|
ມຽນມາປະກາດໄວ້ອາໄລ 3 ມື້ໃຫ້ຜູ້ເສຍຊີວິດໃນລົມພາຍຸແຖບຮ້ອນ
cri
ຕາມຂ່າວ CRI: ວັນທີ 19 ພຶດສະພານີ້, ລັດຖະບານມຽນມາປະກາດວ່າ, ນັບແຕ່ວັນທີ 20 ພຶດສະພານີ້ເປັນຕົ້ນໄປ, ໄວ້ອາໄລ3 ມື້ໃຫ້ຜູ້ເສຍຊີວິດໃນລົມພາຍຸແຖບຮ້ອນ, ໃນໄລຍະໄວ້ອາໄລ, ທົ່ວປະເທດຊັກທຸງຊາດລົງເຄິ່ງເສົາ, ເພື່ອສະແດງຄວາມໄວ້ອາໄລຕໍ່ຜູ້ເສຍຊີວິດ.
ວັນທີ 19 ພຶດສະພານີ້, ລັດຖະມົນຕີການຕ່າງປະເທດ 10 ປະເທດອາຊຽນໄດ້ຈັດກອງປະຊຸມວິສາມັນຢູ່ສິງກະໂປ, ເຫັນດີສ້າງກົນໄກປະສານງານກູ້ໄພມຽນມາທີ່ມີອາຊຽນເປັນຜູ້ນຳພາ, ແລະໃຫ້ກອງໜ້າທີ່ນຳໂດຍທ່ານສຸລິນ ພິດສຸວັນ ເລຂາທິການໃຫຍ່ອາຊຽນຮັບຜິດຊອບການໝູນເດີນຂອງກົນໄກ. ພາຍຫຼັງກອງປະຊຸມໄດ້ອອກຖະແຫຼງການວ່າ, ການຊ່ອຍເຫຼືອທີ່ປະຊາຄົມໂລກສະໜອງໃຫ້ມຽນມາໂດຍຜ່ານອາຊຽນບໍ່ຄວນຫັນເປັນການເມືອງ, ບົນພື້ນຖານດັ່ງກ່າວ, ມຽນມາກ່າວວ່າເຫັນດີຮັບການຊ່ອຍເຫຼືອຈາກປະຊາຄົມໂລກ, ເຫັນດີປະເທດອາຊຽນຕ່າງໆສົ່ງໜ່ວຍກູ້ໄພໜ່ວຍແພດໄປເຂດປະສົບໄພມຽນມາໃນທັນທີ.
ມື້ດຽວກັນ, ເລຂາທິການໃຫຍ່ສະຫະປະຊາຊາດແລະປະທານອາຊຽນຍັງໄດ້ອອກຖະແຫຼງການຮ່ວມ, ປະກາດວ່າກອງປະຊຸມສາກົນອາຊຽນສະຫະປະຊາຊາດຊ່ອຍເຫຼືອມຽນມາຈະຈັດຂຶ້ນຢູ່ຢາງກຸງຂອງມຽນມາໃນວັນທີ 25 ພຶດສະພານີ້. ມື້ດຽວກັນ, ທ່ານຊິນເມໂຄມັກ ໂຄສົກກະຊວງການຕ່າງປະເທດອາເມລິກາກ່າວວ່າ, ດຽວນີ້, ອາເມລິກາບໍ່ໃຫ້ຄຳໝັ້ນສັນຍາວ່າຈະສົ່ງເຈົ້າໜ້າທີ່ໄປເຂົ້າຮ່ວມກອງປະຊຸມສາກົນເທື່ອນີ້.
|
|
