|
ຕາມຂ່າວ CRI: ວັນທີ 25 ມິຖຸນາ, ເວທີປາໄສຫວນຄືນວັນສົ່ງຊາວຍີ່ປຸ່ນ 1 ລ້ານຄົນຢູ່ເກາະຫູລູຕາວກັບຄືນຍີ່ປຸ່ນຄົບຮອບ 60 ປີແລະຈ້ອງມອງການພົວພັນລະຫວ່າງຈີນກັບຍີ່ປຸ່ນໄດ້ຈັດຂຶ້ນຢູ່ເມືອງຫູລູຕາວແຂວງລຽວນິງຂອງຈີນ, ບຸກຄົນວົງການຕ່າງໆຂອງຈີນແລະຍີ່ປຸ່ນ 400 ກວ່າຄົນໄດ້ເຂົ້າຮ່ວມເວທີປາໄສ.
ໃນພິທີເປີດເວທີປາໄສ, ທ່ານຖາງເຈຍສວນ ທີ່ປຶກສາແຫ່ງລັດຈີນກ່າວວ່າ, ສາກປະຫວັດການສົ່ງຊາວຍີ່ປຸ່ນໜຶ່ງລ້ານຄົນຢູ່ເກາະຫູລູຕາວກັບຄືນຍີ່ປຸ່ນ ໄດ້ສະແດງໃຫ້ເຫັນຈິດໃຈອັນກວ້າງຂວາງແລະນ້ຳໃຈມະນຸດສະທຳຂອງປະຊາຊາດຈີນ. ຝ່າຍຈີນຫວັງໃຫ້ຜູ່ນຳຍີ່ປຸ່ນຈົ່ງໃຊ້ທ່າທີຮັບຜິດຊອບຕໍ່ປະຫວັດສາດ ຮັບຜິດຊອບຕໍ່ປະຊາຊົນແລະຮັບຜິດຊອບຕໍ່ອະນາຄົດໃນລະດັບສູງ, ທຳການຕົກລົງຢ່າງຖືກຕ້ອງ, ລົບລ້າງອຸປະສັກທາງການເມືອງຂອງການພົວພັນລະຫວ່າງສອງປະເທດ, ເຮັດໃຫ້ການພົວພັນລະຫວ່າງຈີນກັບຍີ່ປຸ່ນກັບຄືນສູ່ໂຄຈອນຂະຫຍາຍຕົວຢ່າງເປັນປົກກະຕິ.
ໃນພິທີເປີດເວທີປາໄສ, ທ່ານມູຣາຢາມາ ໂຕມີອີຊີ ອະດີດນາຍົກລັດຖະມົນຕີຍີ່ປຸ່ນທີ່ນຳພາຄະນະຜູ່ແທນມາເຂົ້າຮ່ວມເວທີປາໄສໄດ້ສຳຫຼວດຕົນເອງແລະຂໍຄະມາໂທດຕໍ່ປະຫວັດສົງຄາມໂລກຄັ້ງທີສອງ. ທ່ານກ່າວວ່າ, ການສົ່ງຄືນຊາວຍີ່ປຸ່ນຢ່າງຂະໜາດໃຫຍ່ໄດ້ສະແດງໃຫ້ເຫັນຈິດໃຈອັນກວ້າງຂວາງຂອງປະຊາຊາດຈີນແລະນ້ຳໃຈມະນຸດສະທຳຂອງປະຊາຊົນຈີນຢ່າງແທ້ຈິງ, ຊາວຍີ່ປຸ່ນຢ່າງຫຼວງຫຼາຍຮູ້ສຶກຕື້ນຕັນໃຈຢ່າງເລິກເຊິ່ງຕໍ່ມິດຕະພາບອັນເລິກເຊິ່ງຂອງປະຊາຊົນຈີນ. ທ່ານຍັງເປັນຫ່ວງນຳການພົວພັນລະຫວ່າງຈີນກັບຍີ່ປຸ່ນໃນສະເພາະໜ້າທີ່ "ການເມືອງເຢັນເສດຖະກິດຮ້ອນ", ແລະກ່າວວ່າ ຫວັງໃຫ້ລັດຖະບານຍີ່ປຸ່ນຈົ່ງປະຕິບັດຕໍ່ການພົວພັນລະຫວ່າງຈີນກັບຍີ່ປຸ່ນຢ່າງຈິງຈັງ.
|
