ເມື່ອພິທີໃສ່ໝວກສິ້ນສຸດລົງແລ້ວ, ຜູ້ເຖົ້າສອງຄົນໄດ້ມອບເຫຼົ້າບູຊາໃຫ້"ໜາວຊ່ວງ", "ໜາວຊ່ວງ"ດື່ມໝົດບາດດຽວ. ຕາມເລົ່າລືກັນວ່າ, ມີແຕ່"ໜາວຊ່ວງ"ດື່ມເຫຼົ່າແລ້ວ, ຈຶ່ງຈື່ຮູບພາບເທິງ 4 ເສົານັ້ນໄດ້, ມີແຕ່ເຮັດແນວນີ້, "ໜາວຊ່ວງ"ຈຶ່ງສາມາດນຳພາຄົນທັງຫຼາຍຟ້ອນຕາມວາດຟ້ອນອັນຖືກຕ້ອງໃນການເຄື່ອນໄຫວ"ມູ້ໜາວຈົ້ງເກີ".
ທ່າມກາງສຽງກອງໄມ້ແລະຂຸ່ຍ, ການເຄື່ອນໄຫວ"ມູ້ໜາວຈົ້ງເກີ"ກໍໄດ້ເລີ່ມຕົ້ນຢ່າງເປັນທາງການແລ້ວ. "ໜາວຊ່ວງ"ສອງຄົນໄດ້ນຳພາຍິງຊາຍນ້ອຍໃຫຍ່ເຜົ່າຈີງໂພ່ລຽນເປັນແຖວ, ຍ່າງເຂົ້າສະໜາມຫຼວງເປັນລຳດັບ. ພວກເຂົາເຈົ້າໄດ້ເຕັ້ນລຳຕາມຈັງຫວະຢ່າງມ່ວນຊື່ນ.
ໃນຖັນແຖວຟ້ອນລຳ, ຜູ້ຊາຍເຜົ່າຈີງໂພ່ລ້ວນແຕ່ໄດ້ຖືດາບ, ຄົມດາບປິ່ນໄປເບື້ອງຊ້າຍ, ປາຍດາບຊີ້ໄປໜ້າ. ທ້າວຈິ່ນຢົງ ອ້າຍບ່າວເຜົ່າຈີງໂພ່ບອກນັກຂ່າວວ່າ, ດາບມີຄວາມໝາຍສຳຄັນສຳລັບຜູ້ຊາຍເຜົ່າຈີງໂພ່:
"ດາບແມ່ນສັນຍະລັກຂອງຜູ້ຊາຍເຜົ່າຈີງໂພ່ພວກເຮົາ, ອ້າຍບ່າວຜູ້ໃດກໍຫ່າງອອກຈາກດາບບໍ່ໄດ້. ຟັນໄມ້ແຕ່ງກິນກໍຕ້ອງໃຊ້ພ້າມິດ, ພ້ອມກັນນັ້ນ, ໃນສະໄໝບູຮານນະການ, ພ້າມິດຍັງອາດໃຊ້ເປັນອາວຸດເພື່ອສູ້ລົບ."
ທ້າວຈິ່ນຢົງເວົ້າວ່າ, ໃນຕະຫຼອດຊີວິດຂອງຜູ້ຊາຍເຜົ່າຈີງໂພ່ຕ້ອງມີພ້າສາມດວງ, ແມ່ນພໍ່, ແມ່ຍາຍ, ແລະພໍ່ຕາມອບໃຫ້. ໃນເວລາກຳເນີດອອກ, ພໍ່ເອົາດາບໃຫ້; ຮອດໄວເຕັມກະສຽນແລ້ວ, ກໍຕ້ອງປ່ຽນດາບທີ່ແມ່ຍາຍເອົາໃຫ້; ແຕ່ງງານແລ້ວ, ຕ້ອງຂັດດາບທີ່ພໍ່ຕາເອົາໃຫ້.
ໃນຊີວິດການເປັນຢູ່ແລະການຜະລິດຂອງຜູ້ຊາຍເຜົ່າຈີງໂພ່ນັ້ນ, ດາບໄດ້ກາຍເປັນພາກສ່ວນໜຶ່ງທີ່ຂາດເຂີນບໍ່ໄດ້ແລ້ວ. ໃນການເຄື່ອນໄຫວ"ມູ້ໜາວຈົ້ງເກີ", ດາບໄດ້ກາຍເປັນເຄື່ອງເອ້ຊະນິດໜຶ່ງທີ່ສະແດງໃຫ້ເຫັນຄວາມອົງອາດກ້າຫານຂອງຜູ້ຊາຍ.
ໃນຖັນແຖວຟ້ອນລຳນັ້ນ, ຜູ້ຍິງເຜົ່າຈີງໂພ່ກໍດຶງດູດສາຍຕາຄົນຫຼາຍ, ພວກນາງກວາດແກວ່ງວີສີແລະຄັນຮົ່ມໃນມືແຮງໆ, ແລະເຄື່ອງເງິນທີ່ປະດັບໃສ່ສົ້ງເສື້ອຢ່າງບໍ່ຢຸດຢັ້ງ, ຄືດັ່ງນົກງາມໆພວມໂອ້ອວດສະແດງປີກສອງເບື້ອງແລະຂົນຂອງຕົນ. ນາງໂຈຊ້ຽນອິງ ສາວເຜົ່າຈີງໂພ່ໄດ້ແນະນຳຄວາມເປັນມາຂອງກິລິຍາແກວ່ງເຄື່ອງເງິນສູ່ນັກຂ່າວວ່າ:
"ໃນສະໄໝບູຮານ, ເວລາຊົນເຜົ່າຈີງໂພ່ຍ້າຍລົງມາຈາກພູຫິມະສີມາລາຢານັ້ນ, ນົກເທບໄດ້ຮຽກພວກເຮົາມາຟ້ອນ"ມູ້ໜາວຈົ້ງເກີ"ນຳກັນ, ເພື່ອລະລຶກເສັ້ນທາງຍົກຍ້າຍ. ເວລານັ້ນ, ພວກເຮົາໄດ້ນຸ່ງຊຸດສວຍງາມ, ແກວ່ງສົ້ງເສື້ອທີ່ປະດັບເຄື່ອງເງິນ, ມາເຕັ້ນລຳນຳກັນ."
ນາງເວົ້າວ່າ, ເພື່ອລະລຶກນົກເທບຕົວນັ້ນ, ພາຍລຸນມາ, ເວລາເຕັ້ນລຳ, ເຜົ່າຈີງໂພ່ຈິ່ງໄດ້ຮັກສາກິລິຍາແກວ່ງເຄື່ອງເງິນໂດຍຕະຫຼອດ.
ແຕ່ລະປີ, ບ້ານຊົນເຜົ່າແຂວງຢຸນນານໄດ້ຈັດການເຄື່ອນໄຫວ"ມູ້ໜາວຈົ້ງເກີ"ທີ່ໃຫຍ່ໂຕມະໂຫລານ. ໃນເວລາຈັດການເຄື່ອນໄຫວເທື່ອໃດ, ນັກທ່ອງທ່ຽວທີ່ມາຈາກແຫ່ງຕ່າງໆທົ່ວປະເທດຈະຕື່ນເຕັ້ນນຳບັນຍາກາດດັ່ງກ່າວ, ແລ້ວເຂົ້າຮ່ວມຖັນແຖວຟ້ອນ"ມູ້ໜາວຈົ້ງເກີ"ຢ່າງຫ້າວຫັນ. ບ້ານຊົນເຜົ່າແຂວງຢຸນນານເລີຍກາຍເປັນມະຫາສະໝຸດແຫ່ງການຟ້ອນ, ບັນຍາກາດກໍໄດ້ເປັນກະແສຟົດຟື້ນຄຶກຄື້ນທີ່ສຸດ.
(ຈົບ)
1 2 3
|
