|
ທ່ານຜູ່ຟັງທີ່ໂຄລົບ, ໃນຂະນະທ້ອງຖິ່ນຕ່າງໆຂອງຈີນພວມສະຫຼອງບຸນກຸດຈີນ ບຸນປະເພນີຂອງຈີນນັ້ນ, ນັກກິລາຈີນທີ່ມີໜ້າທີ່ຍາດເອົາກຽດມາໃຫ້ປະເທດຊາດໃນງານກິລາໂອລິມປິກປີ 2008 ສ່ວນຫຼາຍພວມຝຶກແອບຈົນເຫື່ອໄຫຼໄຄຍ້ອຍຢູ່ສະໜາມກິລາ, ໃນນັ້ນລວມທັງນັກກິລາແລ່ນແລະລານຫຼາຍຄົນທີ່ພວມຝຶກແອບຢ່າງລຳບາກຢູ່ຕ່າງປະເທດ. ນັ້ນກໍ່ແມ່ນນັກກິລາແລ່ນແລະລານຈີນໄປຝຶກແອບຢ່າງເປັນແບບແຜນຢູ່ຕ່າງປະເທດເປັນຄັ້ງທຳອິດ, ທັງແມ່ນການທົດລອງຂອງທີມແລ່ນແລະລານຈີນເພື່ອໃຫ້ມີການບຸກທະລຸຫຼາຍກວ່າເກົ່າໃນງານກິລາໂອລິມປິກ 2008. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ນັກກິລາແລ່ນແລະລານຈີນໄປຝຶກແອບຢູ່ອາເມລິກາ ເພື່ອກຽມແຂ່ງຂັນໃນງານກິລາໂອລິມປິກປີ 2008.
ທ້າວລິວສຽງ ນັກກິລາແລ່ນຂ້າມຮົ້ວໄດ້ຮັບຜົນສຳເລັດໃນງານກິລາໂອລິມປິກອາແຕນ, ນີ້ໄດ້ໃຫ້ບົດຮຽນສຳລັບກິລາແລ່ນແລະລານຂອງຈີນໃນຫຼາຍດ້ານ, ໃນນັ້ນ ຄູຝຶກແລະນັກກິລາຫຼາຍກວ່າເກົ່າໄປຮຽນຢູ່ປະເທດທີ່ລະດັບກິລາແລ່ນແລະລານສູງ ໄດ້ກາຍເປັນໜຶ່ງໃນບົດຮຽນທີ່ສຳຄັນທີ່ສຸດ. ເພື່ອເຮັດໃຫ້ກິລາແລ່ນແລະລານມີການບຸກທະລຸຢ່າງຮອບດ້ານໃນງານກິລາໂອລິມປິກປັກກິ່ງປີ 2008, ການນຳວົງການແລ່ນແລະລານຈີນຕົກລົງທົດລອງໃນດ້ານນີ້. ໃນຖານເປັນນັກກິລາໄປຮຽນຢູ່ຕ່າງປະເທດງວດທຳອິດ, ເມື່ອເດືອນມັງກອນປີນີ້, ນັກກິລາແລ່ນໄວ 4 ຄົນແລະຄູຝຶກ 2 ຄົນຂອງຈີນໄດ້ໄປຮຽນຢູ່ອາເມລິກາເປັນເວລາ 5 ເດືອນເຄິ່ງ.
ທ່ານເຟິງຊູ້ຢົງ ຄູຝຶກໃຫຍ່ທີມແລ່ນແລະລານຈີນສະເໜີວ່າ, ການໄປຝຶກແອບຢູ່ອາເມລິກາເທື່ອນີ້ ແມ່ນນັກກິລາແລ່ນແລະລານຈີນໄປຝຶກແອບຢູ່ຕ່າງປະເທດເທື່ອທຳອິດ, ໃຕ້ການຊີ້ນຳຂອງຄູຝຶກອາເມລິກາ, ພວກເຂົາເຈົ້າຈະຝຶກແອບນຳກັນກັບນັກກິລາອາເມລິກາ. ການເລືອກເອົາລາຍການແລ່ນໄວມາທົດລອງ, ແມ່ນຍ້ອນທັດສະນະ ແລວຄວາມຄຶດແລະອຸປະກອນຝຶກແອບແລ່ນໄວຂອງອາເມລິກາມີລະດັບສູງສຸດໃນໂລກ. ໃນແຜນການກະກຽມງານກິລາໂອລິມປິກປີ 2008, ວົງການແລ່ນແລະລານຈີນໄດ້ເນັ້ນໜັກເປັນພິເສດວ່າ, ໃນຂະນະທີ່ຮັກສາລະດັບລາຍການທ່າແຮງ, ຕ້ອງຍົກລະດັບລາຍການທ່າອ່ອນໃຫ້ສູງຂຶ້ນ. ສ່ວນລາຍການແລ່ນໄວເຊິ່ງເປັນລາຍການແລ່ນແລະລານຈີນຢູ່ໃນທ່າອ່ອນໃນເວລາດົນນານມານີ້, ແມ່ນເລື່ອງສຳຄັນທີ່ສຸດໃນບາດກ້າວຕໍ່ໄປ. ທ່ານເຟິງຊູ້ຢົງເວົ້າວ່າ: ແລວຄວາມຄຶດຂອງພວກຂ້າພະເຈົ້າແມ່ນຕ້ອງຮັກສາລະດັບຂອງລາຍການທ່າແຮງ ຍົກລະດັບຂອງລາຍການທ່າອ່ອນໃຫ້ສູງຂຶ້ນ ສືບຕໍ່ກຳກັບລາຍການຈຸດໜັກໃຫ້ດີ, ພະຍາຍາມຊິງໄດ້ຫຼຽນຄຳໃນງານກິລາໂອລິມປິກປີ 2008; ອີກດ້ານໜຶ່ງ ກໍ່ແມ່ນລາຍການຫຼ້າຫຼັງ. ໃນງານກິລາໂອລິມປິກປັກກິ່ງ, ກິລາແລ່ນແລະລານຈີນບໍ່ພຽງແຕ່ຕ້ອງຊິງໄດ້ຫຼຽນຄຳແລະຫຼຽນ ອື່ນໆໃຫ້ໄດ້ຫຼາຍກວ່າທຸກຄັ້ງທໍ່ນັ້ນ, ພ້ອມກັນນັ້ນ ຍັງຕ້ອງພະຍາຍາມໃຫ້ມີລາຍການແຂ່ງຂັນແລະນັກກິລາຍິ່ງຫຼາຍຊິງໄດ້ສິດເຂົ້າຮ່ວມການແຂ່ງຂັນ, ຢາກບັນລຸເປົ້າໝາຍດັ່ງກ່າວ ການຍົກລະດັບລາຍການຫຼ້າຫຼັງເຫຼົ່ານີ້ໃຫ້ສູງຂຶ້ນແມ່ນຄວາມສຳຄັນ. ສະນັ້ນ ລາຍການແລ່ນໄວມີໜ້າທີ່ອັນໜັກໜາສົມຄວນໃນງານກິລາໂອລິມປິກ.
ເຖິງວ່າແມ່ນຝຶກແອບນຳກັນ, ແຕ່ເງື່ອນໄຂຮ່າງກາຍແລະຄວາມສາມາດບົ່ມຊ້ອນໃນການແຂ່ງຂັນລະຫວ່າງ ນັກກິລາຈີນກັບນັກກິລາອາເມລິກາແລະເອີລົບແຕກຕ່າງກັນຫຼາຍ, ສະນັ້ນ ທ່ານເຟິງຊູ້ຢົງກ່າວວ່າ, ຖ້າການທົດລອງເທື່ອນີ້ໄດ້ຮັບຜົນດີ, ທີມແລ່ນແລະລານຈີນຍັງຈະສົ່ງນັກກິລາຫຼາຍກວ່າເກົ່າໄປຝຶກແອບຢູ່ປະເທດທີ່ລະດັບກິລາແລ່ນແລະລານສູງ. ທ່ານເຟິງຊູ້ຢົງເຜີຍໃຫ້ຮູ້ວ່າ, ໂດຍແນໃສ່ລາຍການທ່າອ່ອນຄື ແລ່ນທົນເພດຊາຍເປັນຕົ້ນ, ພວກທ່ານພວມພົວພັນກັບເກນຢາ ປະເທດກິລາແລ່ນທົນເກັ່ງ, ຈະສົ່ງນັກກິລາແລ່ນທົນໄປຝຶກແອບຢູ່ປະເທດດັ່ງກ່າວ.
ຕາມໄດ້ຊາບ, ປະຈຸບັນ, ນັກກິລາແລ່ນໄວ 4 ຄົນແລະຄູຝຶກ 2 ທ່ານຂອງຈີນ ພວມຢູ່ສູນຝຶກແອບຂອງມະຫາວິທະຍາໄລໄບໂລທີ່ຕັ້ງຢູ່ລັດແທັກຊາສ໌, ຮັບການຊີ້ນຳຈາກທ່ານໄມໂຄວ ຈອນຊັນ ອະດີດແຊມປຽນງານກິລາໂອລິມປິກແລະທ່ານຮາດ ຄູຝຶກຂອງທ່ານເປັນເວລາ 5 ເດືອນເຄິ່ງ, ແລະຈະເຂົ້າຮ່ວມບາງງານແຂ່ງຂັນຂະໜາດນ້ອຍທີ່ຈັດຂຶ້ນຢູ່ອາເມລິກາ. ປີກາຍນີ້, ທ່ານໄມໂຄວ ຈອນຊັນແລະທ່ານຮາດເຄີຍເດີນທາງມາເຖິງປັກກິ່ງ, ຈັດຊຸດອົບຮົມແລະຊີ້ນຳນັກກິລາແລະຄູຝຶກແລ່ນແລະລານຈີນໄລຍະສັ້ນ. ທ່ານລິວເສຍ ໜຶ່ງໃນຄູຝຶກສອງທ່ານທີ່ໄປຮັບການຊີ້ນຳຢູ່ອາເມລິກາເທື່ອນີ້ ກໍເຄີຍໄດ້ຮັບຟັງການສອນຂອງທ່ານຮາດໃນປີກາຍ, ທ່ານເວົ້າວ່າ: ວິທີຝຶກແອບຂອງອາເມລິກາມີຈຸດພິເສດຂອງຕົນ, ໂດຍສະເພາະແມ່ນການແລ່ນໄວ, ອາເມລິກາໄດ້ແຊມປຽນໂລກມາຫຼາຍປີແລ້ວ, ແນ່ນອນມັນມີທ່າແຮງຂອງຕົນເອງ. ຄວາມແຕກຕ່າງກັນລະຫວ່າງຄູຝຶກຈີນກັບຄູຝຶກອາເມລິກາແມ່ນໃນດ້ານພາຫະນະ ວິທີແລະເປົ້າໝາຍຝຶກແອບ. ທ່ານຊຸນໄຫຜິງ ຄູຝຶກຂອງທ້າວລິວສຽງແມ່ນແບບຢ່າງສຳເລັດຜົນຂອງຄົນຈີນພວກຂ້າພະເຈົ້າ, ທັງແມ່ນແບບຢ່າງທີ່ພວກຂ້າພະເຈົ້າຕ້ອງຮຽນນຳ, ຄົນຈີນຍ່ອມຈະກ້າວຂຶ້ນສູ່ລະດັບໂລກໃນລາຍການແລ່ນໄວ.
ໃນ 4 ຄົນທີ່ໄປຝຶກແອບຢູ່ອາເມລິກາເທື່ອນີ້ ທ້າວຢາງຢ້າວຈູແມ່ນປະຈັກຕາຄົນທີ່ສຸດ, ໃນເວລາທ່ານຈອນຊັນມາຢ້ຽມຢາມຈີນໃນປີກາຍ ທ່ານກໍ່ເຫັນໄປໃນແງ່ດີຕໍ່ທ້າວຢາງຢ້າວຈູນັກກິລາຊຽງໄຮ້. ປະຈຸບັນ ທ້າວຢາງຢ້າວຈູຕົ້ນຕໍຝຶກແອບແລ່ນ 200 ແມັດ, ແຕ່ທ່ານຈອນຊັນເຫັນວ່າ ລາວກໍ່ມີຄວາມສາມາດແລ່ນ 400 ແມັດ, ແມ່ນນັກກິລາໜຸ່ມທີ່ມີຄວາມສາມາດບົ່ມຊ້ອນຫຼາຍ.
ທ້າວຢາງຢ້າວຈູເວົ້າຢ່າງເປີດອົກເປີດໃຈວ່າ, ທ່ານຈອນຊັນມາສິດສອນໃນເທື່ອກ່ອນນັ້ນເວລາສັ້ນໂພດ, ດຽວນີ້ມີໂອກາດໄປຮັບການຝຶກແອບຢ່າງເປັນລະບົບ ຍ່ອມຈະມີບົດບາດສຳຄັນຕໍ່ການພັດທະນາຂອງຕົນໃນພາຍໜ້າ. ເວລາຕອບຄຳຖາມຂອງນັກຂ່າວກ່ຽວກັບສິ່ງທີ່ຕ້ອງການຮ່ຳຮຽນແລະຍົກສູງກ່ອນໝູ່ໃນການໄປຝຶກແອບຢູ່ອາເມລິກາເທື່ອນີ້, ທ້າວຢາງຢ້າວຈູເວົ້າວ່າ: ນັກກິລາແລ່ນໄວຈີນ ຄືຂ້າພະເຈົ້ານີ້, ສິ່ງທີ່ຍັງຂາດທີ່ສຸດແມ່ນກຳລັງຮ່າງກາຍໃນພາກສ່ວນຕ່າງໆ, ພວກເຂົາເຈົ້າມີວິທີຝຶກແອບກຳລັງຮ່າງກາຍທີ່ດີແນວໃດ, ຂ້າພະເຈົ້າຕ້ອງຮຽນເອົາ, ເອົາຈຸດດີຂອງເຂົາເຈົ້າຕາບຈູນຈຸດອ່ອນຂອງຕົນເອງ. ເມື່ອທ່ານຈອນຊັນໄດ້ເຫັນການຝຶກແອບຂອງຂ້າພະເຈົ້າແລ້ວ ທ່ານກ່າວວ່າ, ຂ້າພະເຈົ້າບໍ່ມີບັນຫາຫຍັງໃນດ້ານເຕັກນິກ, ມີເງື່ອນໄຂອັນແນ່ນອນແລ້ວ, ຕົ້ນຕໍແມ່ນບັນຫາກຳລັງ, ນີ້ແມ່ນບັນຫາທີ່ຕ້ອງແກ້ໄຂໃນ 6 ເດືອນຂ້າງໜ້າ.
|
