ຕາມ​ຂ່າວCRI: ພາຍຫຼັງ​ໄດ້​ເກີດ​ແຜ່ນດິນ​ໄຫວ​ແຮງ​ຢູ່​ພູມ​ທະ​ເລ​ມໍ່​ເກາະ​ຊູ​ມາຕຼາອິນ​ໂດ​ເນ​ເຊຍ​ໃນກາງຄືນ​ວັນ​ທີ 28 ມີນາ​ແລ້ວ, ວັນ​ທີ 29 ມີນາ ອິນ​ໂດ​ເນ​ເຊຍປະ​ເທດ​ປະສົບ​ໄພ​ແລະປະ​ຊາ​ຄົມ​ໂລກ​ໄດ້​ພາກັນ​ໃຊ້​ມາດ​ຕະການ, ກອບ​ກູ້​ເຂດ​ປະສົບ​ໄພ​ໂດຍ​ດ່ວນ.

ວັນ​ທີ 29 ມີນາ ກອງ​ກອບ​ກູ້​ກອງ​ທຳ​ອິດ​ຂອງ​ອິນ​ໂດ​ເນ​ເຊຍ​ໄດ້​ໄປ​ຮອດ​ເກາະ​ນິອາສ ​ເຂດ​ປະສົບ​ໄພ​ໜັກ, ດຳ​ເນີນ​ການ​ກອບ​ກູ້. ກອງ​ທະຫານ​ແຫ່ງ​ຊາດ​ອິນ​ໂດ​ເນ​ເຊຍ​ຍັງ​ແຕ່ງ​ກ່ຳ​ປັ່ນ​ລົບ 3 ລຳ​ແລະ​ຍົນ​ເຮ​ລີ​ກົບຫຼາຍລຳ​ໄປ​ເຂດ​ປະສົ​ບ​ໄພ ຊ່ອຍ​ຂົນ​ສົ່ງ​ວັດຖຸ​ກູ້​ໄພ.

​ໃນ​ມື້​ດຽວ​ກັນ ສະຫະ​ປະຊາ​ຊາດ​ໄດ້​ແຕ່ງ​ໜ່ວຍ​​ກອບ​ກູ້ໜ່ວຍ​ໜຶ່ງ​ໄປ​ເຂດ​ປະສົບ​ໄພ. ອົງ​ການ​ອະນາ​ໄມ​ໂລກ ອົງການ​ຢູນີ​ເຊັບ​ສະຫະ​ປະຊາ​ຊາດ ອົງການ​​ໂຄງການ​ອາຫານ​ໂລກ​ແລະ​ອົງ​ການ​ກາ​ແດງ​ສາກົນ​ກໍ່​ໄດ້​ແຕ່ງ​ຜູ່​ກອບ​ກູ້ຫຼືຂົນ​ສົ່ງ​ວັດຖຸ​ກູ້​ໄພ​ໄປ​ເຂດ​ປະສົບ​ໄພ.

​ໃນ​ມື້​ດຽວ​ກັນ, ອົງການກາ​ແດງ​ຈີນ​ຕົກລົງ​ເບີກ​ເງິນ​ 3 ​ແສນ​ໂດ​ລາ​ສະຫະລັດ​ໃຫ້​ເຂດ​ປະສົບ​ໄພ​ອິນ​ໂດ​ເນ​ເຊຍ​ໂດຍ​ດ່ວນ.

ນອກ​ນີ້, ອາ​ເມ​ລິ​ກາ ຍີ່ປຸ່ນ ສິງກະ​ໂປ​ແລະ​ນິວຊີ​ແລນ​ເປັນຕົ້ນກໍ່​ກ່າວ​ວ່າ​ຈະ​​ໃຫ້ການ​ຊ່ອຍ​ເຫຼືອ​ແກ່​ປະ​ເທດ​ປະສົບ​ໄພ​ແຜ່ນດິນ​ໄຫວ​ຄື​ອິນ​ໂດ​ເນ​ເຊຍ​ເປັນຕົ້ນ.

ຕາມ​ຂ່າວ​ແຈ້ງວ່າ, ​ແຜ່ນດິນ​ໄຫວ​ໄດ້​ເຮັດ​ໃຫ້​ຊາວ​ອິນ​ໂດ​ເນ​ເຊຍ 430 ຄົນ​ເສຍ​ຊີວິດ​ເປັນ​ຢ່າງ​ໜ້ອຍ.