|
|
 |
| (GMT+08:00)
2005-11-01 10:33:45
|
 |
|
ນ້ຳສົ້ມກັບຊີວິດຄົນສ່ານຊີ່
cri
|
ຢູ່ແຫ່ງຕ່າງໆຂອງຈີນມີຮິດຄອງປະເພນີຕ່າງໆ,ເວົ້າໃນດ້ານຮີດຄອງການກິນການດຶ່ມແລ້ວ,ຄວາມແຕກຕ່າງກັນລະຫວ່າງແຫ່ງຕ່າງໆກໍເດັ່ນຊັດທີ່ສຸດ.ຄື ຄົນຫູນານພາກກາງຂອງຈີນມັກກິນເຜັດ,ຄົນເຈີຈ່ຽງພາກຕາເວັນອອກຂອງຈີນມັກກິນຫວານ,ແຕ່ຄົນສ່ານຊີ່ ພາກເໜືອຂອງຈີນກໍ່ພາກຈາກນ້ຳສົ້ມຕະຫຼອດບໍ່ໄດ້ຊີວິດ
ນ້ຳສົ້ມແມ່ນເຄື່ອງປຸງຂອງຈີນມາແຕ່ບູຮານນະການ,ແມ່ນປຸງແຕ່ງດ້ວຍທັນຍາຫັນຕ່າງໆເຊັ່ນເຂົ້າຝ້າງ,ເຂົ້າໂອດ,ມັນດ້າງເປັນຕົ້ນໂດຍຜ່ານການໝັກເຊື້ອ.ມັນສົ້ມຫຼາຍ,ໃຊ້ສຳລັບປຸງແຕ່ງອາຫານໂດຍສະເພາະແມ່ນສາມາດແກ້ກິ່ນຄາວໃນເວລາແຕ່ງປາ.ໃນເວລາກິນຈຽວຈືຄົນຈີນມັກຈ້ຳນ້ຳສົ້ມ.ເວລາກິນປູ,ກໍ່ມັກຈ້ຳນ້ຳສົ້ມທີ່ດອງເສັ້ນຂີງ.ບ່ອນຜະລິດນ້ຳສົ້ມຢູ່ຈີນຫຼາຍທີ່ສຸດ,ແຕ່ບ່ອນທີ່ມີຊື່ສຽງດົງດັງກວ່າໝູ່ແມ່ນຢູ່ແຂວງສ່ານຊີ່ພາກເໜືອຂອງຈີນ.
ແຂວງສ່ານຊີ່ມີນາມມະຍົດເປັນ "ເມືອງນ້ຳສົ້ມ"ແຕ່ບູຮານນະການມານີ້,ເຫດຜົນອັນໜຶ່ງກໍ່ຍ້ອນວ່າຄົນສ່ານຊີ່ມັກກິນນ້ຳສົ້ມ.ຕາມສະຖິຕິ,ປັດຈຸບັນ, ສະເລ່ຍແລ້ວຄົນສ່ານຊີ່ກິນນ້ຳສົ້ມ25.ກຼາມຕໍ່ຄົນຕໍ່ມື້,ເປັນສອງເທົ່າຂອງ ຄົນຈີນທົ່ວປະເທດ.ຢູ່ໂຮງງານຜະລິດນ້ຳສົ້ມນີງຮວ້າຟູທີ່ນະຄອນໄທ້ຢວນເທດສະບານແຂວງສ່ານຊີ່ຊຶ່ງເປັນເປັນໂຮງງານຜະລິດນ້ຳສົ້ມຊື່ດັງກວ່າໝູ່ຂອງແຂວງນີ້,ນັກຂ່າວໄດ້ພົບກັບລູກຄ້າທີ່ເອົາຄຸໃຫຍ່ມາຊື້ນ້ຳສົ້ມ.
ອ້າຍເອີຍ,ຊື້ນ້ຳສົ້ມຫຼາຍປານນີ້ຫວະ?
ເອີ,10ລິດ,ບ້ານຕົນເອງກິນສ່ວນໜຶ່ງ,ຕ້ອນໝູ່ແລະພີ່ນ້ອງສ່ວນໜຶ່ງ.
ນ້ຳສົ້ມຍີ່ຫໍ້ "ຢີ້ຢວນຊິ້ງ"ທີ່ໂຮງງານຜະລິດນ້ຳສົ້ມນີງຮວ້າຟູຜະລິດນັ້ນມີປະຫວັດດົນມາແລ້ວ,ຄົນສ່ານຊີ່ສ່ວນຫຼາຍເຫັນວ່າຍີ່ຫໍ້ນີ້ດີເດັ່ນທີ່ສຸດ.ແຂກທີ່ມາຈາກຕ່າງຖິ່ນເປັນຈຳນວນຫຼວງຫຼາຍກໍມາຊື້ນ້ຳສົ້ມຢູ່ໂຮງງານຜະລິດນ້ຳສົ້ມນີງຮວ້າຟູນະຄອນໄທ້ຢວນຍ້ອນມັນຊື່ດັງທີ່ສຸດ.ນາງລີວລີ້ພະນັກງານຈຳ ໜ່າຍທີ່ໄດ້ເຮັດວຽກຫຼາຍປີຢູ່ໂຮງງານຜະລິດນ້ຳສົ້ມນີ້ກ່າວວ່າ,
ນ້ຳສົ້ມຂອງນີງຮວ້າຟູພວກເຮົາ,ຊື່ສຽງດົງດັງ,ປະຊາຊົນທ້ອງຖິ່ນນີ້ແລະທ້ອງຖິ່ນອື່ນກໍ່ມາສັ່ງນ້ຳສົ້ມນີ້ໂດຍຈຳເພາະ.ຕອນເຊົ້າຫ້າຫົກໂມງແຕ່ລະມື້ກໍມີຄົນມາລຽນແຖວ,ມາສວຍໜ້ອຍໜຶ່ງແລ້ວກໍ່ບໍ່ມີຂາຍແລ້ວ,ຕ້ອງຖ້າຮອດມື້ລຸນອີກ.
ເປັນຫຍັງຄົນສ່ານຊີ່ຈຶ່ງມັກກິນນ້ຳສົ້ມ?ຕາມຜູ້ຊ່ຽວຊານວິເຄາະວ່າ,ອາດ ຈະແມ່ນຍ້ອນນ້ຳແລະດິນຂອງແຂວງສ່ານຊີ່ມີທາດດັ່ງຫຼາຍ,ສະນັ້ນຮ່າງກາຍຄົນຕ້ອງການທາດກົດມາດັດປັບກັນ.ແນວໃດກໍຕາມ,ຄົນສ່ານ ຊີ່ມັກກິນນ້ຳສົ້ມຈົນວ່າບໍ່ມີນ້ຳສົ້ມກໍ່ຈະບໍ່ເປັນພາເຂົ້າ.ທະແນມແຕ່ໄປກິນເຂົ້າຢູ່ສ່ານຊີ່,ຢູ່ເທິງພາເຂົ້າຕ້ອງມີກວດນ້ຳສົ້ມ,ເມື່ອງານລ້ຽງກໍ່ຕ້ອງມີຈານນ້ອຍ ຈານໜຶ່ງຢູ່ໜ້າແຕ່ລະຄົນເພື່ອໄວ້ນ້ຳສົ້ມໂດຍຈຳເພາະ.
ເມື່ອຟັງຄວາມເວົ້າຂອງທ່ານຈ້າວມີງສ່ານຄົນໄທ້ຢວນທີ່ອາຍຸ50ປີ, ທ່ານຈະເຂົ້າໃຈວ່າຄົນສ່ານຊີ່ມັກນ້ຳສົ້ມຫຼາຍເທົ່າໃດແລ້ວ.
ນ້ຳສົ້ມເປັນສິ່ງດີທີ່ສຸດ,ມັນຈະເຮັດໃຫ້ຄົນຈະເລີນອາຫານແລະມີຈິດໃຈສົດຊື່ນ.ຂ້າພະເຈົ້າກິນເຂົ້າ,ບໍ່ມີເກືອບໍ່ເປັນຫຍັງ,ແຕ່ຕ້ອງໃຫ້ມີນ້ຳສົ້ມ,ໃສ່ນ້ຳສົ້ມໜ້ອຍໜຶ່ງແລ້ວບໍ່ວ່າຈະກິນຫຍັງກໍ່ແຊບ,ເວລາເຂົ້ານອນຍາມຄ່ຳຂ້າພະເຈົ້າກໍກິນໜ້ອຍໜຶ່ງ.ຜູ້ອື່ນເອີ້ນຂ້າພະເຈົ້າເປັນໄຫນ້ຳສົ້ມ,ຂ້າພະເຈົ້າເອງກໍ່ຮູ້ສຶກແມ່ນແນວນັ້ນແທ້.
ໜັງສືບູຮານບັນທຶກວ່າ,3000ກວ່າປີກ່ອນ,ບັນພະບຸລຸດຂອງຄົນສ່ານຊີ່ກໍເລີ່ມປຸງແຕ່ງນ້ຳສົ້ມ.,ໃນພື້ນເມືອງສ່ານຊີ່ຍັງຮັກສາມູນເຊື້ອຄອບຄົວປຸງແຕ່ງນ້ຳສົ້ມໂດຍຕົນເອງທີ່ສືບທອດມາຮອດປັດຈຸບັນ.ຖ້າວ່າໃນຍາມຮ້ອນ, ທ່ານໄປບ້ານສອກຫຼີກ,ກໍຈະໄດ້ເຫັນໃຕ້ແດດກ້າ,ຢູ່ໜ້າປະຕູທຸກຫຼັງເຮືອນຊາວກະສິກອນ,ກໍ່ມີໄຫໃຫຍ່ໜ່ວຍໜຶ່ງສຳລັບປຸງແຕ່ງນ້ຳສົ້ມ.
ນ້ຳສົ້ມຂອງແຂວງສ່ານຊີ່ມີຫຼາຍຊະນິດ,ນ້ຳສົ້ມ"ເຫຼົາເຊີນຊູ້"ແມ່ນຜະລິດຕະພັນທີ່ເປັນຕົວແທນ.ຄຳວ່າ"ເຊີນ"ແປວ່າເກົ່າແກ່ຍາວນານ,ນ້ຳສົ້ມເຫຼົາເຊີນຊູ້ມີຊື່ສຽງດົງດັງກວ່າໝູ່ແມ່ນຍ້ອນເວລາປຸງແຕ່ງນ້ຳສົ້ມຍາວກວ່ານ້ຳສົ້ມທຳມະດາ,ແລະວິທີປຸງແຕ່ງກໍ່ສັບສົນກວ່າ.ນ້ຳສົ້ມ"ເຫຼົາເຊີນຊູ້"ຂອງແຂວງສ່ານຊີ່ລົດແຊບ,ທັງສົ້ມທັງຫອມ.ເມືອງຊິ່ງຊູແມ່ນແຫຼ່ງເກີດແລະເຂດຜະລິດນ້ຳສົ້ມ"ເຫຼົາເຊີນຊູ້",ມີນາມມະຍົດວ່າ ເມືອງຫຼວງນ້ຳສົ້ມ,ປະລິມານການຜະລິດກວມຍອດປະລິມານການຜະລິດນ້ຳສົ້ມຂອງທົ່ວແຂວງຕັ້ງ50%ຂຶ້ນໄປ.ຢູ່ເມືອງຊິ່ງຊູ,ບໍ່ຕ້ອງຖາມທາງ,ພຽງແຕ່ເອົາດັງໄປດົມແລ້ວກໍສາມາດຊອກໄດ້ໂຮງ ງານຜະລິດນ້ຳສົ້ມຕາມກິ່ນຫອມນ້ຳສົ້ມ.ໃນຫ້ອງການປຸງແຕ່ງນ້ຳສົ້ມຂອງ ກຸ່ມບໍລິສັດ"ເຫຼົາເຊີນຊູ້"ທີ່ຕັ້ງຢູ່ເມືອງຊິ່ງຊູແຂວງສ່ານຊີ່,ນັກຂ່າວໄດ້ຮູ້ຈັກວ່າ, ການຜະລິດນ້ຳສົ້ມ"ເຫຼົາເຊີນຊູ້"ຢ່າງເປັນທາງການໄດ້ຫຼາຍເຖິງ80ກວ່າຂັ້ນຕອນ,ນອກຈາກບາງຂັ້ນຕອນຕ້ອງໃຊ້ແຮງງານຄົນນັ້ນແລ້ວ,ການຜະລິດທັງໝົດໄດ້ເປັນແບບອັດແຈບແລະແບບອັດຕະໂນມັດ.ທ່ານເຢນໄຫເດີວິສະວະ ກອນໃຫຍ່ຂອງກຸ່ມບໍລິສັດ"ເຫຼົາເຊີນຊູ້"ກ່າວວ່າ,
ຈຸດພິເສດຂອງການຜະລິດນ້ຳສົ້ມ"ເຫຼົາເຊີນຊູ້"ແມ່ນເວລາໝັກເຊື້ອຍາວ,ອຸນຫະພູມໝັກເຊື້ອສູງ.ຮັກສາໄວ້1ປີຫາ5ປີແລ້ວຈຶ່ງຈະກາຍເປັນນ້ຳສົ້ມ"ເຫຼົາເຊີນຊູ້"ຢ່າງແທ້ຈິງ.ນ້ຳສົ້ມສຳເລັດຮູບມີສີສັນດຳເຫຼື້ອມ,ເນື້ອໜຽວ,ກິ່ນສົ້ມປຸກທີ່ສຸດ,ມີຈຸດພິເສດທີ່ຮັກສາໄວ້ແຮ່ງດົນທໍ່ໃດ,ກິ່ນສົ້ມກໍແຮ່ງທໍ່ນັ້ນແລະຮັກສາໄວ້ດົນເທົ່າໃດກໍ່ບໍ່ປ່ຽນທາດ.
ຄົນສ່ານຊີ່ທີ່ມັກນ້ຳສົ້ມຍັງໄດ້ຄົ້ນພົບຄຸນປະໂຫຍດພິລຶກຂອງນ້ຳສົ້ມ. ຕົວຢ່າງວ່າ,ກິນນ້ຳສົ້ມສາມາດເຮັດໃຫ້ສາຍເລືອດອ່ອນ,ດັດສົມມັນເລືອດ, ປ້ອງກັນສາຍເລືອດແຂງ,ກິນໄຂ່ໄກ່ດອງນ້ຳສົ້ມສາມາດປ້ອງກັນແລະປິ່ນ ປົວສາຍເລືອດແຂງ,ເລືອດດັນສູງ,ພະຍາດກະດູກ,ພະຍາດເບົາຫວານ, ພະຍາດປະດົງຂໍ້,ພະຍາດນອນບໍ່ຫຼັບເປັນຕົ້ນ.ຈັດເອົານ້ຳສົ້ມເປັນຢາ,ກໍ່ມີຄຸນລັກສະນະເກີດຜົມເສີມສວຍແລະລົດຄວາມອ້ວນ.ນີ້ແມ່ນຍ້ອນນ້ຳສົ້ມນອກຈາກມີອາສິດນ້ຳສົ້ມຫຼວງຫຼາຍແລ້ວ,ຍັງມີທາດການຊີອົມ ເຫຼັກ ອາສິດນົມ ນ້ຳມັນກຼີເຊີລີນ ອາມີໂນອາສິດເປັນຕົ້ນ,ທັງໝົດເຫຼົ່ານີ້ມີຜົນດີຕໍ່ຮ່າງກາຍຄົນ.
ຄຽງຄູ່ກັບຄົນເຮົາມີຄວາມຮູ້ກ່ຽວກັບນ້ຳສົ້ມນັບມື້ນັບຫຼາຍຂຶ້ນ,ນັກທຸລະ ກິດຜະລິດນ້ຳສົ້ມຂອງແຂວງສ່ານຊີ່ຍັງທະຍອຍກັນຄົ້ນຄວ້າຜະລິດນ້ຳສົ້ມສຸກຂະນະໄມ,ນ້ຳສົ້ມເປັນຢາແລະນ້ຳສົ້ມເປັນເຄື່ອງດື່ມນາໆຊະນິດ,ໄດ້ຮັບຄວາມນິຍົມຊົມຊອບໃນຕະຫຼາດພາຍໃນປະເທດແລະພົ້ນທະເລ.ປັດຈຸບັນ, ນ້ຳສົ້ມເຫຼົາເຊີນຊູ້ໄດ້ສົ່ງອອກຈຳໜ່າຍຢູ່ສິບກວ່າປະເທດເຊັ່ນ,ໂອສຕາລີ,ການາດາ,ສິງກະໂປ,ສ.ເກົາຫຼີ, ອາເມລິກາເປັນຕົ້ນ.
|
|
|
