ຕາມ​ຂ່າວCRI: ​ໃນ​ງານ​ຊຸມນຸມ​ນັກ​ຂ່າວ​ທີ່​ຈັດ​ຂຶ້ນຢູ່​ທີ່​ປັກ​ກິ່ງ​ໃນວັນ​ທີ 16 ພຶດ​ສະ​ພາ, ທ່ານ​ລິວ​ຈ້ຽນຊາວ ​ໂຄສົກ​ກະຊວງ​ການ​ຕ່າງປະ​ເທດ​ຈີນ​ປະກາດ​ວ່າ, ການ​ເຈ​ລະ​ຈາ​ລະ​ຫວ່າງ​ຈີນ​ກັບ​ຍີ່ປຸ່ນ​ຮອບ​ທີ 5 ກ່ຽວ​ກັບ​ບັນຫາ​ທະ​ເລ​ຈີນຕາ​ເວັນ​ອອກຈະ​ຈັດ​ຂຶ້ນ​ຢູ່​ໂຕ​ກຽວ​ໃນ​ວັນ​ທີ 18 ພຶດ​ສະ​ພາ.

ທ່ານ​ລິວ​ຈ້ຽນຊາວ​ກ່າວ​ວ່າ, ຮອດ​ເວລາ​ນັ້ນ ທ່ານ​ຫູ​ເຈິ້ງ​ເຢ້ ຫົວໜ້າ​ກົມ​ອາຊີ​ກະ​ຊວງ​ການ​ຕ່າງ​ປະ​ເທດ​ຈີນ​ກັບທ່ານ​ໂຈ​ໂຈ​ຈຽງ​ຊຽນ ອີ​ຊີ​ໂຣ ຫົວໜ້າ​ກົມ​ອາ​ຊີ​ໂອ​ຊີ​ອາ​ນີ​ກະ​ຊວງ​ການ​ຕ່າງ​ປະ​ເທດຍີ່ປຸ່ນຕ່າງ​ຈະ​ນຳພາ​ຄະນະ​ຜູ່​ແທນ​ເຂົ້າ​ຮ່ວມ, ສອງ​ຝ່າຍ​ຈະ​ສືບ​ຕໍ່​ແລກ​ປ່ຽນ​ຄວາມ​ເຫັນ​ກ່ຽວ​ກັບ​ບັນຫາທະ​ເລ​ຈີນ​ຕາ​ເວັນ​ອອກ.

ທ່ານ​ລິວ​ຈ້ຽນຊາວ​ກ່າວ​ວ່າ, ​ເນື່ອງ​ຈາກ​ຈີນ​ຍີ່ປຸ່ນ​ມີ​ຄວາມ​ເຫັນ​ຂັດ​ກັນຂ້ອນ​ຂ້າງ​ຫຼາຍ​ໃນ​ບັນ​ຫາ​ທະ​ເວ​ຈີນ​ຕາ​ເວັນ​ອອກ, ບາງ​ບັນຫາ​ກໍ່​ຂ້ອນ​ຂ້າງ​ສັບສົນ, ຢາກ​ຜ່ານ​ຈາກ​ການ​ເຈ​ລະ​ຈາ​ເທື່ອ​ນີ້​ໃຫ້​ໄດ້ຄວາມ​ຄືບ​ໜ້າ​ທີ່​ມີລັກສະນະ​ບຸກທະລຸ​ແມ່ນ​ຍາກ​ຢູ່. ​ແຕ່​ທ່ານ​ກ່າວ​ວ່າ, ຝ່າຍ​ຈີນ​ຈະ​ໃຊ້​ທ່າ​ທີ​ຮັບຜິດຊອບ​ແລະ​ຕັ້ງໜ້າ​ເຈລະຈາ​ກັບ​ຝ່າຍ​ຍີ່ປຸ່ນ​ຢ່າງ​ຈິງ​ຈັງ​ກ່ຽວ​ກັບ​ບັນ​ຫາ​ທະ​ເລ​ຈີນ​ຕາ​ເວັນ​ອອກ, ​ຫວັງ​ໃຫ້​ສອງ​ຝ່າຍ​ຫຍໍ້​ຄວາມ​ເຫັນ​ຂັດ​ກັນ​ຢ່າງ​ບໍ່​ຢຸດ​ຢັ້ງ.