|
ສະບາຍດີທ່ານຜູ່ຟັງທີ່ໂຄລົບ, ຫຼັງຈາກງານກິລາໂອລິມປິກອາແຕນປີ 2004 ສິ້ນສຸດລົງແລ້ວ, ຜູ່ມັກກິລາໃນທົ່ວໂລກລ້ວນແຕ່ສັກສາຍຕາໃສ່ງານກິລາໂອລິມປິກປັກກິ່ງປີ 2008. ສ່ວນງານແຂ່ງຂັນດອກປີກໄກ່ໝູ່ຄະນະຍິງຊາຍປະສົມຊິງຂັນຊູດີມານທີ່ຈັດຂຶ້ນໃນເດືອນພຶດສະພາປີ 2005, ແມ່ນງານກິລາລະດັບໂລກເທື່ອທຳອິດທີ່ຈັດຂຶ້ນຢູ່ທີ່ປັກກິ່ງໃນໄລຍະປັກກິ່ງກະກຽມງານກິລາໂອລິມປິກປີ 2008. ສະນັ້ນ ປັກກິ່ງຈຶ່ງຖືເອົາການຈັດງານແຂ່ງຂັນດອກປີກໄກ່ຊິງຂັນຊູດີມານເທື່ອນີ້ເປັນການອຸ່ນຄິງທີ່ສຳຄັນເທື່ອໜຶ່ງກ່ອນຈັດງານກິລາໂອລິມປິກ, ພະຍາຍາມເຮັດຕາມມາດຖານງານກິລາໂອລິມປິກໃນທຸກດ້ານ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວທີ່ພາດຫົວເລື່ອງວ່າ: ຂັນຊູດີມານເປັນການອຸ່ນຄີງກ່ອນງານກິລາໂອລິມປິກປັກກິ່ງປີ 2008.
ແຕ່ວັນທີ 10 ຮອດວັນທີ 15 ພຶດສະພາປີ 2005, ງານແຂ່ງຂັນດອກປີກໄກ່ໝູ່ຄະນະຍິງຊາຍປະສົມຊິງຂັນຊູດີມານຄັ້ງທີ 9 ໄດ້ຈັດຂຶ້ນຢູ່ທີ່ປັກກິ່ງ. ງານແຂ່ງຂັນເທື່ອນີ້ໄດ້ດຶງດູດຄວາມເອົາໃຈໃສ່ຂອງສື່ມວນຊົນ 500 ກວ່າແຫ່ງໃນທົ່ວໂລກ, ມີນັກຂ່າວ 80 ກວ່າຄົນຂອງປະເທດແລະເຂດແຄວ້ນເຊິ່ງນອກຈາກຈີນໄດ້ມາເອົາຂ່າວ. ເນື່ອງຈາກປັກກິ່ງແມ່ນເຈົ້າພາບງານກິລາໂອລິມປິກ, ສະນັ້ນ ງານແຂ່ງຂັນດອກປີກໄກ່ຊິງຂັນຊູດີມານ ເຊິ່ງເປັນງານແຂ່ງຂັນຂະໜາດໃຫຍ່ລາຍທຳອິດທີ່ຈັດຂຶ້ນຢູ່ທີ່ປັກກິ່ງຫຼັງຈາກປັກກິ່ງເຂົ້າສູ່ໄລຍະກະກຽມງານກິລາໂອລິມປິກ ຈຶ່ງໄດ້ຖືກສົນໃຈຫຼາຍ. ກ່ອນເປີດງານແຂ່ງຂັນດອກປີກໄກ່ຊິງຂັນຊູດີມານ, ທ່ານຕ້ວນຊືເຈ ຮອງຫົວໜ້າກົມໃຫຍ່ກິລາແຫ່ງຊາດຈີນໄດ້ເນັ້ນເຖິງຄວາມໝາຍສຳຄັນຂອງງານແຂ່ງຂັນເທື່ອນີ້ທີ່ມີຕໍ່ປັກກິ່ງ, ທ່ານເວົ້າວ່າ:
ງານແຂ່ງຂັນດອກປີກໄກຊິງຂັນຊູດີມານເທື່ອນີ້ແມ່ນໜຶ່ງໃນບັນດາງານແຂ່ງຂັນສຳຄັນພາຍຫຼັງປັກກິ່ງເຂົ້າສູ່ໄລຍະກະກຽມງານກິລາໂອລິມປິກ, ກໍ່ແມ່ນການອຸ່ນຄິງຮອບດ້ານເທື່ອນຶ່ງກ່ອນງານກິລາໂອລິມປິກປີ 2008. ເດືອນແລ້ວນີ້, ພະນັກງານແກນກາງຂອງພາກສ່ວນແຂ່ງຂັນທຸກປະເພດຂອງພວກຂ້າພະເຈົ້າໄດ້ເລີ່ມເຕົ້າໂຮມຢູ່ຄະນະກຳມະການຈັດຕັ້ງງານກິລາໂອລິມປິກ, ກໍ່ໝາຍຄວາມວ່າ ເລີ່ມແຕ່ດຽວນີ້ເປັນຕົ້ນໄປ, ຫົວໜ້າແລະພະນັກງານແກນກາງຂອງພາກສ່ວນແຂ່ງຂັນຂອງ 28 ລາຍການແຂ່ງຂັນປະເພດໃຫຍ່ຂອງງານກິລາໂອລິມປິກເລີ່ມພິຈາລະນາແລະກຽມການແຂ່ງຂັນໃນງານກິລາໂອລິມປິກປີ 2008, ໃນນັ້ນ, ການແຂ່ງຂັນດອກປີກໄກ່ແມ່ນປະເພດໜຶ່ງທີ່ສຳຄັນ. ສະນັ້ນ ການຈັດຕັ້ງການແຂ່ງຂັນເທື່ອນີ້, ຂ້າພະເຈົ້າເຫັນວ່າແມ່ນການອຸ່ນຄິງເທື່ອໜຶ່ງສຳລັບວຽກງານຈັດຕັ້ງງານກິລາໂອລິມປິກປີ 2008.
ຖືເປັນການອຸ່ນຄີງ, ກໍ່ຕ້ອງພະຍາຍາມເຮັດຕາມມາດຖານງານກິລາໂອລິມປິກ. ວຽກງານຈັດຕັ້ງງານແຂ່ງຂັນດອກປີກໄກ່ຊິງຂັນຊູດີມານຄັ້ງນີ້ມີຈຸດພິເສດພົ້ນເດັ່ນຫຼາຍຂໍ້ຄືດັ່ງລຸ່ມນີ້: ກ່ອນອື່ນແມ່ນການບໍລິການສື່ມວນຊົນໄດ້ເຮັດຕາມມາດຖານສາກົນ. ງານກິລາໂອລິມປິກແມ່ນງານກິລາທີ່ທົ່ວໂລກສົນໃຈນຳ, ການບໍລິການສື່ມວນຊົນຕ້ອງພິຈາລະນາເຖິງຄວາມຕ້ອງການຂອງນັກຂ່າວທີ່ມາຈາກແຫ່ງຕ່າງໆໃນທົ່ວໂລກ. ສະນັ້ນ ການຈັດຕັ້ງງານແຂ່ງຂັນດອກປີກໄກ່ຊິງຂັນຊູດີມານເທື່ອນີ້, ຈີນໄດ້ລົງທຶນ 1 ແສນຢວນເຂົ້າໃນຮາດແວອິນເທີເນັດ, ບໍ່ພຽງແຕ່ໄດ້ຮັບປະກັນມີປ່ອງສຸບສາຍກວ້າງເປັນຈຳນວນຫຼວງຫຼາຍ, ຕັ້ງເຂດ ເຄືອຂ່າຍອິນເທີເນັດໄຮ້ສາຍຢູ່ສະໜາມແຂ່ງຂັນ, ຍັງໄດ້ຮັບປະກັນມີປ່ອງສຸບສົ່ງຂ່າວຜ່ານເຄືອຂ່າຍອິນເທີເນັດສາກົນທີ່ໝັ້ນທ່ຽງແລະບໍລິມາດສູງ, ນີ້ກໍໄດ້ອຳນວຍຄວາມສະດວກຫຼາຍແກ່ນັກຂ່າວທີ່ມາເອົາຂ່າວ. ພ້ອມກັນນັ້ນ, ໂດຍພິຈາລະນາເຖິງງານແຂ່ງຂັນສາກົນຂະໜາດໃຫຍ່ມັກຈະກາຍເປັນເປົ້າໝາຍຫຼອນໂຈມຕີຂອງແຮັກເກີອິນເທີເນັດ, ຜູ່ຈັດງານແຂ່ງຂັນໄດ້ຕິດຕັ້ງກຳແພງກັນໄວລັດຄອມພິວເຕີຫຼາຍຊັ້ນຢູ່, ທັງມີນັກວິຊາການຄອຍຖ້າຄຳສັ່ງປ້ອງກັນຢູ່ທຸກເວລາ. ທ່ານຣາແຟນ ນັກຂ່າວເວັບໄຊຝ່າຍທາງການສະຫະພັນດອກປີກໄກ່ສາກົນເຄີຍລາຍງານຂ່າວງານແຂ່ງຂັນສາກົນຂະໜາດໃຫຍ່ຫຼາຍເທື່ອເຊິ່ງລວມທັງງານກິລາໂອລິມປິກ, ສຳລັບວຽກງານຈັດຕັ້ງງານແຂ່ງຂັນດອກປີກໄກ່ຊິງຂັນຊູດີມານເຊິ່ງເປັນການອຸ່ນຄີງກ່ອນງານກິລາໂອລິມປິກເທື່ອນີ້, ທ່ານໄດ້ຕີລາຄາສູງ. ທ່ານເວົ້າວ່າ:ເວົ້າລວມແລ້ວ, ການບໍລິການສື່ມວນຊົນດີຫຼາຍ, ມີປະສິດທິພາບສູງ, ນັກຂ່າວແລະຊ່າງຖ່າຍຮູບຂຶ້ນອິນເທີເນັດພ້ອມກັນໄດ້. ຜູ່ບໍລິການກໍ່ສີປາກດີ, ສາມາດຊ່ອຍເຫຼືອພວກຂ້າພະເຈົ້າ, ພວກເຂົາເຈົ້າຜູ່ໃດກໍເວົ້າພາສາອັງກິດເປັນ. ເວົ້າລວມແລ້ວ, ຂ້າພະເຈົ້າເພິ່ງພໍໃຈທີ່ສຸດ. ຂ້າພະເຈົ້າກໍ່ເຄີຍໄປອາແຕນ, ຢູ່ທີ່ນີ້ຍິ່ງເຮັດໃຫ້ຂ້າພະເຈົ້າມີຄວາມຮູ້ສຶກຢ່າງເລິກເຊິ່ງກວ່ານັ້ນແມ່ນ ຄວາມໄວຂອງສາຍກວ້າງໄວກວ່າຫຼາຍ, ນີ້ສຳຄັນຫຼາຍ.
ນອກຈາກການບໍລິການສື່ມວນຊົນແລ້ວ, ການສະໜອງການບໍລິການຄຸນນະພາບດີໃຫ້ນັກກິລາ, ກໍ່ແມ່ນວຽກໜຶ່ງທີ່ຕ້ອງເອົາໃຈໃສ່ເປັນພິເສດໃນງານກິລາໂອລິມປິກ, ຄະນະກຳມະການໂອລິມປິກສາກົນໄດ້ກ່າວເນັ້ນຊ້ຳແລ້ວຊ້ຳອີກວ່າ, ນັກກິລາຈຶ່ງແມ່ນພະເອກຂອງງານກິລາໂອລິມປິກ. ງານແຂ່ງຂັນດອກປີກໄກ່ຊິງຂັນຊູດີມານເທື່ອນີ້ ມີນັກກິລາພຽງ 400 ກວ່າຄົນທໍ່ນັ້ນ, ສ່ວນງານກິລາໂອລິມປິກພັດມີນັກກິລາ 1 ໝື່ນກວ່າຄົນ, ແຕ່ຜູ່ຈັດຕັ້ງຍັງຄົງຫວັງຖອດຖອນເອົາບົດຮຽນໃນດ້ານຂໍ້ປີກຍ່ອຍບາງຢ່າງ, ຕົວຢ່າງຄື ໃນການຈັດວາງການພັກເຊົາແລະຄົມມະນາຄົມ, ຜູ່ຈັດຕັ້ງໄດ້ຈັດວາງການກິນການຢູ່ແລະລົດພິເສດຢ່າງພຽນໃຈໃຫ້ນັກກິລາ. ຕໍ່ວຽກງານບໍລິການຕ້ອນຮັບຂອງຄະນະກຳມະການຈັດຕັ້ງນັ້ນ, ນັກກິລາທັງຫຼາຍລ້ວນແຕ່ສະແດງຄວາມເພິ່ງພໍໃຈ. ທ້າວລຸນກາອາດ ນັກກິລາຕີຄູ່ເພດຊາຍທີມດານມາກເວົ້າວ່າ: ຂ້າພະເຈົ້າຮູ້ສຶກດີໃຈຫຼາຍທີ່ໄດ້ມາເຂົ້າຮ່ວມງານແຂ່ງຂັນ. ວຽກງານຈັດຕັ້ງດີຫຼາຍ, ສະໜາມຝຶກແອບແລະສະໜາມແຂ່ງຂັນຂອງພວກຂ້າພະເຈົ້າລ້ວນແຕ່ຮັກສາໄດ້ດີ. ຂ້າພະເຈົ້າເຫັນວ່າ, ຜູ່ຈັດຕັ້ງຂອງຈີນໄດ້ເຮັດວຽກກະກຽມເປັນຢ່າງດີ.
ໃນການອຸ່ນຄີງເທື່ອນີ້, ຜູ່ຈັດຕັ້ງງານກິລາໂອລິມ ປິກໃນພາຍໜ້າກໍ່ໄດ້ພົບເຫັນຂໍ້ຂາດຕົກບົກຜ່ອງບາງຢ່າງທີ່ຕ້ອງໄດ້ແກ້ໄຂ. ແຕ່ຍ້ອນເປັນການອຸ່ນຄີງ, ກໍ່ແມ່ນຖອດຖອນເອົາບົດຮຽນ ແກ້ໄຂບັນຫາ, ແລະເປັນຄຳເຕືອນຕໍ່ວຽກງານຈັດຕັ້ງງານກິລາໂອລິມປິກປັກກິ່ງ. ໃນ 3 ປີຂ້າງໜ້ານີ້, ປັກກິ່ງຍັງຈະຈັດງານແຂ່ງຂັນລະດັບໂລກຫຼາຍສິບເທື່ອ, ເພື່ອເປັນການອຸ່ນຄີງສຳລັບງານກິລາໂອລິມປິກ. ເຊື່ອວ່າຮອດປີ 2008, ຜູ່ຈັດຕັ້ງງານກິລາໂອລິມປິກປັກກິ່ງຍ່ອມຈະມີບົດຮຽນອັນອຸດົມສົມບູນ, ແລະຈະຈັດງານກິລາໂອລິມປິກຢ່າງສຳເລັດຜົນທີ່ສຸດ.
|
