|
ໄທເຫີນານຊ່າງເຮັດໝີ່ທີ່ມີຫຼາຍລົດຫຼາຍຊາດ
cri
Author: hb
|
ໃນອາຫານການກິນຂອງໄທເຫີນານຕ້ອງມີໝີ່ຢູ່ຕະຫຼອດ.ມື້ນີ້,ພວກເຮົາຈະແນະນຳໝີ່ຕົ້ມ,ໝີ່ຊະນິດນີ້ມີຊື່ສຽງກວ່າໝູ່ຢູ່ເຫີນານ.ເວົ້າແບບງ່າຍໆແລ້ວ,ໝີ່ຕົ້ມກໍ່ແມ່ນເອົາເສັ້ນໝີ່ລົງຕົ້ມໃນໝໍ້ແກງທີ່ຟົດໆ,ໃສ່ຊິ້ນແລະຜັກ,ຄ່ອຍໆຕົ້ມຈົນສຸກ.ໝີ່ຕົ້ມຄອບຄົວທຳມະດາກໍ່ເຮັດເປັນໝົດ,ຄືຄອບ ຄົວຂອງທ່ານລິວເຊີ້ງລີ້,ກຳມະກອນບຳນານອາຍຸຫ້າສິບກວ່າປີຕ້ອງກິນໝີ່ຕົ້ມຫຼາຍຄາບເກືອບທຸກອາທິດ.
ເມື່ອເວົ້າເຖິງເລື່ອງມັກກິນໝີ່ຕົ້ມແລ້ວ,ທ່ານລິວບອກນັກຂ່າວວ່າ,ທ່ານເອງກັບເມຍຂອງທ່ານເຮັດໝີ່ຕົ້ມເປັນໝົດ,ໝົດຄອບຄົວຮູ້ສຶກວ່າ,ບໍ່ມີເຂົ້າແນວໃດແຊບທໍ່ໝີ່ຕົ້ມ.
ປັດຈຸບັນ,ຊີວິດການເປັນຢ່ດີຂຶ້ນແລ້ວ,ແຕ່ກິນອັນໃດກໍ່ບໍ່ແຊບທໍ່ກິນ ໝີ່.ຍາມທຳມະດາຖ້າບໍ່ມີເວລາເຮັດ,ຮອດມື້ບຸນວັນພັກກໍ່ຈະພາຄອບຄົວໄປກິນຢູ່ຮ້ານໝີ່ຕົ້ມທີ່ມີຊື່ສຽງຢູ່ໃກ້ເຮືອນ.
ຄອບຄົວຂອງທ່ານລີວມັກກິນໝີ່ຕົ້ມຊິ້ນແກະ.ໃນໝໍ້ແກງຮ້ອນໆມີນ້ຳມັນໝາກເຜັດແດງໆລອຍຢູ່ໜ້າ,ຊອຍຫອມປ້ອມໂຮຍໃສ່,ມີຊິ້ນແກະຂາວໆ ນຸ້ມໆ,ເບິ່ງແລ້ວຈັ່ງແມ່ນເປັນຕາແຊບ.ຄັນເອົາໄມ້ຖູ່ຄົນເບິ່ງ,ກໍຈະເຫັນຍັງມີເສັ້ນລ້ອມຫຶກ,ເສັ້ນເຕົ້າຮູ້,ສາຫຼ່າຍທະເລ,ໝາກເກົາກີສະໝຸນໄພ,ເຫັດຫູ ໜູແລະອື່ນໆ.ໝີ່ຕົ້ມແນວນີ້,ບໍ່ພຽງແຕ່ງາມ,ລົດຊາດກໍແຊບ,ທັງມີທາດບຳລຸງຫຼາຍ.
ຄອບຄົວທີ່ມັກກິນໝີ່ຕົ້ມຄືຄອບຄົວຂອງທ່ານລີວນັ້ນຢູ່ແຂວງເຫີນານຫຼາຍຈົນນັບບໍ່ຖ້ວນ.ໃນອາຫານທີ່ຄົນທ້ອງຖິ່ນນີ້ເຮັດຕ້ອນຮັບພີ່ນ້ອງແລະໝູ່ເພື່ອນນັ້ນຕ້ອງມີໝີ່ຕົ້ມ.ຄົນຕ່າງຖິ່ນທີ່ໄປເຫີນານຜູ້ໃດກໍ່ຕ້ອງໄປຊິມ ໝີ່ຕົ້ມ.ຮ້ານໝີ່ຕົ້ມຢ່ແຂວງເຫີນານຫຼາຍຈົນນັບບໍ່ຖ້ວນ.ຄຽງຄູ່ກັບຈັງຫວະຊີວິດການເປັນຢູ່ໄວເຂົ້າ,ບາງຄົນບໍ່ມີເວລາແຕ່ງກິນເອງ,ກໍ່ມັກໄປກິນຢູ່ ຮ້ານ,ສັ່ງອາຫານເຢັນແຊບໆຈັກສອງສາມເຍື່ອງ,ແລ້ວສັ່ງເອົາໝີ່ຕົ້ມຖ້ວຍໜຶ່ງກໍ່ແລ້ວໄປຄາບໜຶ່ງຢ່າງແຊບຊ້ອຍ.
ເມືອງເຈີ້ງໂຈ່ວ ເທດສະບານແຂວງເຫີນານແມ່ນເມືອງໝີ່ຕົ້ມທີ່ມີຊື່ສຽງ,ຖະໜົນເສັ້ນໃດກໍມີຮ້ານໝີ່ຕົ້ມ,ສະດວກທີ່ສຸດ.ຮ້ານໝີ່ຕົ້ມຊ່ຽວຈີ້ທີ່ຕັ້ງຢູ່ກາງເມືອງເຈີ້ນໂຈ່ວມີແຂກເຕັມຮ້ານຢູ່ຕະຫຼອດ.
ທ່ານຕົງຈື້ສ່ານ ຫົວໜ້າພໍ່ຄົວຂອງຮ້ານໝີ່ຕົ້ມຊ່ຽວຈີ້ໄດ້ແນະນຳເຄັດລັບທີ່ເຮັດໃຫ້ຮ້ານໝີ່ຕົ້ມຊ່ຽວຈີ້ມີແຂກຫຼາຍໃຫ້ນັກຂ່າວຮູ້ດ້ວຍຄວາມພູມໃຈ.
ຮ້ານໝີ່ຊ່ຽວຈີ້,ມີແກງສາມຢ່າງ,ຄືແກງກະດູກແກະ,ແກງຊິ້ນແກະແລະແກງໄກ່.ນ້ຳນົວຊິ້ນເປື່ອຍ,ເສັ້ນໝີ່ກໍ່ໜຽວແມ່ນຈຸດພິເສດຂອງໝີ່ຕົ້ມຮ້ານ ຊ່ຽວຈີ້.ລູກຄ້າຮູ້ສຶກວ່າໝີ່ຕົ້ມຂອງຮ້ານນີ້ແຊບອີຫຼີ,ຄືນິດໄສຂອງຄົນເຫີນານ, ຊື່ສັດບໍລິສຸດ,ແທ້ຈິງ.
ນອກຈາກໝີ່ຕົ້ມແລ້ວ,ຄົນເຫີນານຍັງເຮັດໝີ່ແນວອື່ນໄດ້ຫຼາຍຢ່າງ.ເຊັ່ນໝີ່ນ້ຳ,ໝີ່ທາວ,ໝີ່ຂົ້ວ,ໝີ່ໜຶ້ງ,ໝີ່ດຶງເປັນຕົ້ນ.ມີໝີ່ເສັ້ນໃຫຍ່1ເຊັນຕິແມັດ,ໝີ່ເສັ້ນທໍ່ໃບຜັກແປ້ນ,ໝີ່ແລບທໍ່ເສັ້ນຜົມ,ໝີ່ຮູບເຂົ້າຫຼາມຕັດແລະແຜ່ນໝີ່ທີ່ສັ້ນຍາວບໍ່ເປັນລະບຽບ.ເວົ້າໃນດ້ານລົດຊາດແລ້ວ,ມີລົດຈາງ,ເຄັມ,ເຜັດແລະສົ້ມເປັນຕົ້ນ.
ໄທເຫີນານກິນໝີ່ແມ່ນປ່ຽນໄປຕາມລະດູການ,ໝີ່ຕົ້ມແລະໝີ່ດຶງຕ້ອງ ກິນຮ້ອນໆ,ສ່ວນຫຼາຍກິນໃນຍາມໜາວ.ຍາມຮ້ອນ,ເພິ່ນມັກກິນໝີ່ທາວ,ຄືຕົ້ມໝີ່ສຸກແລ້ວທາວອອກ,ເອົາລົງແຊ່ໃນນ້ຳເຢັນຄາວໜຶ່ງຈຶ່ງທາວ ອອກ,ຮວດນ້ຳຜັກທຽມໃສ່,ໃສ່ສ້າຜັກ,ແລະໝາກແຕງປຸງສົດຕາມມັກ,ກິນແລ້ວເຢັນປາກມ່ອນຄໍ.ເມື່ອຮອດຍາມເດັດເອົາໃຈຕົ້ນຜັກທຽມແລະໝາກຖົ່ວຍາວ,ຄອບຄົວໃດກໍ່ມັກຕົ້ມແກງໃສ່ໃຈຕົ້ນຜັກທຽມແລະໝາກຖົ່ວຍາວເພື່ອລາດໃສ່ໝີ່.ຢູ່ຊົນ ນະບົດ,ຄົນມັກກິນໝີ່ແປ້ງປະສົມ,ເຊັ່ນເອົາແປ້ງໝາກຖົ່ວຂຽວປົນໃສ່,ກໍມີກິ່ນ ຫອມໝາກຖົ່ວຂຽວ.ເວລາກິນໝີ່ຊະນິດນີ້,ຍັງມັກເອົາໃບມັນດ້າງ,ໃບໝາກງາຕົ້ມໃສ່ນຳ,ແມ່ນອາຫານສີຂຽວທີ່ປອດໄພແທ້ໆ.
ໄທເຫີນານມັກກິນໝີ່,ອາດຈະແມ່ນຍ້ອນທ້ອງຖິ່ນນີ້ຜະລິດເຂົ້າເບຼຫຼາຍ.ແຂວງເຫີນານແມ່ນແຂວງກະສິກຳ,ຕັ້ງຢູ່ເຂດທົ່ງພຽງພາກກາງຂອງຈີນ,ດິນຟ້າອາກາດອົບອຸ່ນ,ປູກເຂົ້າເບຼໃນເນື້ອທີ່ສ່ວນຫຼາຍ.ສະນັ້ນ,ອາຫານທີໜຶ່ງຂອງຄົນເຫີນານແມ່ນໝີ່,ຢ່າງໜ້ອຍມື້ໜຶ່ງຕ້ອງກິນຄາບໜຶ່ງ,ສະນັ້ນພວກແມ່ເຮືອນຈຶ່ງປ່ຽນວິທີແຕ່ງກິນເລື້ອຍໆ,ດົນແລ້ວ,ວິທີແຕ່ງກິນຈຶ່ງໄດ້ສືບຕໍ່ກັນມາ ຈົນຮອດປະຈຸບັນ.ບາງຄົນເວົ້າວ່າ,ຄົນເຫີນານໃຈພຽນ,ຊ່າງແຕ່ງກິນ,ໝີ່ທີ່ ເຮັດສູ່ກິນນັ້ນກໍງາມທັງແຊບ.
|
|
