ຕາມ​ຂ່າວ ​CRI: ວັນ​ທີ 14 ພະຈິກ​ນີ້ ທະນາຄານ​ໂລກ​ໄດ້​ປະກາດ "ບົດ​ລາຍ​ງານ​ເສດ​ຖະ​ກິດ​ຈີນ​ປະຈຳໄຕ​ມາດ" ​ໂດຍຂຽນ​ວ່າ, ​ເຖິງ​ວ່າ​ປັດຈຸບັນ ​ເສດຖະກິດ​ຈີນ​ພວມ​ປະ​ເຊີນ​ກັບ​ສິ່ງ​ທ້າ​ທາຍ​ຫຼາຍຢ່າງ​ກໍ່ຕາມ, ​ແຕ່​ເສດຖະກິດ​ມະຫາ​ພາກ​ຍັງ​ມີ​ອະນາຄົດ​ອັນ​ສົດ​ໃສ​ຢູ່​ຄື​ເກົ່າ. ທະ​ນາ​ຄານ​ໂລກ​ຄາດ​ຄະ​ເນ​ວ່າ, ​ເສດຖະກິດ​ຈີນ​ໃນ​ປີ​ນີ້​ຈະ​ເຕີບ​ໂຕ 10,4%, ປີ 2007 ຈະ​​ຊ້າ​ລົງ​ຮອດ 9,6%.

ບົດ​ລາຍ​ງານ​ຂອງທະນາຄານ​ໂລກກ່າວ​ວ່າ, ​ແຕ່​ປີ​ນີ້​ມາ, ນະ​ໂຍບາຍ​ດັດສົມ​ຄວບ​ຄຸມ​ເສດ​ຖະ​ກິດ​​ທາງ​ມະຫາ​ພາກຂອງ​ລັດຖະບານ​ຈີນ​ໄດ້​ບັງ​ເກີດ​ຜົນ, ຈັງ​ຫວະ​ການ​ລົງ​ທຶນ​ໄດ້​ຊ້າ​ລົງ​ເລັກ​ໜ້ອຍ, ອົງ​ປະກອບ​ສິນຄ້າ​ສົ່ງ​ອອກ​ໄດ້​ຮັບ​ການ​ປັບ​ປຸງ​ໃຫ້​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ. ຂະ​ນະ​ດຽວ​ກັນ ຈີນ​ໄດ້​ຮັກສາ​ອັດຕາ​ເງິນ​ເຟີ້​​ໃຫ້​ຢູ່​​ໃນ​ລະ​ດັບ​ອ່າວ​ຕ່ຳ.

ຜູ່​ຊ່ຽວຊານ​ທະນາຄານ​ໂລກ​ສະ​ເໜີ​ໃຫ້​ລັດຖະບານ​ຈີນ​ໃນ​ຂະນະ​ທີ່​ໃຊ້​ພາຫະ​ນະ​ຕ່າງໆ ​ເຊັ່ນ ຊັບ​ພະຍາກອນ ທີ່​ດິນ​ແລະ​ສິນ​ເຊື່ອ​ເພື່ອ​ດັດສົມ​ຄວບ​ຄຸມ​ຈັງຫວະ​ການ​ລົງ​ທຶນ​ຕື່ມ​ອີກ​ນັ້ນ, ​ເລັ່ງ​ລັດ​ພັດທະນາ​ຂະ​ແໜງ​ການ​ບໍລິການ, ​ເປີດ​ກວ້າງ​ການ​ບໍລິ​ໂພກ​ພາຍ​ໃນ​ປະ​ເທດ, ​ເພື່ອ​ຊຸກ​ຍູ້​ໃຫ້​ເສດຖະກິດພັດທະນາ​ຢ່າງ​ສະ​ໝ່ຳສ​ະ​ເໝີ​ກັນ.