|
ທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານຕິດຕາມຮັບຟັງລາຍການເສັງຄວາມຮູ້ທີ່ມີຫົວຂໍ້ວ່າ "ເຮົາກັບວິທະຍຸສາກົນແຫ່ງປະເທດຈີນ". ໃນລາຍການພາກນີ້, ເຊີນຟັງບົດທີສອງທີ່ພາດຫົວເລື່ອງວ່າ: ເດີນຜ່ານໄລຍະທາງທີ່ສະຫງ່າລາສີ. ແນະນຳວິທະຍຸສາກົນແຫ່ງປະເທດຈີນທີ່ເປີດປະຕູແລະພວມພັດທະນາສູ່ທ່ານຟັງ.
ກ່ອນຈະເລີ່ມຕົ້ນລາຍການ, ຂ້າພະເຈົ້າຂໍສະເໜີຄຳຖາມສອງຂໍ້ຂອງການເສັງຄວາມຮູ້ເທື່ອນີ້. ຂໍ້ທີໜຶ່ງ, ປັດຈຸບັນ ຫ້ອງການນັກຂ່າວຂອງວິທະຍຸສາກົນແຫ່ງປະເທດຈີນປະຈຳແຫ່ງຕ່າງໆໃນທົ່ວໂລກມີຈັກແຫ່ງ? ຂໍ້ທີສອງ, ປັດຈຸບັນ ແຕ່ລະມື້ ວິທະຍຸສາກົນແຫ່ງປະເທດຈີນກະຈາຍສຽງຕໍ່ຕ່າງປະເທດມີຈັກພາສາ.
ທ້າຍຊຸມປີ 70 ສະຕະວັດທີ່ແລ້ວ, ຈີນເລີ່ມປະຕິບັດນະໂຍບາຍປະຕິຮູບໄຂປະຕູສູ່ພາຍນອກ. ແຕ່ນັ້ນເປັນຕົ້ນມາ, ການກະຈາຍສຽງຕໍ່ຕ່າງປະເທດຂອງຈີນກໍ່ໄດ້ເດີນໄປຕາມເສັ້ນທາງທີ່ເປີດປະຕູແລະພັດທະນາ, ແລະມີອິດທິພົນນັບມື້ນັບຫຼາຍ. ວາລະສານ "ເຣດີໂອ ຄູຣີເອີ" ເຢຍລະມັນຖືການປ່ຽນແປງຂອງລາຍການພາສາເຢຍລະມັນຂອງວິທະຍຸສາກົນແຫ່ງປະເທດຈີນເປັນ "ລົມສົດໃສທີ່ພັດມາຈາກຈີນໄກແສນໄກ", ແລ້ວຖືວິທະຍຸສາກົນແຫ່ງປະເທດຈີນເປັນ "ວິທະຍຸທີ່ຄົນທັງຫຼາຍມັກຟັງ". ໃນຄາວນັ້ນ ສະມາຄົມສະໂມສອນວິທະຍຸທະວີບອາເມລິກາເໜືອກໍ່ປະກວດວິທະຍຸສາກົນແຫ່ງປະເທດຈີນເປັນ "ວິທະຍຸໃຫຍ່ກວ່າໝູ່ຂອງໂລກ".
ຄຽງຄູ່ກັບບັນດາປະເທດໃນໂລກຫວັງຢາກຮູ້ຈັກສະພາບການພັດທະນາຂອງຈີນຫຼາຍຍິ່ງຂຶ້ນ, ເນື້ອໃນແຈ້ງຂ່າວແລະຮູບແບບລາຍການຂອງວິທະຍຸສາກົນແຫ່ງປະເທດຈີນກໍ່ເລີ່ມມີການປ່ຽນແປງ. ທ່ານວາງໂຈ້ໂຈ່ວ ບັນນາທິການຊັ້ນສູງຂອງວິທະຍຸພວກເຮົາທີ່ເຄີຍໄດ້ຮັບລາງວັນບັນນາທິການຂ່າວຄາວສູງສຸດຂອງຈີນຫວນຄືນວ່າ, ແຕ່ນັ້ນມາ, ການຈັດລາຍການຂອງວິທະຍຸພວກເຮົາກໍ່ເລີ່ມປ່ຽນຈາກການມີທຳນອງດຽວມາເປັນມີຫຼາຍສີຫຼາຍສັນ, ລາຍງານສະພາບຕົວຈິງຂອງຈີນທີ່ພວມພັດທະນາຕໍ່ທົ່ວໂລກດ້ວຍສາຍຕາພິເສດ.
ທ່ານວາງໂຈ້ໂຈ່ວແມ່ນເຂົ້າເຮັດວຽກຢູ່ວິທະຍຸສາກົນແຫ່ງປະເທດຈີນເມື່ອຕົ້ນຊຸມປີ 60 ສະຕະວັດທີ່ແລ້ວ. ປີນີ້ອາຍຸເກືອບ 70 ປີແລ້ວ, ທ່ານແມ່ນໜຶ່ງໃນນັກຂ່າວງວດທຳອິດທີ່ວິທະຍຸສາກົນແຫ່ງປະເທດຈີນແຕ່ງໄປປະຈຳຢູ່ຕ່າງປະເທດ. ໃນເວລາກ່າວເຖິງປະສົບການໃນ 20 ປີກ່ອນ. ທ່ານເວົ້າວ່າ:
ຄວນເວົ້າໄດ້ວ່າ ແຕ່ມື້ສ້າງຕັ້ງຫ້ອງການນັນກຂ່າວປະຈຳປາຣີມື້ທຳອິດເປັນຕົ້ນມາ, ພວກຂ້າພະເຈົ້າທຸ່ມເທກຳລັງວັງຊາເຂົ້າໃນໜ້າທີ່ຕຳແໜ່ງ, ໄປເອົາຂ່າວຢູ່ກັບບ່ອນ, ຜ່ານຜ່າຄວາມຫຍຸ້ງຍາກຕ່າງໆ, ລາຍການຂອງພວກຂ້າພະເຈົ້າໄດ້ອອກອາກາດທັນເທດການ. ຕົວຢ່າງຄື ຂ້າພະເຈົ້າໄດ້ໄປເອົາຂ່າວການເຊັນສັນຍາສັນຕິພາບອາຟການິສຖານຢູ່ທີ່ເຊີແນວ, ຫຼັງຈາກເຊັນສັນຍາ 20 ກວ່ານາທີ, ຂ່າວນີ້ພວກຂ້າພະເຈົ້າກໍ່ໄດ້ອອກອາກາດແລ້ວ.
ແຕ່ປີ 1980 ເປັນຕົ້ນມາ, ວິທະຍຸສາກົນແຫ່ງປະເທດຈີນເລີ່ມຕັ້ງຫ້ອງການນັກຂ່າວຢູ່ຕ່າງປະເທດເປັນກ້າວໆ, ໃນນັ້ນຕັ້ງກ່ອນໝູ່ແມ່ນຢູ່ໂຕກຽວແຫ່ງຍີ່ປຸ່ນແລະເບັນກຼາດແຫ່ງຢູໂກສະລາວີ. ໃນນັກຂ່າວທີ່ຖືກແຕ່ງໄປປະຈຳຢູ່ຕ່າງປະເທດນັ້ນ, ນາງລິວຊູ້ຢູນຖືກແຕ່ງໄປປະຈຳຢູ່ເຢລູຊາເລັມ, ນາງໄດ້ລາຍງານຂ່າວຈຳນວນຫຼວງຫຼາຍໃນທ່າມກາງສຽງລະເບີດ, ແມ່ນນັກຂ່າວທີ່ໄດ້ຮັບຄວາມໂຄລົບນັບຖືທີ່ສຸດ. ປັດຈຸບັນ ນາງໄດ້ສຳເລັດວຽກກັບຄືນປະເທດແລ້ວ, ນາງລິວຊູ້ຢູນເວົ້າວ່າ:
ເດືອນຕຸລາປີ 2000, ຢູ່ລະຫວ່າງປາເລັສຕິນອິສຣາແອນໄດ້ເກີດການປະທະກັນອີກ, ສ່ວນຫຼາຍແມ່ນເກີດຂຶ້ນຢູ່ເຂດກາຊາ, ເວລາຂ້າພະເຈົ້າໄປເອົາຂ່າວຢູ່ເຂດກາຊານັ້ນ ໄດ້ເອົາທຸງຊາດຈີນຜືນໜຶ່ງໄປນຳ. ຢູ່ແຫ່ງນັ້ນ ພວກຂ້າພະເຈົ້າໄດ້ເຫັນຊາວປາເລັສຕິນຜູ່ໜຶ່ງຖືກປືນຍິງລົ້ມລົງ, ເລືອດໄຫຼອອກຈາກຂາຂອງເຂົາ. ຜູ່ຖືກລູກປືນລົ້ມລົງນັ້ນຫ່າງຈາກພວກຂ້າພະເຈົ້າບໍ່ເທົ່າໃດແມັດ, ສະນັ້ນ ຂ້າພະເຈົ້າມີຄວາມຮູ້ສຶກຢ່າງກະທັນຫັນວ່າ, ຄວາມຕາຍແມ່ນໃກ້ພວກຂ້າພະເຈົ້າທີ່ສຸດ, ມັນອາດຈະເກີດນຳພວກຂ້າພະເຈົ້າເອງ. ທີ່ຈິງແລ້ວ ຫຼັງຈາກນັ້ນມາຫຼາຍປີ, ພວກຂ້າພະເຈົ້າໄດ້ເຫັນສະພາບການດັ່ງກ່າວຫຼາຍບໍ່ຢອກ.
ປັດຈຸບັນ ຢູ່ແຫ່ງຕ່າງໆໃນໂລກ, ວິທະຍຸສາກົນແຫ່ງປະເທດຈີນຕັ້ງຫ້ອນການນັກຂ່າວປະຈຳຢູ່ຕ່າງປະເທດ 27 ແຫ່ງ. ຕາບໃດມີເຫດການສຳຄັນເກີດຂຶ້ນໃນໂລກ, ນັກຂ່າວທີ່ປະຈຳຢູ່ຕ່າງປະເທດເຫຼົ່ານີ້ກໍຈະໄດ້ລາຍງານຂ່າວຢູ່ກັບບ່ອນທີ່ເກີດເຫດຢ່າງທັນການ. ຄຽງຄູ່ກັບການກະຈາຍສຽງຕໍ່ຕ່າງປະເທດຂອງຈີນໄດ້ເປີດກວ້າງແລະພັດທະນາຢ່າງບໍ່ຢຸດຢັ້ງ, ປັດຈຸບັນ ແຕ່ລະມື້ ວິທະຍຸສາກົນແຫ່ງປະເທດຈີນກະຈາຍສຽງຕໍ່ຕ່າງປະເທດ 780 ກວ່າຊົ່ວໂມງດ້ວຍ 43 ພາສາ, ຈຳນວນພາສາ ເວລາອອກອາກາດແລະປະລິມານຈົດໝາຍທີ່ຜູ່ຟັງທັງຫຼາຍ ຝາກມານັ້ນ ວິທະຍຸສາກົນແຫ່ງປະເທດຈີນໄດ້ເປັນໜຶ່ງໃນສາມວິທະຍຸສາກົນໃຫຍ່ຂອງໂລກແລ້ວ.
ຫຼັງຈາກດຳເນີນການປະຕິຮູບແລະໄຂປະຕູສູ່ພາຍນອກ, ຊາວຕ່າງປະເທດທີ່ມາເຮັດວຽກ ສຶກສາ ທ່ອງທ່ຽວແລະເຮັດທຸລະກິດຢູ່ຈີນນັບມື້ນັບຫຼາຍ. ເພື່ອເຮັດໃຫ້ພວກເຂົາເຈົ້າຮູ້ຈັກນະໂຍບາຍຕໍ່ພາຍໃນປະເທດແລະຕໍ່ຕ່າງປະເທດຂອງຈີນຢ່າງທັນການ, ຮັບຮູ້ຈີນຢ່າງຖືກຕ້ອງ, ແລະເພື່ອອຳນວຍຄວາມສະດວກໃຫ້ແກ່ພະນັກງານວິທະຍາສາດເຕັກນິກ ວັດທະນະທຳການສຶກສາ ພະນັກງານພົວພັນຕ່າງປະເທດແລະນັກຮຽນອັນໄພສານ, ປີ 1984, ວິທະຍຸສາກົນແຫ່ງປະເທດຈີນໄດ້ຈັດລາຍການ FM ພາສາອັງກິດຢູ່ເຂດປັກກິ່ງກ່ອນ. ເມື່ອກ່າວເຖິງການຈັດລາຍການ FM ພາສາອັງກິດ, ທ່ານນາງຫວາງລູ້ ຮອງຜູ່ວ່າການຂອງລາຍການດັ່ງກ່າວຊຸດປັດຈຸບັນເວົ້າວ່າ:
ລາຍການ FM ພາສາອັງກິດ ເປັນລາຍການຢ່ອນອາລົມ, ຄວນເວົ້າໄດ້ວ່າຈົນຮອດປັດຈຸບັນ ແມ່ນລາຍການພາສາອັງກິດທີ່ມີລະດັບວິຊາການສູງສຸດພາຍໃນປະເທດຈີນ. ບໍ່ວ່າຈະແມ່ນລາຍການເພງ ຫຼືແມ່ນການກະຈາຍສຽງດ້ວຍພາສາອັງກິດ, ບໍ່ຕ້ອງສົງໄສເລີຍວ່າ ພວກຂ້າພະເຈົ້າແມ່ນຜູ່ລິເລີ່ມຢູ່ເຂດໃນຈີນ.
ຄຽງຄູ່ກັບວິທະຍຸກະຈາຍສຽງຕໍ່ຕ່າງປະເທດຂອງຈີນມີອິດທິພົນນັບມື້ນັບຫຼາຍ, ພາຫະນະອັນໜຶ່ງອັນດຽວຄື ການກະຈາຍສຽງອອກອາກາດຂອງວິທະຍຸສາກົນແຫ່ງປະເທດຈີນມີຢູ່ແຕ່ເດີມນັ້ນ ບໍ່ສອດຄ່ອງກັບຄວາມຕ້ອງການຂອງສະພາບໃນປັດຈຸບັນແລ້ວ.
ປີ 1998, ວິທະຍຸສາກົນແຫ່ງປະເທດຈີນເລີ່ມພັດທະນາວຽກງານວິທະຍຸທາງອິນເຕີເນັດ, ໄດ້ສ້າງຕັ້ງ CRI Online, ປັດຈຸບັນ ເວັບໄຊດັ່ງກ່າວໄດ້ພັດທະນາເປັນເວັບໄຊຈີນທີ່ມີພາສາຕ່າງປະເທດຫຼາຍກວ່າໝູ່ ຄືປະກອບດ້ວຍໜັງສື 43 ຊະນິດ ແລະມີລາຍການກະຈາຍສຽງ 48 ພາສາ. ຕາມສະຖິຕິ, ໃນເວັບໄຊຂອງບັນດາວິທະຍຸສາກົນໃຫຍ່ທົ່ວໂລກ, CRI Online ມີຊື່ສຽງດົ່ງດັງກວ່າໝູ່.
ຕໍ່ໄປຂ້າພະເຈົ້າຈະອ່ານຄຳຖາມສອງຂໍ້ຂອງການເສັງຄວາມຮູ້ເທື່ອນີ້ອີກເທື່ອໜຶ່ງ: ຂໍ້ທີໜຶ່ງ, ປັດຈຸບັນ ຫ້ອງການນັກຂ່າວຂອງວິທະຍຸສາກົນແຫ່ງປະເທດຈີນປະຈຳຢູ່ຕ່າງປະເທດໃນທົ່ວໂລກມີຈັກແຫ່ງ? ຂໍ້ທີສອງ, ປັດຈຸບັນ ແຕ່ລະມື້ ວິທະຍຸສາກົນແຫ່ງປະເທດຈີນກະຈາຍສຽງຕໍ່ຕ່າງປະເທດມີຈັກພາສາ.
ທ່ານຜູ່ຟັງທີ່ໂຄລົບ, ລາຍການເສັງຄວາມຮູ້ພາກນີ້ຂໍສ້ຽງສຸດລົງພຽງທໍ່ນີ້, ໃນລາຍການພາກໜ້າ, ເຊີນທ່ານຕິດຕາມຮັບຟັງລາຍການເສັງຄວາມຮູ້ທີ່ພາດຫົວເລື່ອງວ່າ: ອະນາຄົດທີ່ໃໝ່ອ່ຽມ. ສະບາຍດີ.
|
