະເທດທີ່ກ່ຽວຂ້ອງໃນອະນາຄົດ.
ນະຄອນຫຼວງວໍຊິງຕັນຂອງອາເມລິກາແມ່ນແຫ່ງທຳອິດທີ່ທ່ານຫູຈີນທາວຈະເດີນທາງໄປຮອດເທື່ອນີ້. ຕອນເຊົ້າວັນທີ 15 ພະຈິກເວລາທ້ອງຖິ່ນ, ກອງປະຊຸມຕະຫຼາດການເງິນກຸ່ມ 20 ປະເທດແລະກອງປະຊຸມສຸດຍອດເສດຖະກິດໂລກຈະຈັດຂຶ້ນຢູ່ບ່ອນນັ້ນ. ໃນຖານະເປັນປະເທດພວມພັດທະນາທີ່ໃຫຍ່ກວ່າໝູ່, ຫຼັກໝັ້ນແລະທ່າທີຂອງຈີນໃນກອງປະຊຸມຈະໄດ້ຮັບຄວາມສົນໃຈເປັນພິເສດ.
ຫວ່າງມໍ່ໆນີ້, ທ່ານເຮີຢ້າເຟີຍ, ລັດຖະມົນຕີຊ່ອຍວ່າການກະຊວງການຕ່າງປະເທດຈີນໄດ້ແຈ້ງຈຸດຢືນພື້ນຖານຂອງຈີນໃນກອງປະຊຸມສຸດຍອດຕໍ່ວິທະຍຸພວກເຮົາ, ທ່ານກ່າວວ່າ:
"ພວກເຮົາຕ້ອງເອົາໃຈໃສ່ນຳສະພາບການຂອງປະເທດທີ່ພວມພັດທະນາ, ໂດຍສະເພາະປະເທດທີ່ດ້ອຍພັດທະນາກວ່າໝູ່. ພວກເຮົາກໍ່ຈະກ່າວເນັ້ນວ່າ, ຝ່າຍຕ່າງໆຕ້ອງຮັບຜິດຊອບ, ສົມມຸດວ່າ, ໃນເວລາປະຕິບັດນະໂຍບາຍເສດຖະກິດມະຫາພາກ, ປະເທດທີ່ພັດທະນາແລ້ວທີ່ສຳຄັນຕ້ອງພິຈາລະນາຜົນສະທ້ອນຕໍ່ເສດຖະກິດໂລກ, ແລະຜົນສະທ້ອນຕໍ່ປະເທດອື່ນໆ, ໂດຍສະເພາະແມ່ນປະເທດທີ່ພວມພັດທະນາ."
ທ່ານກ່າວວ່າ, ຈີນເຫັນວ່າ, ກອງປະຊຸມສຸດຍອດແມ່ນການເລີ່ມຕົ້ນອັນດີງາມທີ່ປະເທດສຳຄັນໃນໂລກປະສານສົມທົບເປັນເອກະສັນກັນຮັບມືກັບການທ້າທາຍ, ປະເທດຮ່ວມປະຊຸມຄວນໃຊ້ມາດຕະການໄລຍະສັ້ນເພື່ອຟື້ນຟູຄວາມໝັ້ນໃຈຕໍ່ຕະຫຼາດ, ເພີ່ມທະວີການຕິດຕາມຄຸ້ມຄອງການເງິນ, ພ້ອມທັງພິຈາລະນາແລະວາງແຜນຕໍ່ການປະຕິຮູບລະບົບການເງິນສາກົນ.
ທ່ານເຮີຢ້າເຟີຍກ່າວເນັ້ນວ່າ, ຝ່າຍຕ່າງໆທີ່ກ່ຽວຂ້ອງຄວນວາງແຜນການການປະຕິຮູບລະບົບການເງິນສາກົນດ້ວຍທ່າທີເປີດກວ້າງ,ແລະຄວນຮັບຮູ້ວ່າ, ການປະຕິຮູບນີ້ບໍ່ແມ່ນຈະສຳເລັດຜົນໃນບາດດຽວໂລກ,ຕ້ອງໃຊ້ເວລາຍາວນານ.
"ຈີນຫວັງໃຫ້ດຳເນີນການປະຕິຮູບທີ່ບັງເກິດຜົນຮອບດ້ານຕໍ່ລະບົບການເງິນສາກົນໂດຍຜ່ານການເປິກສາຫາລືຢ່າງຈິງຈັງ, ເພື່ອສ້າງລະບົບການເງິນສາກົນທີ່ຍຸດຕິທຳ, ຜ່ອນສັ້ນຜ່ອນຍາວແລະເປັນລະບົບ."
ນັບແຕ່ວັນທີ 22 ຫາວັນທີ 23 ພະຈິກນີ້, ກອງປະຊຸມທີ່ບໍ່ເປັນທາງການຂອງຜູ້ນຳອົງການເອເປັກເທື່ອທີ 16 ຈະຈັດຂຶ້ນຢູ່ເປຣູ. ໂດຍປະເຊີນໜ້າກັບວິກິດການການເງິນທີ່ກະທົບທົ່ວໂລກ, ແລະບັນຫາສຳຄັນຕ່າງໆທີ່ນັບມື້ນັບໜັກໜ່ວງຂຶ້ນ, ເຊັ່ນ: ຄວາມປອດໄພຂອງອາຫານແລະພະລັງງານ ເປັນຕົ້ນ, ກອງປະຊຸມເວທີປາໄສເສດຖະກິດທີ່ສຳຄັນກວ່າໝູ່ໃນພາກພື້ນອາຊີປາຊິຟິກຈະໃຫ້ຄຳໝັ້ນສັນຍາໃໝ່ແກ່ການພັດທະນາອາຊີປາຊິຟິກແນວໃດນັ້ນ, ທຸກຝ່າຍສົນໃຈນໍາຫລາຍ, ໃນຖານະເປັນໜຶ່ງໃນສະມາຊິກທີ່ສຳຄັນ, ທັດສະນະຂອງຈີນກໍ່ຈະເຮັດໃຫ້ຝ່າຍຕ່າງໆສົນໃຈນຳຄືກັນ. ຫວ່າງມໍ່ໆນີ້, ທ່ານເຮີຢ້າເຟີ່ຍ ລັດຖະມົນຕີຊ່ອຍວ່າການກະຊວງການຕ່າງປະເທດຈີນກ່າວວ່າ:
"ໃນກອງປະຊຸມຜູ້ນຳທີ່ບໍ່ເປັນທາງການ, ທ່ານປະທານຫູຈີນທາວຈະສະແດງທັດສະນະແລະຈຸດຢືນຂອງຈີນທີ່ມີຕໍ່ບັນຫາສຳຄັນຕ່າງໆໃນປະຈຸບັນ, ເຊັ່ນ: ສະພາບການເສດຖະກິດການເງິນສາກົນແລະຄວາມປອດໄພດ້ານອາຫານແລະພະລັງງານ, ແລະຈະສະເໜີຂໍ້ລິເລີ່ມຕໍ່ການຊຸກຍູ້ການຮ່ວມມືໃນຂົງເຂດຕ່າງໆຂອງອົງການເອເບັກ". ໃນກອງປະຊຸມສົນທະນາລະຫວ່າງຜູ້ນຳກັບຜູ້ແທນຄະນະກຳມະການບໍລິຫານງານທີ່ເປິກສາອຸດສາຫະກຳການຄ້າຂອງອົງການເອເປັກ, ທ່ານປະທານຫູຈີນທາວຈະລົງເລິກແລກປ່ຽນຄວາມເຫັນກັບວົງການອຸດສາຫະກຳການຄ້າກ່ຽວກັບບັນຫາຕ່າງໆທີ່ວົງການຕ່າງໆເອົາໃຈໃສ່ໃນລະດັບສູງ, ເຊັ່ນ: ເສດຖະກິດແລະການເງິນເປັນຕົ້ນ."
ເມື່ອທຽບໃສ່ກອງປະຊຸມສຸດຍອດສອງຄັ້ງນີ້, ທ່ານຫູຈີນທ່າວໄປຢ້ຽມຢາມສາມປະເທດອາເມລິກາລາຕິນແລະເກຼັກເທື່ອນີ້ກໍ່ເປັນໜ້າເອົາໃຈໃສ່ຄືກັນ. ກະຊວງການຕ່າງປະເທດຈີນເຜີຍໃຫ້ຮູ້ວ່າ, ໃນໄລຍະຢ້ຽມຢາມຂອງທ່ານຫູຈີນທາວ, ສອງຝ່າຍຈະເຊັນເອກະສານການຮ່ວມມືໃນຫຼາຍຂົງເຂດ, ເຊັ່ນ: ເສດຖະກິດການຄ້າ, ການເງິນ, ພະລັງງານ, ການສຶກສາ, ວິທະຍາສາດເຕັກນິກເປັນຕົ້ນ, ເພື່ອເປີດກວ້າງການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດຕື່ມອີກ.
