|
ບຸນກຸດຈີນ ບຸນປະເພນີທີ່ສຳຄັນກວ່າໝູ່ໃນແຕ່ລະປີຂອງຈີນໃກ້ຊິມາຮອດແລ້ວ,ໃນສາຍຕາຂອງຄົນຈີນ,ບຸນກຸດຈີນແມ່ນບຸນທີ່ສຳຄັນເປັນພິເສດ,ຄົນໃນຄອບຄົວໜຶ່ງບໍ່ວ່າຢູ່ໃສ,ກໍຕ້ອງເຕົ້າມາໂຮມກັນສະຫຼອງບຸນກຸດຈີນ.ຕາມທຳມະດາແລ້ວ,ຄົນທັງຫຼາຍຈະຊື້ເຄື່ອງໃຊ້ຂອງກິນຈຳນວນຫຼວງຫຼາຍກ່ອນບຸນກຸດຈີນ,ເພື່ອສະຫຼອງບຸນກຸດຈີນຢ່າງມ່ວນຊື່ນຄຶກຄື້ນ.
ມື້ບຸນກຸດຈີນໄດ້ຫຍັບມໍ່ເຂົ້າມາ,ຢູ່ຊົນນະບົດແຂວງເຮີນານເຊິ່ງເປັນແຂວງໃຫຍ່ດ້ານກະສິກຳຢູ່ ພາກກາງຂອງຈີນໄດ້ເຕັມໄປດ້ວຍບັນຍາກາດມ່ວນຊື່ນເພື່ອກຽມເອົາບຸນກຸດຈີນ.ປະຈຸບັນ,ຊາວກະສິກອນທັງຫຼາຍບາງຄົນປັດກວາດເຮືອນຊານ,ບາງຄົນຕິດຄະຕິຄູ່ໃສ່ບານປະຕູແລະຕິດເຈ້ຍຕັດເອ້ປ່ອງຢ້ຽມ,ບາງຄົນແຂວນຮູບແຕ້ມປີໃໝ່ແລະໂຄມໄຟທີ່ສວຍງາມ,ຈັ່ງແມ່ນເບີກບານມ່ວນຊື່ນຫຼາຍ.ໃນຕະຫຼາດນັດຂອງຕາແສງຕ້າໂຈ່ວເມືອງສູຊ່າງແຂວງເຮີນານ,ນັກຂ່າວໄດ້ພົບ ທ່ານລີຊິງໂກວ ຊາວກະສິກອນທີ່ພວມຊື້ເຄື່ອງໃຊ້ຂອງກິນໃນຍາມບຸນ,ທ່ານບອກນັກຂ່າວຢ່າງມ່ວນຊື່ນວ່າ:
"ຍ້ອນປີນີ້ແມ່ນປີທີ່ເກັບກ່ຽວທັນຍາຫານໄດ້ຫຼາຍ,ໝົດທຸກຄອບຄົວໃນບ້ານພວກເຮົາລ້ວນແຕ່ເກັບກ່ຽວຜົນລະປູກໄດ້ດີສົມຄວນ.ສະນັ້ນ,ພວກເຮົາຈິ່ງຊື້ເຄື່ອງໃຊ້ຂອງກິນໃນບຸນກຸດຈີນລ່ວງໜ້າ.ປີນີ້,ຄອບຄົວເຮົາໄດ້ເຮັດຕ່າງກັນກັບທຸກປີທີ່ຜ່ານມາ,ຄືຊື້ເຄື່ອງຂອງຊັ້ນສູງແດ່,ເຮົາໄດ້ຊື້ເຄື່ອງຕອງນ້ຳໜຶ່ງ,ເພື່ອຈະໄດ້ກິນນ້ຳສະອາດ."
ທ່ານລີຊິງໂກວ ບອກນັກຂ່າວວ່າ,ດຽວນີ້ປູກພືດພັນທັນຍາຫານໄດ້ຮັບຜົນຫຼາຍກວ່າເມື່ອກ່ອນຢ່າງຫຼວງຫຼາຍ,ຄອບຄົວຂອງທ່ານໄດ້ເຮັດນາໜຶ່ງເຮັກຕາ,ທາງລັດຖະບານໄດ້ໃຫ້ເງິນເກື້ອກູນເກືອບ200ຢວນ.ປີນີ້,ທ່ານບໍ່ພຽງແຕ່ໄດ້ປູກເຂົ້າເທົ່ານັ້ນ,ຫາກຍັງໄດ້ປູກຝ້າຍແລະຜັກຊະນິດຕ່າງໆ,ມີລາຍໄດ້ຫຼາຍກວ່າປີກາຍ1500ກວ່າຢວນ.
ສອງປີມານີ້,ລັດຖະບານຈີນໄດ້ປະຕິບັດນະໂຍບາຍໃຫ້ຄ່າເກື້ອກູນແກ່ຊາວນາທີ່ປູກພືດພັນທັນຍາຫານ,ໄດ້ຫຼຸດອັດຕາເສຍພາສີກະສິກຳ,ສົ່ງເສີມຊາວກະສິກອນປູກເຄື່ອງປູກຂອງຝັງຫຼາຍຢ່າງ,ສະນັ້ນ,ພວກຊາວກະສິກອນໄດ້ຮັບຜົນປະໂຫຍດຢ່າງຫຼວງຫຼາຍ.ປີ2003,ລາຍໄດ້ ຂອງຊາວກະສິກອນ ຈີນໄດ້ເພີ່ມຂຶ້ນຫຼາຍກວ່າປີ2002 10%.ປີ2003,ຊາວກະສິກອນໃນທົ່ວແຂວງເຮີນານໄດ້ມີລາຍໄດ້ເພີ່ມຂຶ້ນ3ຕື້400ລ້ານກວ່າຢວນ.ຍອດປະລິມານທັນຍາຫານກໍໄດ້ສ້າງສະຖິຕິດີທີ່ສຸດໃນປະຫວັດສາດ.
ພວກຊາວກະສິກອນທີ່ປູກພືດພັນທັນຍາຫານຢູ່ຊົນນະບົດໄດ້ຮັບຜົນປະໂຫຍດບໍ່ໜ້ອຍ,ພໍຢູ່ພໍກິນຍັງມີສ່ວນເຫຼືອ.ສ່ວນພວກຊາວກະສິກອນທີ່ເຂົ້າເມືອງເຮັດວຽກກໍໄດ້ຖືເງິນທີ່ຫາໄດ້ໃນໝົດປີ,ເດີນທາງເມືອບ້ານ,ເພື່ອສະຫຼອງບຸນກຸດຈີນນຳຄອບຄົວ.ເພື່ອອຳນວຍຄວາມສະດວກໃຫ້ແກ່ຊາວກະສິກອນທີ່ເຂົ້າມາເຮັດວຽກຢູ່ຕົວເມືອງເຫຼົ່ານີ້ເມືອບ້ານເອົາບຸນກຸດຈີນ,ປີນີ້,ພາກສ່ວນທາງລົດໄຟຂອງຈີນຍັງໄດ້ຈັດວາງຂະບວນລົດໄຟຈຳເພາະໃຫ້ແກ່ພວກເຂົາເຈົ້າ.ຢູ່ສະຖານີລົດໄຟເສິງຕູ່ແຂວງເຊສວນທາງພາກຕາເວັນຕົກສຽງໃຕ້ຂອງຈີນ,ນັກຂ່າວໄດ້ລົມ ກັບທ່ານເສິນຮ້າວ ທີ່ຫາກໍ່ລົງຈາກຂະບວນລົດໄຟພິເສດທີ່ມາຈາກປັກກິ່ງ,ເພີ່ມໄດ້ແບກກະເປົານ້ອຍໃຫຍ່ທີ່ໃສ່ເຄື່ອງໃຊ້ຂອງກິນໃນບຸນກຸດຈີນ,ແລະເວົ້າຢ່າງກະຕຸ້ນໃຈວ່າ:
"ຂ້ອຍໄດ້ເຮັດວຽກຢູ່ປັກກິ່ງ2,3ປີແລ້ວ,ປີນີ້,ລັດຖະບານໄດ້ຄຸ້ມຄອງຢ່າງເຄັ່ງຄັດຕໍ່ການເບີກເງິນເດືອນໃຫ້ຊາວກະສິກອນທີ່ເຂົ້າມາເຮັດວຽກໃນຕົວເມືອງນັ້ນຕາມເວລາກຳນົດ,ເຖົ້າແກ່ໄດ້ເບີກເງິນຄ່າຈ້າງໃຫ້ພວກເຮົາແຕ່ດົນແລ້ວ,ສະນັ້ນ,ຂ້ອຍໄດ້ຊື້ເຄື່ອງໃຊ້ຂອງກິນໃນບຸນກຸດຈີນຈຳນວນໜຶ່ງ,ເມືອຢາມເມຍແລະລູກ,ພ້ອມກັບຄອບຄົວສະຫຼອງປີໃໝ່."
ນັກຂ່າວໄດ້ຊາບວ່າ,ຍ້ອນວ່າລັດຖະບານໄດ້ເພີ່ມຄວາມແຮງໃນການຊຳລະການຕິດ ເງິນເດືອນຂອງຊາວກະສິກອນທີ່ເຮັດວຽກໃນຕົວເມືອງ.ນັບມາຮອດຕົ້ນເດືອນມັງກອນປີນີ້,ຫົວໜ່ວຍທີ່ຕິດໜີ້ນຳຊາວກະສິກອນໄດ້ໃຊ້ແທນເງິນເດືອນທີ່ຕິດນຳຊາວກະສິກອນໃນຫຼາຍປີມານີ້ໂດຍພື້ນຖານ,ລວມມີ30ຕື້ກວ່າຢວນ.ປີນີ້,ພວກຊາວກະສິກອນທີ່ເຂົ້າມາເຮັດວຽກໃນຕົວເມືອງສາມາດເອົາບຸນກຸດຈີນຢ່າງມ່ວນຊື່ນຄືກັນກັບທ່ານເສິນຮ້າວ.
ໃນເວລາທີ່ຄົນທັງຫຼາຍຂຸ້ນນຳການຊື້ເຄື່ອງໃຊ້ຂອງກິນໃນບຸນກຸດຈີນນັ້ນ,ທ່ານວາງເອີລີທີ່ຢູ່ບ້ານໜຶ່ງໃນນະຄອນທຽນສິນໄດ້ຮັບເຄື່ອງໃຊ້ຂອງກິນໃນບຸນກຸດຈີນທີ່ສະຫະພັນກຳມະບານນະຄອນທຽນສິນສົ່ງໄປໃຫ້.ໃນເຮືອນຄົວນ້ອຍໆຂອງເພິ່ນ,ມີເຂົ້າແລະແປ້ງໝີ່ເປັນຖົງກອງໄວ້ຢູ່ ພື້ນ.ເພິ່ນບອກນັກຂ່າວວ່າ,
"2ມື້ກ່ອນ,ກຳມະບານນະຄອນໄດ້ສົ່ງນ້ຳມັນພືດຖັງໜຶ່ງ,ເຂົ້າສານສອງຖົງ,ແປ້ງໝີ່ສອງຖົງມາໃຫ້ຂ້ອຍ,ຍັງມີເງິນສົດອີກ500ຢວນ,ແລະບັດຊື້ຂອງຈຳນວນໜຶ່ງ,ເອົາບັດຊື້ຂອງເຫຼົ່ານີ້,ໄປຊື້ເຄື່ອງໃຊ້ຂອງກິນຢູ່ຮ້ານຊຸບເບີມາເກັດທີ່ກຳນົດໄວ້.ຂ້ອຍໄດ້ຊື້ເຄື່ອງໃຊ້ເຄື່ອງກິນໃນບຸນກຸດຈີນຄົບແລ້ວ."
ທ່ານວາງເອີລີບອກນັກຂ່າວວ່າ,ອຸບັດເຫດລົດຍົນເມື່ອ10ປີກ່ອນໄດ້ເຮັດໃຫ້ທ່ານເສຍຂາເບື້ອງໜຶ່ງ,ແຕ່ນັ້ນມາ,ເພິ່ນໄດ້ຮັບຄວາມເອົາໃຈໃສ່ຈາກລັດຖະບານຢູ່ທຸກເວລາ.ພາຍໃຕ້ການຊ່ອຍເຫຼືອຂອງອົງການປົກຄອງ,ທ່ານເຄີຍເປັນກຳມະກອນຢູ່ໂຮງງານຜະລິດຖ້ວຍຊາມບ່ວງສ້ອມແຫ່ງໜຶ່ງ,ພາຍລຸນມາ,ໂຮງງານໄດ້ປິດກິດຈະການ,ທ່ານບໍ່ມີວຽກເຮັດ.ເມື່ອສະຫະພັນກຳມະບານນະຄອນທຽນສິນໄດ້ຊາບູສະພາບການຂອງທ່ານແລ້ວ,ໄດ້ຈັດຄອບຄົວຂອງທ່ານເປັນເປົ້າໝາຍຊ່ອຍເຫຼືອ.ທ່ານວາງເອີລີໄດ້ຈົກເອົາບັດສີຂຽວໃບໜຶ່ງຈາກລີ້ນຊັກແລະເວົ້າວ່າ:ນີ້ແມ່ນບັດຂຽວທີ່ສະຫະພັນກຳມະບານນະຄອນທຽນສິນເບີກໃຫ້,ໃນຍາມທຳມະດາ,ທ່ານສາມາດໄດ້ຮັບເຄື່ອງໃຊ້ປະຈຳວັນຈຳນວນໜຶ່ງໂດຍອີງຕາມບັດດັ່ງກ່າວ.ເມື່ອຮອດມື້ບຸນ,ຜູ້ນຳນະຄອນທຽນສິນຍັງໄປຢາມທ່ານ,ສົ່ງເງິນແລະເຄື່ອງຂອງໃຫ້ທ່ານ.ທ່ານວາງເອີລີເວົ້າວ່າ,ບຸນກຸດຈີນປີນີ້,ໝົດຄອບຄົວຂອງພວກເຂົາເຈົ້າຈະຫໍ່ກ້ຽວ,ກິນເຂົ້າຮ່ວມພາ,ທ່ານຂໍອວຍພອນໃຫ້ໝົດຄອບຄົວຈົ່ງມີສຸຂະພາບເຂັ້ມແຂງ,ແລະຂໍອວຍພອນໃຫ້ປະເທດຊາດຍິ່ງຮັ່ງມີເຂັ້ມແຂງກວ່າເກົ່າ.
ນັກຂ່າວໄດ້ຊາບຈາກສະຫະພັນກຳມະບານແຫ່ງຊາດຈີນວ່າ,ເພື່ອໃຫ້ຄອບຄົວທີ່ມີຄວາມຫຍຸ້ງຍາກໃນການດຳລົງຊີວິດຄືທ່ານວາງເອີລີໄດ້ເອົາບຸນເປັນຢ່າງດີ,ກ່ອນບຸນກຸດຈີນທຸກປີ,ອົງການກຳມະບານທຸກຂັ້ນຂອງຈີນແລະພາກສ່ວນການປົກຄອງແລະປະຊາສົງເຄາະຂອງຈີນກໍຕ້ອງໄປຢາມພວກເຂົາເຈົ້າ,ສົ່ງອາຫານໃນ ບຸນປີໃໝ່ແລະເຄື່ອງໃຊ້ປະຈຳວັນໃຫ້ພວກເຂົາເຈົ້າ.ກ່ອນບຸນກຸດຈີນປີນີ້,ພຽງແຕ່ສະຫະພັນກຳມະບານແຫ່ງຊາດຈີນກໍໄດ້ສົ່ງເງິນຢື້ຢາມຖາມຂ່າວ35ລ້ານຢວນ.
|
