|
ຫວ່າງກ່ອນນີ້ບໍ່ດົນ,ກອງປະຊຸມພາສາຈີນຂອງໂລກໄດ້ຈັດຂຶ້ນຢູ່ປັກກິ່ງ.ນັກຂ່າວໄດ້ຊາບຈາກກອງປະຊຸມເທື່ອນີ້ວ່າ,ປະຈຸບັນ,ຄົນຕ່າງປະເທດນັບມື້ນັບຫຼາຍໄດ້ຮຽນພາສາຈີນດ້ວຍຫຼາຍຮູບຫຼາຍແບບ.
ພາສາຈີນແມ່ນໜຶ່ງໃນພາສາທີ່ມີຄົນໃຊ້ຫຼາຍກວ່າໝູ່ໃນໂລກ.ໃນຫຼາຍປີມານີ້,ຄຽງຄູ່ກັບຈີນໄດ້ເປີດປະຕູສູ່ພາຍນອກຕື່ມອີກແລະເສດຖະກິດໄດ້ພັດທະນາຢ່າງສືບເນື່ອງແລະໄວວາ.ການໄປມາຫາສູ່ ແລະຕິດຕໍ່ພົວພັນກັນລະຫວ່າງຈີນກັບບັນດາປະເທດໃນໂລກນັບມື້ນັບກວ້າງຂວາງແລະລົງສູ່ລວງເລິກເຊິ່ງ.ພາສາຈີນໃນຖານເປັນພາຫະນະສຳຄັນສຳລັບມວນຊົນບັນດາປະເທດຊອກຮູ້ຈີນ,ນັບມື້ນັບໄດ້ຮັບຄວາມເອົາໃຈໃສ່ຈາກລັດຖະບານແລະອົງການການສຶກສາຂອງຫຼາຍໆປະເທດ.
ໃນຄົນຕ່າງປະເທດທີ່ຮຽນພາສາຈີນ,ຄົນຢູ່ປະເທດອ້ອມຂ້າງຂອງຈີນເຊັ່ນ,ຫວຽດນາມ,ໄທ,ສ.ເກົາຫຼີ,ຍີ່ປຸ່ນເປັນຕົ້ນຫຼາຍກວ່າໝູ່.ການຮຽນພາສາຈີນແມ່ນນິຍົມກັນຫຼາຍຢູ່ປະເທດເຫຼົ່ານີ້.
ທ່ານວູມິນທວນ ເຈົ້າໜ້າທີ່ກະຊວງສຶກສາອົບຮົມຂອງຫວຽດນາມຊີ້ອອກວ່າ,ຊາວໜຸ່ມຫວຽດນາມຈຳນວນຫຼວງຫຼາຍນິຍົມຮຽນພາສາຈີນ.ທ່ານກ່າວວ່າ:"ປັນຈຸບັນ,ນັກຮຽນຫວຽດນາມນິຍົມຮຽນພາສາຈີນທີ່ສຸດ.ນອກຈາກມະຫາວິທະຍາໄລແລ້ວ,ຍັງມີສູນພາສາຈີນຫຼາຍໆແຫ່ງໄດ້ຕັ້ງຫຼັກສູດສອນພາສາຈີນ.ນັກຮຽນຈຳນວນຫຼວງຫຼາຍໄດ້ ໃຊ້ເວລາຫວ່າງມາຮຽນພາສາຈີນ."
ທີ່ຈິງແລ້ວ,ບໍ່ສະເພາະແຕ່ຢູ່ຫວຽດນາມເທົ່ານັ້ນ,ໃນທົ່ວອາຊີອາຄະເນ,ມວນຊົນລ້ວນແຕ່ມີຄວາມຫ້າວຫັນຫຼາຍທີ່ສຸດໃນການຮຽນພາສາຈີນ.ມະຫາວິທະຍາໄລ,ໂຮງຮຽນມັດທະຍົມແລະປະຖົມຫຼາຍໆແຫຼ່ງລ້ວນແຕ່ໄດ້ຕັ້ງຫຼັກສູດສອນພາສາຈີນ,ອົງການອົບຮົມທາງສັງຄົມຈຳນວນໜຶ່ງກໍໄດ້ເຂົ້າຮ່ວມຖັນແຖວດຳເນີນການສິດສອນພາສາຈີນ.ຕາມສະຖິຕິ,ປັດຈຸບັນ,ຈຳນວນຄົນທີ່ຮຽນພາສາຈີນຢູ່ອາຊີອາຄະເນມີປະມານ1ລ້ານ6ແສນຄົນ.
ຢູ່ສ.ເກົາຫຼີແລະຍີ່ປຸ່ນທີ່ຢູ່ອາຊີຕາເວັນອອກ, ມີຄົນຮຽນພາສາຈີນຢ່າງຫຼວງຫຼາຍຕະຫຼອດມາ.ຢູ່ສ.ເກົາຫຼີ ມີມະຫາວິທະຍາໄລເກືອບ200ຫຼັງໄດ້ ຕັ້ງຫຼັກສູດສອນພາສາຈີນ,ພາສາຈີນໄດ້ຖືກຈັດເຂົ້າເປັນວິຊາສອບເສັງເຂົ້າມະຫາວິທະຍາໄລຢ່າງເປັນທາງການ.ປັດຈຸບັນ,ຢູ່ຍີ່ປຸ່ນມີ2ລ້ານກວ່າຄົນຮຽນພາສາຈີນ, ໃນເກືອບ20ປີມານີ້,ຈຳນວນໂຮງຮຽນມັດທະຍົມປາຍທີ່ຕັ້ງຫຼັກສູດສອນພາສາຈີນໄດ້ເພີ່ມຂຶ້ນ10ເທົ່າ.
ພາຍຫຼັງໄດ້ຊອກຮູ້ສະພາບການຮຽນພາສາຈີນຂອງຄົນອາຊີແລ້ວ,ພວກເຮົາມາເບິ່ງວ່າ,ພາສາຈີນມີຜົນສະທ້ອນແນວໃດຢູ່ເອີລົບ.
ນາງເຄີສະຕິນ ສະທອມ ແມ່ນນັກສຶກສາຜູ້ໜຶ່ງຂອງມະຫາວິທະຍາໄລມິນສະເຕນແຫ່ງເຢຍລະມັນ.ໃນຍາມຮຽນຢູ່ມັດທະຍົມປາຍ,ນາງກໍ ສົນໃຈນຳພາສາຈີນແລະຈີນຫຼາຍທີ່ສຸດ.ແຕ່ໃນຄາວນັ້ນ,ໂຮງຮຽນມັດທະຍົມປາຍຂອງນາງຍັງບໍ່ທັນໄດ້ຕັ້ງຫຼັກສູດສອນພາສາຈີນ,ສະນັ້ນ,ຄວາມປາຖະໜາຢາກຮຽນພາສາຈີນຂອງນາງ ບໍ່ໄດ້ຮັບການຕອບສະໜອງ.ພາຍຫຼັງເຂົ້າມະຫາວິທະຍາໄລແລ້ວ,ນາງ ເຄີສະຕິນໄດ້ເລືອກຮຽນວິຊາພາສາຈີນຢ່າງສົມຫວັງ.ເມື່ອໄດ້ຮຽນພາສາຈີນມາ4ປີແລ້ວ,ດຽວນີ້ນາງສາມາດລົມກັບຜູ້ອື່ນດ້ວຍພາສາຈີນຢ່າງຫຼ່ຽນໄຫຼ.ນາງບອກນັກຂ່າວວ່າ,ການຮຽນພາສາຈີນແມ່ນການຄັດເລືອກທີ່ສະຫຼາດ.
"ດຽວນີ້,ຢູ່ຈີນມີໂອກາດຢ່າງຫຼວງຫຼາຍ,ຫຼາຍບໍລິສັດຂອງເຢຍລະມັນລ້ວນແຕ່ໄດ້ຕັ້ງ ສາຂາຢູ່ຈີນ.ການພົວພັນດ້ານການຄ້າລະຫວ່າງເຢຍລະມັນກັບຈີນນັບມື້ນັບແໜ້ນແຟ້ນຂຶ້ນ.ສະນັ້ນ,ຂ້າພະເຈົ້າຄິດວ່າຮຽນພາສາຈີນຈະມີຜົນດີຕໍ່ການຫາວຽກເຮັດງານທຳ."
ນາງ ເຄີສະຕິນ ກ່າວວ່າ,ປັດຈຸບັນ,ຢູ່ເຢຍລະມັນ,ຈຳນວນຄົນຮຽນພາສາຈີນນັບມື້ນັບຫຼາຍຂຶ້ນ.ໃນຍາມນາງຫາກໍ່ເຂົ້າມະຫາວິທະຍາໄລ,ຫ້ອງພາສາຈີນມີແຕ່ນັກສຶກສາຫ້ອງລະ10ຄົນເທົ່ານັ້ນ,ແຕ່ປັດຈຸບັນ ຫ້ອງໃດກໍມີ40ຄົນແລ້ວ.
ຢູ່ປະເທດອື່ນໆໃນເອີລົບ,ການສອນພາສາຈີນກໍພວມໄດ້ຮັບການເຜີຍແຜ່,ຕົວຢ່າງຄື,ປັດຈຸບັນ,ຢູ່ຝະຣັ່ງມີ3ໝື່ນຄົນພວມຮຽນພາສາຈີນ,ເປັນທີໜຶ່ງໃນເອີລົບ.ອັງກິດກັບພາກສ່ວນທີ່ກ່ຽວຂ້ອງຂອງຈີນໄດ້ຮ່ວມມືຮຽບຮຽງແບບຮຽນພາສາຈີນສຳລັບໂຮງຮຽນມັດທະຍົມ.ຢູ່ຣັດເຊຍ,ຜູ້ມີຄວາມສາມາດດ້ານພາສາຈີນ ໄດ້ຮັບຄວາມນິຍົມຊົມຊອບຫຼາຍ. ຫຼາຍໆ ບໍລິສັດ ຍິນດີໃຫ້ເງິນເດືອນສູງເພື່ອຍາດແຍ່ງຜູ້ມີຄວາມຮູ້ຄວາມສາມາດດ້ານພາສາຈີນກັບກະຊວງການຕ່າງປະເທດເປັນຕົ້ນ.
ຢູ່ອາເມລິກາທີ່ມີມະຫາສະໝຸດປາຊີຟິກຂັ້ນກັບຈີນ,ປັດຈຸບັນ, ພາສາຈີນໄດ້ກາຍເປັນພາສາຕ່າງປະເທດທີ່ມີຄົນຮຽນເພີ່ມຂຶ້ນໄວກວ່າໝູ່.ທ່ານຄາສຕັນ ແຄເປີຕັນ ປະທານສະພາມະຫາວິທະຍາໄລອາເມລິກາກໍໄດ້ເຂົ້າຮ່ວມກອງປະຊຸມພາສາຈີນຂອງໂລກທີ່ຈັດຂຶ້ນຢູ່ປັກກິ່ງ.ທ່ານກ່າວວ່າ,ຢູ່ອາເມລິກາໄດ້ມີມະຫາວິທະຍາໄລເກືອບ30%ໄດ້ຕັ້ງຫຼັກສູດສອນພາສາຈີນແລ້ວ.ຊອບແວສອນພາສາຈີນທີ່ລັດຖະບານຈີນອາເມລິກາຮ່ວມກັນພັດທະນານັ້ນໄດ້ຜ່ານຈາກອິນເຕີເນັດເຂົ້າສູ່ໂຮງຮຽນປະຖົມແລະມັດທະຍົມຂອງອາເມລິກາແລ້ວ.ທ່ານກ່າວວ່າ:
"ພວກຂ້າພະເຈົ້າພວມສຸມກຳລັງເຂົ້າໃນວຽກງານທີ່ພິເສດທີ່ສຸດ,ຄືເຜີຍແຜ່ພາສາຈີນຢູ່ໂຮງຮຽນປະຖົມ,ມັດທະຍົມແລະມະຫາວິທະຍາໄລຂອງອາເມລິກາ,ໃຫ້ພວກນັກຮຽນນັກສຶກສາຮຽນຮູ້ວັດທະນະທຳຈີນ.ຂ້າພະເຈົ້າຍິນດີກ່າຍຂົວສະພານແຫ່ງການແລກປ່ຽນແລະຕິດຕໍ່ພົວພັນກັນລະຫວ່າງຈີນອາເມລິກາ."
ຜ່ານຈາກການແນະນຳດັ່ງກ່າວ,ທ່ານອາດຈະເຂົ້າໃຈໃນລະດັບໃດໜຶ່ງຕໍ່ສະພາບການພັດທະນາໃນທົ່ວໂລກຂອງການສິດສອນພາສາຈີນແລ້ວ.ຕາມສະຖິຕິ,ປັດຈຸບັນ,ຈຳນວນຄົນທີ່ຮຽນພາສາຈີນດ້ວຍຮູບການຕ່າງໆຂອງບັນດາປະເທດໃນໂລກໄດ້ລື່ນກາຍ30ລ້ານຄົນແລ້ວ.
ຈຳນວນຄົນທີ່ຮຽນພາສາຈີນໄດ້ເພີ່ມຂຶ້ນຢ່າງໄວວາ,ເຮັດໃຫ້ຫຼາຍໆປະເທດມີຄວາມຕ້ອງການເພີ່ມຂຶ້ນເລື້ອຍໆໃນການສອນພາສາຈີນແລະຄູສອນພາສາຈີນ.ເພື່ອຕອບສະໜອງຄວາມຮຽກຮ້ອງຕ້ອງການດັ່ງກ່າວ,ຈີນໄດ້ໃຊ້ຫຼາຍມາດຕະການ,ຕົວຢ່າງຄື,ສ້າງໜ່ວຍນຳພາການສອນພາສາຈີນຕໍ່ຕ່າງປະເທດແຫ່ງຊາດຈີນ,ຮັບຜິດຊອບການປະສານວຽກງານສອນພາສາຈີນຕໍ່ຕ່າງປະເທດ,ເພີ່ມການລົງທຶນເທື່ອລະກ້າວ,ຮຽບຮຽງແລະພິມຈຳໜ່າຍແບບຮຽນພາສາຈີນທີ່ມີຫຼາຍຮູບແບບ,ເພີ່ມທະວີການບຳລຸງສ້າງແລະແຕ່ງຄູສອນພາສາຈີນໄປຕ່າງປະເທດ.ແຕ່ງຄູສອນແລະຜູ້ອາສາສະໝັກສອນພາສາຈີນໄປປະເທດຕ່າງໆ.ນອກນີ້,ຈີນຍັງໄດ້ຕັ້ງສະຖາບັນຂົງຈື້27ແຫ່ງຢູ່ແຫ່ງຕ່າງໆໃນໂລກ,ສະຖາບັນຂົງຈື້ເຫຼົ່ານີ້ໄດ້ອວ່າຍໜ້າໄປສູ່ບຸກຄົນວົງການຕ່າງໆໃນສັງຄົມ,ດຳເນີນການສອນພາສາຈີນແລະເຜີຍແຜ່ວັດທະນະທຳຈີນ.
|
