|
|
 |
| (GMT+08:00)
2004-12-22 14:30:31
|
 |
|
ຈີນປະກາດກົດບັນຍັດສາສະຫນາແບບສັງລວມສະບັບທຳອິດເພື່ອຮັບປະກັນເສລີພາບໃນການເຊື່ອຖືສາສະຫນາຂອງພົນລະເມືອງ
cri
ຫວ່າງມໍ່ໆນີ້,ລັດຖະບານຈີນໄດ້ປະກາດກົດຂໍ້ກຳນົດກ່ຽວກັບວຽກງານສາສະຫນາຕໍ່ສັງຄົມ.ນີ້ແມ່ນຈີນປະກາດກົດບັນຍັດບໍລິຫານແບບສັງລວມດ້ານສາສະຫນາສະບັບທຳອິດ,ໄດ້ກຳນົດຢ່າງຈະແຈ້ງຕໍ່ການຮັບປະກັນສິດແລະຜົນປະໂຫຍດທີ່ຊອບກົດຫມາຍຂອງພົນລະເມືອງທີ່ເຊື່ອຖືສາສະຫນາ ອົງການສາສະຫນາແລະສະຖານທີ່ເຄື່ອນໄຫວທາງສາສະຫນາ,ພ້ອມກັນນັ້ນກໍ່ໄດ້ເຮັດໃຫ້ວຽກງານສາສະຫນາທີ່ພົວພັນເຖິງສິດປະໂຫຍດແຫ່ງຊາດແລະສາທາລະນະປະໂຫຍດ ຂອງສັງຄົມເປັນແບບສະບັບ.ຜູ້ຊ່ຽວຊານທີ່ກ່ຽວຂ້ອງກ່າວວ່າ,ການປະຕິບັດກົດຂໍ້ກຳນົດດັ່ງກ່າວມີຄວາມຫມາຍສຳຄັນຕໍ່ການຮັບປະກັນເສລີພາບໃນການເຊື່ອຖືສາສະຫນາຂອງພົນລະເມືອງແລະເຮັດໃຫ້ການຄຸ້ມຄອງວຽກງານສາສະຫນາເປັນແບບສະບັບ.ຕໍ່ໄປເຊີນຟັງບົດແຈ້ງຂ່າວທີ່ກ່ຽວຂ້ອງ.
ຈີນແມ່ນປະເທດທີ່ມີສາສະຫນາຫລາຍຢ່າງຊົງຕົວຢູ່ນຳກັນ.ສາສະຫນາທົ່ວໂລກເຊັ່ນສາສະຫນາພຸດ ສາສະຫນາອິດສລາມ ສາສະຫນາໂລມັງກະໂຕລິກແລະສາສະຫນາຄິດສຕຽນລ້ວນແຕ່ໄດ້ເຜີຍແຜ່ຢູ່ຈີນ.ນອກນີ້,ຈີນຍັງມີສາສະຫນາຂອງຕົນຈຳນວນຫນຶ່ງ,ເຊັ່ນສາສະຫນາເຕົາ ສາສະຫນາອ້ອດໂຕດອກເປັນຕົ້ນ.ປະຈຸບັນ,ຈີນມີສາສະນິກະຊົນ 100 ກວ່າລ້ານຄົນແລະຜູ້ປະຕິບັດງານທາງສາສະຫນາປະມານ 3 ແສນຄົນ.
ພາຍຫລັງສ້າງຕັ້ງປະເທດຈີນໃຫມ່ເມື່ອປີ 1949 ແລ້ວ,ນະໂຍບາຍພື້ນຖານຕໍ່ບັນຫາສາສະຫນາຂອງລັດຖະບານຈີນແມ່ນເຄົາລົບແລະປົກປ້ອງເສລີພາບໃນການເຊື່ອຖືສາສະຫນາ.
ຄຽງຄູ່ກັບການພັດທະນາຂອງເສດຖະກິດສັງຄົມຈີນ,ໃນດ້ານສາສະຫນາໄດ້ປະກົດມີສະພາບການແລະບັນຫາໃຫມ່ຢ່າງຫລວງຫລາຍ,ກົດບັນຍັດທີ່ມີຢູ່ແລ້ວບໍ່ສາມາດສອດຄ່ອງກັບຄຳຮຽກຮ້ອງແຫ່ງການຂະຫຍາຍຕົວຂອງສະຖານະການຢ່າງສົມບູນ,ຕ້ອງການວາງກົດບັນຍັດບໍລິຫານແບບສັງລວມສະບັບຫນຶ່ງ.ກໍ່ແມ່ນຢູ່ໃຕ້ເບື້ອງຫລັງດັ່ງກ່າວ,ຈີນໄດ້ປະກາດກົດຂໍ້ກຳນົດກ່ຽວກັບບັນຫາສາສະຫນາ.ທ່ານຈິນປິງຮາວຂອງມະຫາວິທະຍາໄລຊົນເຜົ່າສູນກາງແມ່ນຜູ້ຊ່ຽວຊານດ້ານການ ຄົ້ນຄ້ານະໂຍບາຍຊົນເຜົ່າແລະສາສະຫນາ,ທ່ານເຫັນວ່າ,ການປະກາດກົດຂໍ້ກຳນົດດັ່ງກ່າວມີຄວາມຫມາຍສຳຄັນ.
"ກົດຂໍ້ກຳນົດກ່ຽວກັບວຽກງານສາສະຫນາສະບັບນີ້ແມ່ນກົດບັນຍັດບໍລິຫານແບບສັງລວມດ້ານສາສະຫນາສະບັບທຳອິດຂອງຈີນ,ການປະກາດແລະຈະປະຕິບັດໃນວັນທີ 1 ມີນາປີຫນ້າສະແດງໃຫ້ເຫັນວ່າ ວຽກງານສາສະຫນາແລະວຽກງານຄຸ້ມຄອງສາສະຫນາຂອງປະເທດພວກເຮົາໄດ້ເດີນໄປຕາມເສັ້ນທາງຫັນເປັນລະບອບແລະຫັນເປັນລະບອບກົດຫມາຍ."
ຕາມຮູ້ວ່າ,ໃນຂະບວນການວາງກົດຂໍ້ກຳນົດກ່ຽວກັບວຽກງານສາສະຫນາສະບັບນີ້,ໄດ້ເອົາໃຈໃສ່ເປັນພິເສດນຳການຮັບເອົາຄວາມເຫັນຂອງບຸກຄົນທາງສາສະຫນາແລະມວນຊົນຜູ້ເຊື່ອຖືສາສະຫນາເປັນ,ສະນັ້ນຈິ່ງໄດ້ສ່ອງແສງຢ່າງເຕັມທີ່ເຖິງຄວາມຮຽກຮ້ອງແລະຄວາມປາຖະຫນາທົ່ວໄປຂອງບຸກຄົນວົງການສາສະຫນາແລະມວນຊົນຜູ້ເຊື່ອຖືສາສະຫນາອັນໄພສານ.
ກົດຂໍ້ກຳນົດດັ່ງກ່າວໄດ້ກຳນົດໄວ້ຢ່າງຈະແຈ້ງວ່າ,ພົນລະເມືອງມີເສລີພາບໃນການເຊື່ອຖືສາສະຫນາ;ພ້ອມກັນນັ້ນ,ກົດຂໍ້ກຳນົດໄດ້ກຳນົດຢ່າງລະອຽດຕໍ່ສິດຂອງພົນລະເມືອງທີ່ເຊື່ອຖືສາສະຫນາແລະອົງການສາສະຫນາທີ່ດຳເນີນການເຄື່ອນໄຫວທາງສາສະຫນາ ພິມຈຳຫນ່າຍປຶ້ມແລະວາລະສານທາງສາສະຫນາເປັນຕົ້ນ. ກົດຂໍ້ກຳນົດຍັງໄດ້ກຳນົດຢ່າງຈະແຈ້ງຕໍ່ຫນ້າທີ່ຮັບຜິດຊອບທາງກົດ ຫມາຍຂອງການກະທຳທີ່ລະເມີດສິດປະໂຫຍດອັນຊອບກົດຫມາຍຂອງພົນລະເມືອງຜູ້ເຊື່ອຖືສາສະຫນາ ອົງການສາສະຫນາແລະສະຖານທີ່ສາສະຫນາ.
ໃນຂະນະທີ່ກຳນົດສິດຂອງພົນລະເມືອງຜູ້ເຊື່ອຖືສາສະຫນາຢ່າງຈະແຈ້ງນັ້ນ,ກົດຂໍ້ກຳນົດທີ່ປະກາດເທື່ອນີ້ກໍ່ໄດ້ກຳນົດພັນທະຂອງພົນລະເມືອງຜູ້ເຊື່ອຖືສາສະຫນານັ້ນຢ່າງຈະແຈ້ງ.ຕົວຢ່າງຄືການເຄື່ອນໄຫວທາງສາສະຫນາຄວນດຳເນີນພາຍໃນຂອບເຂດຂໍ້ກຳນົດຂອງລັດຖະທຳມະນູນແລະກົດຫມາຍເປັນຕົ້ນ.ກົດຂໍ້ກຳນົດຍັງລະບຸໄວ້ວ່າ,ຕ້ອງກັ້ນກາງການນຳໃຊ້ສາສະຫນາດຳເນີນການເຄື່ອນໄຫວຕ້ອງໂທດລະເມີດກົດຫມາຍທີ່ມີຜົນຮ້າຍຕໍ່ຄວາມປອດໄພແຫ່ງຊາດແລະຄວາມປອດໄພສາທາລະນະເປັນຕົ້ນຕາມກົດຫມາຍ.ຕໍ່ຜູ້ທີ່ລະເມີດຂໍ້ກຳນົດເຫົ່ຼານີ້ຕ້ອງລົງໂທດຕາມກົດຫມາຍທີ່ສົມຄູ່ກັນ.
ທ່ານຈິນປິງຮາວ ສາສະດາຈານມະຫາວິທະຍາໄລຊົນເຜົ່າສູນກາງເຫັນວ່າ,ຂໍ້ກຳນົດກ່ຽວກັບສິດປລະພັນທະຂອງພົນລະເມືອງຜູ້ເຊື່ອຖືສາສະຫນາໃນກົດຂໍ້ກຳນົດວຽກງານສາສະຫນາໄດ້ສ່ອງແສງເຖິງຄວາມນອກຕົວແລະຄວາມທ່ຽງທຳຂອງກົດຫມາຍ.ທ່ານເວົ້າວ່າ,"ກົດຂໍ້ກຳນົດດັ່ງກ່າວໄດ້ກຳນົດສິດແລະພັນທະເປັນຢ່າງດີ.ໃຕ້ປະຖົມປັດໄຈຮັບປະກັນສິດປະໂຫຍດຢ່າງເຕັມທີ່ນັ້ນ,ກໍ່ໄດ້ກຳນົດພັນທະເທົ່າທີ່ຄວນ.ພ້ອມກັນນັ້ນໄດ້ກຳນົດຫນ້າທີ່ຮັບຜິດຊອບທາງກົດຫມາຍທີ່ກ່ຽວຂ້ອງຢ່າງຈະແຈ້ງ,ນີ້ແມ່ນມີການຮັບປະກັນທີ່ສຳຄັນທີ່ສຸດທີ່ມີຜົນດີຕໍ່ກົດຂໍ້ກຳນົດເສີມຂະຫຍາຍບົດບາດຕົວຈິງ."
|
|
|
