|
ຕາມຂ່າວສານຊິນຮວາ: ວັນທີ 28 ມີນາຢູ່ທີ່ປັກກິ່ງ, ທ່ານເຈິ່ງເຜິຍອຽນ ຮອງນາຍົກລັດຖະມົນຕີຈີນກ່າວວ່າ, ຈີນຈະເລັ່ງລັດສ້າງສາສັງຄົມແບບປະຢັດຊັບພະຍາກອນແລະແບບໄມຕີຈິດກັບສິ່ງແວດລ້ອມ, ຕັ້ງໜ້າຊຸກຍູ້ປະຕິບັດມາດຖານສິ່ງກໍ່ສ້າງສີຂຽວ, ອອກແຮງພັດທະນາສິ່ງກໍ່ສ້າງແບບປະຢັດພະລັງງານແລະປະຢັດທີ່ດິນ.
ສິ່ງກໍ່ສ້າງສີຂຽວໝາຍເຖິງສິ່ງກໍ່ສ້າງທີ່ມີຜົນສະທ້ອນຕໍ່ສິ່ງແວດລ້ອມໃນລະດັບຕ່ຳສຸດໃນການກໍ່ສ້າງແລະນ້ຳໃຊ້, ຈຸດພິເສດຕົ້ນຕໍແມ່ນປະຢັດພະລັງງານ ປະຢັດນ້ຳ ປະຢັດວັດສະດຸກໍ່ສ້າງແລະອະນຸລັກສິ່ງແວດລ້ອມ.
ໃນເວລາເຂົ້າຮ່ວມງານເອັກສ໌ໂປກ່ຽວກັບສິ່ງກໍ່ສ້າງສີຂຽວແລະສິ່ງກໍ່ສ້າງປະຢັດພະລັງງານໃນມື້ດຽວກັນ, ທ່ານເຈິ່ງເຜິຍອຽນກ່າວວ່າ, ໃນ 5 ປີຂ້າງໜ້າ, ຈີນຈະຕັ້ງໜ້າຊຸກຍູ້ປະຕິບັດມາດຖານສີຂຽວຕໍ່ສິ່ງກໍ່ສ້າງໃໝ່, ປະຕິບັດມາດຖານປະຢັດພະລັງງານຢ່າງເຂັ້ມງວດ, ຊຸກຍູ້ການດັດສ້າງສິ່ງກໍ່ສ້າງທີ່ມີຢູ່ໃນປັດຈຸບັນໃຫ້ປະຢັດພະລັງງານຢ່າງໜັກແໜ້ນ. ນອກນີ້, ຈີນຍັງຈະເພີ່ມທະວີການຊີ້ນຳດ້ານນະໂຍບາຍແລະການສ້າງສາລະບົບກົດໝາຍ, ສ້າງແລະບູລະນະລະບົບກົດບັນຍັດກ່ຽວກັບສິ່ງກໍ່ສ້າງປະຢັດພະລັງງານໃຫ້ສົມບູນຂຶ້ນ, ເພີ່ມທະວີການຕິດຕາມກວດກາການປະຕິບັດມາດຖານທີ່ກ່ຽວຂ້ອງ.
|
