|
ສະບາຍດີທ່ານຜູ່ຟັງທີ່ໂຄລົບ, ການທີ່ຈັດງານກິລາໂອລິມປິກປີ 2008 ເປັນງານກິລາໂອລິມປິກລະດັບສູງແລະສຳເລັດຜົນ ແມ່ນເປົ້າໝາຍທີ່ນະຄອນປັກກິ່ງອອກແຮງສະແຫວງຫາ. ແຕ່ວ່າ, ຍ້ອນການກໍ່ສ້າງສະໜາມກິລາໂອລິມປິກຕ້ອງລົງທຶນຫຼາຍ, ຖ້າຫາກບໍ່ໄດ້ນຳໃຊ້ສະໜາມກິລາເຫຼົ່ານີ້ເປັນຢ່າງດີຫຼັງຈາກ ງານກິລາໂອລິມປິກສິ້ນສຸດລົງແລ້ວ, ການລົງທຶນກໍຈະເປັນການຟູມເຟືອຍ. ສະນັ້ນ, ໃນເວລາອອກແບບແລະກໍ່ສ້າງສະໜາມກິລາໂອລິມປິກ, ນະຄອນປັກກິ່ງກໍ່ໄດ້ພິຈາລະນາເຖິງບັນຫານຳໃຊ້ສະໜາມກິລາຫຼັງງານກິລາໂອລິມປິກ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ນະຄອນປັກກິ່ງເອົາໃຈໃສ່ນຳບັນຫາການນຳໃຊ້ສະໜາມກິລາຫຼັງງານກິລາໂອລິມປິກ.
ການຈັດງານກິລາໂອລິມປິກປັກກິ່ງ ຕ້ອງການກໍ່ສ້າງສະໜາມກິລາຫຼາຍໆແຫ່ງ, ເມື່ອງານກິລາໂອລິມປິກສິ້ນສຸດລົງ ຖ້າສະໜາມກິລາເຫຼົ່ານີ້ບໍ່ສາມາດເສີມຂະຫຍາຍບົດບາດຂອງພວກມັນ ແລະສ້າງປະສິດທິຜົນທາງເສດຖະກິດແລະສັງຄົມອັນໃຫຍ່ຫຼວງໃຫ້ນະຄອນປັກກິ່ງແລ້ວ, ຊັບພະຍາກອນສັງຄົມອັນມະຫາສານກໍ່ຈະເສຍໄປລ້າໆ. ເພື່ອຫຼີກເວັ້ນບໍ່ໃຫ້ສະພາບການດັ່ງກ່າວເກີດຂຶ້ນ, ເລີ່ມແຕ່ໄລຍະອອກແບບກໍ່ສ້າງສະໜາມກິລາໂອລິມປິກ, ປັກກິ່ງກໍ່ເລີ່ມເອົາໃຈໃສ່ນຳບັນຫານຳໃຊ້ສະໜາມກິລາຫຼັງງານກິລາໂອລິມປິກແລ້ວ. ໃນເວລາເຂົ້າຮ່ວມເວທີປາໄສສາກົນກ່ຽວກັບການກໍ່ສ້າງແລະທຸລະກິດສະໜາມກິລາໂອລິມປິກທີ່ຈັດຂຶ້ນຢູ່ປັກກິ່ງຫວ່າງມໍ່ໆນີ້, ທ່ານຈາງມາວ ຮອງເຈົ້າຄອງນະຄອນປັກກິ່ງເວົ້າຕໍ່ນັກຂ່າວວ່າ: ການນຳໃຊ້ສະໜາມກິລາຫຼັງງານກິລາໂອລິມປິກແມ່ນບັນຫາສຳຄັນທີ່ສຸດ, ເມື່ອສັງເກດເບິ່ງງານກິລາໂອລິມປິກທຸກຄັ້ງທີ່ຜ່ານມາແລ້ວ ເຫັນວ່າມີບົດຮຽນຢ່າງສຳເລັດຜົນ, ພ້ອມທັງມີບົດຮຽນທາງລົບບໍ່ໜ້ອຍ, ຖ້າການນຳໃຊ້ສະໜາມກິລາຫຼັງງານກິລາໂອລິມປິກບໍ່ສຳເລັດຜົນ, ທີ່ຈິງແລ້ວກໍ່ແມ່ນໄດ້ເພີ່ມຄວາມພາລະທາງສັງຄົມໃນໄລຍະງານກິລາໂອລິມປິກ. ສະນັ້ນ ພາຍຫຼັງການຮ້ອງຂໍເປັນເຈົ້າພາບຈັດງານກິລາໂອລິມປິກໄດ້ສຳເລັດຜົນແລ້ວ, ພວກຂ້າພະເຈົ້າກໍ່ເລີ່ມພິຈາລະນາບັນຫານີ້, ດ້ານໜຶ່ງດຶງແມ່ນຖອດຖອນເອົາບົດຮຽນສຳເລັດຜົນຂອງຜູ່ອື່ນ, ອີກດ້ານໜຶ່ງກໍ່ແມ່ນປະສົມປະສານກັບສະພາບຕົວຈິງຂອງນະຄອນປັກກິ່ງເອງ.
ທ່ານຈາງມາວແນະນຳວ່າ, ກ່ຽວກັບບັນຫານຳໃຊ້ສະໜາມກິລາໂອລິມປິກ, ນະຄອນປັກກິ່ງໄດ້ມີແຜນການຄົບຖ້ວນຊຸດໜຶ່ງແລ້ວ. ທ່ານແນະນຳວ່າ, ຫຼັງຈາກງານກິລາໂອລິມປິກລະດູຮ້ອນແລະງານກິລາໂອລິມປິກຄົນພິການປີ 2008 ແລ້ວ, ໃນສະໜາມກິລາ 31 ແຫ່ງທີ່ປັກກິ່ງສ້າງຂຶ້ນນັ້ນ, ສ່ວນແມ່ນສ້າງຂຶ້ນໃໝ່ຊົ່ວຄາວຈະຖືກມ້າງໄປ, ອີກສ່ວນໜຶ່ງທີ່ເປັນສະໜາມກິລາຖາວອນນັ້ນ ຈະກາຍເປັນບ່ອນຝຶກແອບຂອງທີມຊາດປະເພດຕ່າງໆຂອງຈີນ.ສ່ວນສະໜາມກິລາທີ່ຕັ້ງຢູ່ໃນມະຫາວິທະຍາໄລນັ້ນ ຈະກາຍເປັນສະໜາມກິລາຂອງມະຫາວິທະຍາໄລ, ພ້ອມກັນກັບສະໜາມກິລາຂອງອົງການຈັດຕັ້ງສັງຄົມຈະເຊີນຝ່າຍຕ່າງໆມາເຂົ້າຮ່ວມການປະມູນ, ໃຫ້ສັງຄົມມາຄຸ້ມຄອງ, ເປັນບ່ອນຫຼິ້ນກິລາແລະຫັດກາຍຮັກສາສຸຂະພາບຂອງນັກຮຽນແລະໄທເມືອງ.
ຍັງມີສ່ວນໜຶ່ງຈະຖືກດັດສ້າງເປັນສູນວັດທະນະທຳລື້ນເລີງ ສູນການຄ້າຫຼືຮ້ານກິນດຶ່ມ. ຕົວຢ່າງເຊັ່ນ ສູນກິລາທາງນ້ຳໂອລິມປິກທີ່ກະວ່າຈະລົງທຶນ 449 ລ້ານຢວນນັ້ນຈະກາຍເປັນບ່ອນພັກຜ່ອນຢ່ອນອາລົມຊີວະພາບເທິງນ້ຳຂະໜາດໃຫຍ່ຫຼັງງານກິລາໂອລິມປິກ. ສ່ວນບ້ານນັກກິລາໂອລິມປິກ 2000 ກວ່າຊຸດຈະຂາຍຢູ່ໃນຕະຫຼາດ.
ການທຸລະກິດຂອງສະໜາມກິລາໂອລິມປິກບໍ່ພຽງແຕ່ແມ່ນບັນຫາທີ່ອົງການປົກຄອງນະຄອນປັກກິ່ງເອົາໃຈໃສ່ນຳທໍ່ນັ້ນ, ເຈົ້າຂອງສະໜາມກິລາເຫຼົ່ານີ້ກໍ່ເອົາໃຈໃສ່ທີ່ສຸດ. ສູນກິລາວັດທະນະທຳອູເຄີຊົງທີ່ຕັ້ງຢູ່ທິດຕາເວັນຕົກຂອງນະຄອນປັກກິ່ງຈະເປັນບ່ອນຈັດການແຂ່ງຂັນບານບ້ວງໂອລິມປິກ, ມັນແມ່ນບໍລິສັດຫ້າງຫາເງິນກໍ່ສ້າງ, ທ່ານລິວຈົງອີ້ ຜູ່ອຳນວຍການໃຫຍ່ຂອງບໍລິສັດສູນກິລາວັດທະນະທຳອູເຄີຊົງຈຳກັດເຊິ່ງເປັນເຈົ້າຂອງສູນດັ່ງກ່າວເວົ້າວ່າ: ໃນໄລຍະອອກແບບສູນກິລາວັດທະນະທຳອູເຄີຊົງ ກໍ່ໄດ້ພິຈາລະນາເຖິງບັນຫາທຸລະກິດຫຼັງງານກິລາໂອລິມປິກແລ້ວເຊັ່ນ ໃຊ້ໄດ້ຫຼາຍດ້ານແລະເປີດຕໍ່ມວນຊົນເປັນຕົ້ນ, ພ້ອມກັນນັ້ນ, ໃນໄລຍະກໍ່ສ້າງ, ພວກຂ້າພະເຈົ້າໄດ້ພົບປະສັງສັນກັບນັກທຸລະກິດພາຍນອກ, ຮຽນເອົາທັດສະນະຄະຕິກ້າວໜ້າ. ການເຮັດທຸລະກິດຫຼັງງານກິລາໂອລິມປິກກໍ່ຈະດຳເນີນໄປຕາມຄວາມຕ້ອງການຂອງຕະຫຼາດຢ່າງສົມບູນ.
ປະຈຸບັນ ອົງການປົກຄອງນະຄອນປັກກິ່ງໄດ້ເຊື້ອເຊີນຜູ່ຊ່ຽວຊານຈີນແລະຕ່າງປະເທດ 5 ທ່ານ, ໃຫ້ພວກທ່ານເປັນທີ່ປຶກສາເສດຖະກິດຊັ້ນສູງຂອງງານກິລາໂອລິມປິກ. ການວາງແຜນການໃຫ້ອົງການປົກຄອງນະຄອນປັກກິ່ງກ່ຽວກັບບັນຫາທຸລະກິດສະໜາມກິລາຫຼັງງານກິລາໂອລິມປິກກໍແມ່ນວຽກໜຶ່ງຂອງຜູ່ຊ່ຽວຊານເຫຼົ່ານີ້. ທ່ານລູເວັດ ຜູ່ຊ່ຽວຊານຝຣັ່ງເຫັນວ່າ, ບັນຫາການທຸລະກິດສະໜາມກິລາໂອລິມປິກ, ທີ່ຈິງແລ້ວແມ່ນພາກສ່ວນໜຶ່ງຂອງນະຄອນປັກກິ່ງໃນການວາງຜັງເມືອງເຊິ່ງເປັນໂຄງການໃຫຍ່. ທ່ານສະເໜີວ່າ: ການສ້າງສະໜາມກິລາບໍ່ສະເພາະແມ່ນເພື່ອງານກິລາໂອລິມປິກທີ່ດຳເນີນເປັນເວລາ 17 ມື້ນັ້ນທໍ່ນັ້ນ, ຫາກແມ່ນພິຈາລະນາເຖິງຕົວເມືອງຢ່າງສັງລວມ. ກ່ອນຈະສ້າງ, ຕ້ອງພິຈາລະນາເຖິງການນຳໃຊ້ຫຼັງການແຂ່ງຂັນ.
ທ່ານລູເວັດກ່າວວ່າ, ສະເພາະງານກິລາໂອລິມປິກສາມາດສ້າງອິດທິພົນຊື່ສຽງຫຼາຍ, ແຕ່ເວົ້າສຳລັບປັກກິ່ງແລ້ວ, ຜົນດີຂອງງານກິລາໂອລິມປິກຍັງມີໃນຫຼາຍດ້ານ, ຜ່ານຈາກການຈັດງານກິລາໂອລິມປິກ, ປັກກິ່ງສາມາດຍົກສູງສັບພະຄຸນຕົວເມືອງ ແລະບູລະນະພາລະບົດບາດບໍລິການສັງຄົມຂອງຕົວເມືອງໃຫ້ສົມບູນຄົບຖ້ວນ. ທ່ານລູເວັດກ່າວວ່າ, ທ່ານເອງຮູ້ສຶກວ່າປັກກິ່ງໄດ້ເຫັນກວ້າງມອງໄກໃນບັນຫານຳໃຊ້ສະໜາມກິລາຫຼັງງານກິລາໂອລິມປິກ, ທັງໄດ້ວາງແຜນຢ່າງລະອຽດຮອບຄອບ, ຄົນທັງຫຼາຍເຫັນໄປໃນແງ່ດີເຊື່ອວ່າ, ພາຍຫຼັງຈັດງານກິລາໂອລິມປິກປັກກິ່ງປີ 2008 ຢ່າງສຳເລັດຜົນແລ້ວ, ສິ່ງກໍ່ສ້າງກິລາທີ່ໃຫຍ່ໂຕ ເຊັ່ນ ສະໜາມກິລາແຫ່ງຊາດ ສູນລອຍນ້ຳ ສູນກິລາວັດທະນະທຳອູເຄີຊົງແລະອື່ນໆບໍ່ພຽງແຕ່ຈະກາຍເປັນເຄື່ອງໝາຍໃໝ່ຂອງນະຄອນປັກກິ່ງທໍ່ນັ້ນ, ຫາກຍັງຈະກາຍເປັນບ່ອນພັກຜ່ອນຢ່ອນອາລົມທີ່ດີຂອງໄທເມືອງປັກກິ່ງອີກດ້ວຍ.
|
