|
ທ່ານຜູ່ຟັງທີ່ໂຄລົບ, ເວົ້າສຳລັບວຽກງານກະກຽມງານກິລາໂອລິມປິກຂອງນະຄອນປັກກິ່ງແລ້ວ ປີ 2004 ແມ່ນປີສຳຄັນ, ສະໜາມກາງແຈ້ງແລະສະໜາມໃນຫົ່ມຂອງງານກິລາໂອລິມປິກໄດ້ເລີ່ມລົງມືກໍ່ສ້າງຕາມໆກັນ, ແຜນການພັດທະນາຕະຫຼາດໄດ້ດຳເນີນໄປຢ່າງສະດວກ, ການປະກວດສັນຍາລັກນຳໂຊກແລະຄຳຂວັນຂອງງານກິລາໂອລິມປິກໃນທົ່ວໂລກໄດ້ພາໃຫ້ມີການຕອບສະໜອງຢ່າງຟົດຟື້ນ…ຍິ່ງສຳຄັນກວ່ານັ້ນແມ່ນ ເມື່ອໄດ້ເຫັນນະຄອນອາແຕນໄດ້ຮັບຜົນສຳເລັດໃຫຍ່ຫຼວງໃນງານກິລາໂອລິມປິກແລ້ວ, ປັກກິ່ງຕັດສິນໃຈຖອດຖອນເອົາບົດຮຽນກ້າວໜ້າຂອງຜູ່ຈັດຕັ້ງງານກິລາໂອລິມປິກອາແຕນຢ່າງຕັ້ງໜ້າ, ພິຈາລະນາແລະປັບປຸງທັດສະນະຄະຕິຂອງການກະກຽມງານກິລາໂອລິມປິກຂອງຕົນຄືນໃໝ່ດ້ວຍທ່າທີວິທະຍາສາດ.
ງານກິລາໂອລິມປິກອາແຕນທີ່ຈັດຂຶ້ນໃນເດືອນສິງຫາປີ 2004 ໄດ້ສິ້ນສຸດລົງນັ້ນ, ເປັນຂີດໝາຍສະແດງໃຫ້ເຫັນວ່າງານກິລາໂອລິມປິກໄດ້ເຂົ້າສູ່ໄລຍະກະກຽມງານກິລາໂອລິມປິກປັກກິ່ງແລ້ວ. ເມື່ອທ້າຍເດືອນຕຸລາປີ 2004, ໃນເວລາທ່ານຊັກ ໂຣເກ ປະທານຄະນະກຳມະການໂອລິມປິກສາກົນມາຢ້ຽມຢາມຢູ່ປັກກິ່ງ, ທ່ານກ່າວວ່າ, ງານກິລາໂອລິມປິກປັກກິ່ງໄດ້ຜ່ານຈາກ "ໄລຍະວາງແຜນ" ເຂົ້າສູ່ "ໄລຍະປະຕິບັດຮອບດ້ານ".ໃນໄລຍະຈັດງານກິລາໂອລິມປິກອາແຕນ, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ສົ່ງພະນັກງານ 400 ກວ່າທ່ານໄປອາແຕນ, ຮ່ຳຮຽນແລະຖອດຖອນເອົາບົດຮຽນທີ່ສຳເລັດຜົນຂອງງານກິລາໂອລິມປິກອາແຕນ.
ເມື່ອປັກກິ່ງຮ້ອງຂໍເປັນເຈົ້າພາບຈັດງານກິລາໂອລິມປິກປີ 2008 ໄດ້ສຳເລັດຜົນແລ້ວ, ກໍໄດ້ສະເໜີວ່າຈະຈັດງານກິລາໂອລິມປິກໃຫ້ເປັນງານກິລາຄັ້ງໜຶ່ງທີ່ຕື່ນເຕັ້ນໜ້າຊົມ, ອັນເປັນການປຽບທຽບຢ່າງຈະແຈ້ງກັບ "ທຳນອງຕ່ຳ"ໃນເບື້ອງຕົ້ນຂອງງານກິລາໂອລິມປິກອາແຕນ. ໃນ 3 ປີທີ່ຜ່ານມາ, ຄະນະກຳມະການໂອລິມປິກສາກົນກໍຍ້ອງຍໍວຽກງານກະກຽມຂອງງານກິລາໂອລິມປິກບໍ່ຢຸດບໍ່ເຊົາ, ສະນັ້ນ ທົ່ວໂລກໄດ້ຝາກຄວາມຫວັງນຳງານກິລາໂອລິມປິກປີ 2008, ເຫັນວ່າປັກກິ່ງຈະລື່ນກາຍອາແຕນຢ່າງແນ່ນອນ. ເມື່ອງານກິລາໂອລິມປິກອາແຕນໄດ້ຮັບຜົນສຳເລັດແລ້ວ ກໍເປັນທີ່ແນ່ນອນວ່າຄົນທັງຫຼາຍຈະຮຽກຮ້ອງງານກິລາໂອລິມປິກປັກກິ່ງສູງກວ່າເກົ່າ. ທ່ານສາສະດາຈານຊຸນຈຽນ ຜູ່ຊ່ຽວຊານສູນງານກິລາໂອລິມປິກມະນຸດສາດຂອງມະຫາວິທະຍາໄລປະຊາຊົນຈີນຊີ້ອອກວ່າ: ຄະນະກຳມະການຈັດຕັ້ງງານກິລາໂອລິມປິກປັກກິ່ງຮູ້ສຶກວ່າ, ງານກິລາໂອລິມປິກອາແຕນໄດ້ຮັບຜົນສຳເລັດຢ່າງໃຫຍ່ຫຼວງເຮັດໃຫ້ພວກທ່ານຮູ້ສຶກມີຄວາມກົດດັນ, ປັກກິ່ງມີແຕ່ພະຍາຍາມຫຼາຍກວ່າ, ຈຶ່ງຈະໄດ້ຮັບຜົນງານດີຄືກັນກັບອາແຕນ. ສ່ວນວຽກງານກະກຽມ, ສຳຄັນກວ່າໝູ່ແມ່ນ ພະນັກງານຂອງປັກກິ່ງຕ້ອງທຸ່ນທ່ຽງ, ຍຶດໝັ້ນນ້ຳໃຈວິທະຍາສາດ.
ພາຍຫຼັງຮ້ອງຂໍເປັນເຈົ້າພາບຈັດງານກິລາໂອລິມປິກໄດ້ສຳເລັດຜົນແລ້ວ ປັກກິ່ງເຄີຍກ່າວວ່າ, ສະໜາມກິລາກາງແຈ້ງແລະໃນຫົ່ມທັງໝົດຂອງງານກິລາໂອລິມປິກປີ 2008 ລ້ວນແຕ່ຈະສ້າງສຳເລັດກ່ອນເປີດງານກິລາໂອລິມປິກປີເຄິ່ງຄືໃນທ້າຍປີ 2006. ຖ້າປັກກິ່ງເຮັດຕາມຄຳໝັ້ນສັນຍາດັ່ງກ່າວແລ້ວ,ຈະເປັນສະຖິຕິທີ່ກໍ່ສ້າງສະໜາມກິລາຂອງງານກິລາໂອລິມປິກສຳເລັດໄວກວ່າທຸກຄັ້ງທີ່ຜ່ານມາ. ແຕ່ວ່າການສ້າງສະໜາມກິລາສຳເລັດກ່ອນປີເຄິ່ງ ແນ່ນອນແລ້ວຈະຮັບປະກັນໃຫ້ມີເວລາພຽງພໍມາຈັດງານແຂ່ງຂັນທົດລອງ, ແຕ່ຄ່າໃຊ້ຈ່າຍໃນການຮັກສາບົວລະບັດສະໜາມກິລາເຫຼົ່ານີ້ຈະເພີ່ມຂຶ້ນ, ນີ້ຈະເຮັດໃຫ້ປັກກິ່ງທີ່ເປັນເຈົ້າພາບຈັດງານກິລາໂອລິມປິກຮັບພາລະທາງເສດຖະກິດອັນໜັກໜາ.
ສະນັ້ນ ພາຍຫຼັງໄດ້ວາງແຜນດ້ານຄວາມປອດໄພ ການລົງທຶນແລະເວລາການກໍ່ສ້າງຂອງສະໜາມກິລາແລ້ວ, ຄະນະກຳມະການຈັດຕັ້ງງານກິລາໂອລິມປິກປັກກິ່ງສະເໜີໃນກອງປະຊຸມຄົບຄະນະຄັ້ງທີ 116 ຂອງຄະນະກຳມະການໂອລິມປິກສາກົນທີ່ໄຂຂຶ້ນຢູ່ອາແຕນເມື່ອເດືອນສິງຫາປີ 2004 ວ່າ ຈະເລື່ອນເວລາການສ້າງສະໜາມກິລາຂອງງານກິລາໂອລິມປິກໃຫ້ສຳເລັດໄປອີກປີໜຶ່ງ. ນອກຈາກໂຄງການຈຳນວນໜ້ອຍຈະສ້າງສຳເລັດໃນທ້າຍປີ 2006 ຍ້ອນຄວາມຕ້ອງການຂອງການແຂ່ງຂັນສາກົນບາງລາຍການແລ້ວ, ສະໜາມກິລາແລະສິ່ງກໍ່ສ້າງທີ່ກ່ຽວຂ້ອງຂອງງານກິລາໂອລິມປິກຈະສ້າງສຳເລັດຕາມໆກັນໃນປີ 2007. ກ່ຽວກັບບັນຫານີ້ ທ່ານຊາວຊືເວີຍ ຮອງຫົວໜ້າພະແນກຖະແຫຼງຂ່າວໂຄສະນາຂອງຄະນະກຳມະການຈັດຕັ້ງງານກິລາໂອລິມປິກປັກກິ່ງກ່າວວ່າ, ການສ້າງສະໜາມກິລາໃຫ້ສຳເລັດບໍ່ແມ່ນຍິ່ງໄວກໍຍິ່ງດີ, ຫາກແມ່ນຕ້ອງຕິດແທດຕົວຈິງແລະສ້າງສຳເລັດໃນເວລາອັນເໝາະສົມຈຶ່ງຈະດີ. ທ່ານເວົ້າວ່າ: ໃນປີຜ່ານມາ, ພາຍໃຕ້ຄວາມພະຍາຍາມຂອງອົງການປົກຄອງນະຄອນປັກກິ່ງແລະຄະນະກຳມະການຈັດຕັ້ງງານກິລາໂອລິມປິກປັກກິ່ງ, ພວກຂ້າພະເຈົ້າໄດ້ສັບຊ້ອນກິດຈະການກໍ່ສ້າງສະໜາມກິລາຂອງງານກິລາໂອລິມປິກປັກກິ່ງ, ການສັບຊ້ອນເທື່ອນີ້ສຳຄັນຫຼາຍ, ໄດ້ຮັບຜົນດີສົມຄວນໂດຍຕາມມາດຖານທີ່ "ໃຊ້ໄດ້ແລະກະທັດຮັດ".
ໃນບັນຫາຄ່າໃຊ້ຈ່າຍຂອງການຈັດງານກິລາໂອລິມປິກ, ປັກກິ່ງກໍ່ຕັດສິນໃຈຖອດຖອນເອົາບົດຮຽນຂອງອາແຕນ, ຄິດໄລ່ຢ່າງລະອຽດ. ຕາມສະຖິຕິຂອງພາກສ່ວນການເງິນເກຼັກ, ງານກິລາໂອລິມປິກອາແຕນໄດ້ກາຍເປັນງານກິລາໂອລິມປິກທີ່ໃຊ້ເງິນຫຼາຍກວ່າທຸກຄັ້ງໃນປະຫວັດສາດ, ມີປະມານ 9 ຕື້ເອີໂຣ, ພາຍຫຼັງງານກິລາໂອລິມປິກສິ້ນສຸດລົງແລ້ວ, ສະໜາມກິລາຫຼາຍແຫ່ງບໍ່ໄດ້ໃຊ້ອີກແລ້ວ, ດັ່ງນັ້ນ ລັດຖະບານເກຼັກກໍ່ໄດ້ຫາບແບກພາລະອັນໜັກໜາ. ສະນັ້ນ, ໃນໄລຍະກໍ່ສ້າງສະໜາມ "ຮັງນົກ" ເຊິ່ງແມ່ນສະໜາມກິລາກາງຂອງງານກິລາໂອລິມປິກປີ 2008, ປີນີ້ ອົງການປົກຄອງນະຄອນປັກກິ່ງຈະປັບປຸງແຜນຜັງກິດຈະການດ້ວຍທ່າທີວິທະຍາສາດແລະຕິດແທດຕົວຈິງ, ຫວັງຫຼຸດຄ່າກໍ່ສ້າງລວມໄຕ້ປະຖົມປັດໄຈທີ່ບໍ່ເຕະຕ້ອງເຖິງຄຸນນະພາບຂອງກິດຈະການ,. ເມື່ອຜູ່ຊ່ຽວຊານດ້ານສະຖາປະນິກຂອງຈີນແລະຕ່າງປະເທດຫຼາຍສິບທ່ານໄດ້ຄົ້ນຄວ້າຫຼາຍຫຼົບຫຼາຍຕ່າວແລ້ວສະເໜີຜັງໃໝ່, ນະຄອນປັກກິ່ງໄດ້ຕົກລົງຍົກເລີກຫຼັງຄາສະໜາມກິລາທີ່ສາມາດເປີດໄດ້ຂອງຜັງເກົ່າ, ທັງໄດ້ປັບປຸງໂຄງຮ່າງເຫຼັກກ້າ, ເປັນແນວນີ້ກໍໄດ້ໃຊ້ເຫຼັກກ້າໜ້ອຍລົງໃນໜ້າພຽງກວ້າງ. ຜູ່ຊ່ຽວຊານເຫັນວ່າ, ພາຍຫຼັງໄດ້ປັບປຸງໃໝ່ແລ້ວ ຜັງ "ຮັງນົກ" ບໍ່ພຽງແຕ່ບໍ່ໄດ້ຫຼຸດລະດັບຄຸນນະພາບໃຫ້ຕ່ຳລົງທໍ່ນັ້ນ ຫາກຍັງໄດ້ຍົກລະດັບຄວາມປອດໄພຂອງໂຄງສ້າງອີກຊ້ຳ, ແລະເຮັດໃຫ້ຄ່າກໍ່ສ້າງຂອງກິດຈະການຍິ່ງສົມເຫດສົມຜົນກວ່າ. ເມື່ອທ້າຍເດືອນທັນວາປີ 2004, ສະໜາມກິລາ "ຮັງນົກ" ທີ່ໄດ້ປັບປຸງຜັງໃໝ່ແລ້ວນັ້ນໄດ້ຟື້ນຟູການກໍ່ສ້າງອີກ. ນອກນີ້, ໂດຍພິຈາລະນາເຖິງການນຳໃຊ້ຕໍ່ໄປຫຼັງງານກິລາໂອລິມປິກແລະນຳໃຊ້ສິ່ງກໍ່ສ້າງກິລາເກົ່າທີ່ມີຢູ່ໃນປະຈຸບັນຢ່າງເຕັມທີ່, ຄະນະກຳມະການຈັດງານກິລາໂອລິມປິກປັກກິ່ງກຽມຈະສັບຊ້ອນທີ່ຕັ້ງຂອງສະໜາມກິລາ 5 ແຫ່ງ, ປະຈຸບັນ ພວກທ່ານພວມປຶກສາຫາລືກັບຄະນະກຳມະການໂອລິມປິກສາກົນແລະອົງການກິລາລາຍສະເກາະສາກົນ.
ເມື່ອຫວນຄືນວຽກງານໃນປີຜ່ານມາ, ທ່ານສາສະດາຈານຊຸນຈຽນ ຜູ່ຊ່ຽວຊານງານກິລາ ໂອລິມປິກໄດ້ຕີລາຄາສູງຕໍ່ວຽກງານກະກຽມງານກິລາໂອລິມປິກປັກກິ່ງ. ທ່ານເວົ້າວ່າ: ປີ 2004, ວຽກງານກະກຽມງານກິລາໂອລິມປິກປັກກິ່ງໄດ້ຜ່ານປີໜຶ່ງທີ່ມີວິທະຍາສາດ. ຈາກຊັ້ນຕົກລົງລົງຮອດພະນັກງານທຳມະດາ, ລ້ວນແຕ່ເຮັດວຽກຢ່າງເອົາຈິງເອົາຈັງ, ຮ່ຳຮຽນແລະຖອດຖອນເອົາບົດຮຽນຂອງຕ່າງປະເທດຕາມຫຼັກວິທະຍາສາດ, ເຊື່ອວ່າໃນ 4 ປີຂ້າງໜ້ານີ້, ປັກກິ່ງຈະກະກຽມງານກິລາໂອລິມປິກຍິ່ງມີວິທະຍາສາດ.
ທ່ານຜູ່ຟັງທີ່ໂຄລົບ, ລາຍການໂລກກິລາພາກນີ້ຂໍສ້ຽງສຸດລົງພຽງທໍ່ນີ້, ພົບກັນໃໝ່ໃນອາທິດໜ້າ, ສະບາຍດີ.
|
